Middle East Conflict: पश्चिम आशियात पुन्हा युद्ध भडकलं; तेहरानमधील भारतीय दूतावासाकडून नागरिकांना तातडीने इराण सोडण्याचा सल्ला

Middle East Conflict: पश्चिम आशियातील वेगाने बिघडत चाललेल्या परिस्थितीच्या पार्श्वभूमीवर, तेहरानमधील भारतीय दूतावासाने सोमवार रोजी एका तातडीच्या पत्रकाद्वारे भारतीय नागरिकांसाठी अत्यंत महत्त्वाची ‘ट्रॅव्हल ॲडव्हायझरी’ जारी केली आहे. यामध्ये सर्व भारतीयांना इराणचा कोणताही प्रवास पूर्णपणे टाळण्याचे कडक आवाहन करण्यात आले असून, जे नागरिक सध्या तिथे राहतात त्यांना उपलब्ध असलेल्या विमान किंवा इतर वाहतूक साधनांचा वापर करून तात्काळ तो देश सोडण्याची सूचना करण्यात आली आहे. गेल्या 24 तासांत इराणच्या अनेक शहरांमध्ये सुरू झालेला लष्करी संघर्ष, महत्त्वाच्या ठिकाणांवर झालेले हवाई हल्ले आणि जड शस्त्रास्त्रांचा होत असलेला वापर यामुळे तिथे राहणाऱ्या नागरिकांच्या सुरक्षेचा प्रश्न गंभीर बनला आहे.

इराण-इस्रायल थेट संघर्षाचे 100 दिवस; परिस्थिती अत्यंत चिंताजनक
इराण आणि इस्रायलमधील थेट लष्करी संघर्ष सोमवारी पुन्हा एकदा टोकाला पोहोचला असून दोन्ही देशांनी एकमेकांवर क्षेपणास्त्रांचा मारा केला आहे. चालू युद्धाच्या 100 व्या दिवशी झालेल्या या नव्या हल्ल्यांमुळे संपूर्ण प्रांतात मोठ्या युद्धाची ठिणगी पडण्याची भीती निर्माण झाली आहे. यादरम्यान इराणच्या एका पेट्रोकेमिकल प्लांटवर भीषण हल्ला झाला असून, प्रत्युत्तरादाखल इराणच्या रिव्होल्युशनरी गार्ड्सनी इस्रायलच्या 2 महत्त्वाच्या लष्करी तळांना लक्ष्य केल्याचा दावा केला आहे. ‘द जेरुसलेम पोस्ट’च्या एका अहवालानुसार, इराणचे समर्थन असलेल्या हुथी बंडखोरांनी जागतिक सागरी व्यापारासाठी अत्यंत महत्त्वाच्या असलेल्या लाल समुद्रात इस्रायली जहाजांची नाकेबंदी करण्याची धमकी दिल्यामुळे जागतिक स्तरावर सागरी सुरक्षेची चिंता वाढली आहे.

हेही वाचा – Middle-East War Update : मध्य-पूर्वेत युद्धाचा भडका! इस्रायलचा इराणवर प्रतिहल्ला; तेहरान विमानतळ बंद, सौदीतही भीषण स्फोट

डोनाल्ड ट्रम्प यांच्या मध्यस्थीला धक्का
हा भीषण संघर्ष 28 फेब्रुवारी रोजी सुरू झाला होता. त्यानंतर सीमापार शत्रुत्व थांबवण्यासाठी करण्यात आलेला तात्पुरता युद्धविराम (Truce) रविवारी इस्रायलने बैरूतच्या दक्षिण भागात केलेल्या हवाई हल्ल्यांमुळे मोडीत निघाला. अमेरिकेचे राष्ट्राध्यक्ष डोनाल्ड ट्रम्प हे इराणसोबतच्या जुन्या अणुकराराच्या माध्यमातून हा वाद राजनैतिक पातळीवर सोडवण्याचा आटोकाट प्रयत्न करत होते, परंतु या ताज्या हिंसाचारामुळे त्यांच्या प्रयत्नांना मोठा फटका बसला आहे. ट्रम्प यांनी ‘फॉक्स न्यूज’शी बोलताना तीव्र नाराजी व्यक्त केली की, दोन्ही देश एका कराराच्या अत्यंत जवळ आले होते आणि सोमवार, मंगळवार किंवा बुधवारपर्यंत तो पूर्ण झाला असता; मात्र त्याआधीच ही परिस्थिती उद्भवली.

pic.twitter.com/jWFDrdsAlz — India in Iran (@India_in_Iran) June 8, 2026

ट्रम्प यांचा नेतान्याहू आणि इराणला थेट इशारा
परिस्थिती हाताबाहेर गेल्याचे पाहून अमेरिकेचे राष्ट्राध्यक्ष डोनाल्ड ट्रम्प यांनी थेट इराण सरकारला आपले क्षेपणास्त्र हल्ले थांबवून पुन्हा चर्चेच्या टेबलावर येण्याचे आवाहन केले आहे. तसेच पूर्ण ताकदीचे युद्ध टाळण्यासाठी त्यांनी इस्रायलचे पंतप्रधान बेंजामिन नेतान्याहू यांच्याशी फोनवरून चर्चा केली. ट्रम्प यांनी स्पष्ट केले आहे की, अंतिम निर्णय घेण्याचा अधिकार अमेरिकेचाच असून इराण आणि अमेरिकेत होणारा कोणताही शांतता करार नेतान्याहू रोखू शकणार नाहीत. त्यांनी इस्रायली पंतप्रधानांना इशारा दिला की, जर नेतान्याहू यांनी पुन्हा प्रतिहल्ला केला, तर हा हिंसाचार असाच पुढील अनेक दशके चालू राहील, त्यामुळे त्यांना अखेरीस वाटाघाटींचा मार्ग स्वीकारावाच लागेल.