Holi Stock Market Holiday: मार्च 2026 महिना गुंतवणूकदारांसाठी सुट्ट्यांचा ठरणार आहे. देशांतर्गत शेअर बाजार शनिवार आणि रविवार व्यतिरिक्त विविध सणांनिमित्त तीन दिवस बंद राहतील. नॅशनल स्टॉक एक्सचेंज (NSE) आणि बॉम्बे स्टॉक एक्सचेंज (BSE) ने जाहीर केलेल्या सुट्ट्यांच्या यादीनुसार, मंगळवार, 3 मार्च रोजी होळीनिमित्त बाजार पूर्णपणे बंद राहील. यानंतर महिन्याच्या शेवटी गुरुवार, 26 मार्च रोजी श्री राम नवमी आणि मंगळवार, 31 मार्च रोजी श्री महावीर जयंतीनिमित्त व्यवहार होणार नाहीत. विशेष म्हणजे, यंदा ईद-उल-फित्र शनिवार, 21 मार्च रोजी आल्याने बाजारला वेगळी सुट्टी नसेल.
होळीच्या तारखेवरून गुंतवणूकदारांमध्ये संभ्रम; 4 मार्चला व्यवहार पुन्हा सुरू
शेअर बाजाराने 3 मार्च ही होळीची सुट्टी जाहीर केली असली तरी, गुंतवणूकदारांमध्ये तारखेवरून काहीसे प्रश्नचिन्ह उपस्थित केले जात आहेत. मंगळवारी पूर्ण चंद्रग्रहण असल्याने भारतातील बहुतेक भागांत रंगांचा सण म्हणजेच धुलिवंदन 4 मार्च रोजी साजरा केला जाणार आहे. मात्र, अधिकृत वेळापत्रकानुसार मंगळवार, 3 मार्च रोजी बाजार बंद असून बुधवार, 4 मार्च रोजी नियमित व्यवहार पुन्हा सुरू होतील. जानेवारीत केवळ एक आणि फेब्रुवारीत एकही सुट्टी नसल्याने, मार्चमधील या तीन सुट्ट्या गुंतवणूकदारांसाठी महत्त्वाच्या ठरतील.
हेही वाचा – PF Interest Rate: EPFO चा मोठा निर्णय, पीएफ खात्यांवर मिळणार 'इतका' व्याजदर
MCX आणि NCDEX वरील व्यवहारांच्या वेळा; संध्याकाळच्या सत्रात दिलासा
कमोडिटी मार्केटबद्दल बोलायचे झाले तर, 3 मार्च रोजी मल्टी कमोडिटी एक्सचेंज (MCX) वर सकाळी 9:00 ते संध्याकाळी 5:00 वाजेपर्यंत व्यवहार बंद राहतील. मात्र, संध्याकाळच्या सत्रात म्हणजेच 5:00 ते रात्री 11:30/11:55 पर्यंत व्यापार नेहमीप्रमाणे सुरू राहील. बुधवार, 4 मार्च रोजी एमसीएक्सवर पूर्ण दिवस व्यवहार होतील. दुसरीकडे, नॅशनल कमोडिटी अँड डेरिव्हेटिव्ह्ज एक्सचेंज (NCDEX) मात्र 3 मार्च रोजी संपूर्ण दिवसासाठी बंद ठेवण्याचा निर्णय घेण्यात आला आहे.
