Vishakha Tilkar Suicide due to Dowry Harassment in Ambernath, Maharashtra : महाराष्ट्रातील अंबरनाथ परिसरात एक धक्कादायक आणि हृदयद्रावक घटना समोर आली आहे, जिथे लग्न होऊन अवघे दीड महिना उलटण्यापूर्वीच एका 26 वर्षीय नवविवाहितेने गळफास लावून आत्महत्या केली. विशाखा टिळकर असे या मृत तरुणीचे नाव असून, हुंड्यासाठी शारीरिक व मानसिक छळ आणि घरात लावलेल्या सीसीटीव्ही कॅमेऱ्यांद्वारे ठेवण्यात येणारी कडक पाळत यामुळे त्रस्त होऊन तिने हे टोकाचे पाऊल उचलल्याचा आरोप तिच्या कुटुंबीयांनी केला आहे. याप्रकरणी शिवाजीनगर पोलिसांनी गुन्हा दाखल करत मृत विशाखाचा पती डॉ. नितीन टिळकर, तिची सासू छाया टिळकर आणि दीर निनाद टिळकर या तिघांनाही अटक केली असून पुढील तपास सुरू केला आहे.
लग्नानंतर अवघ्या काही दिवसांतच छळाला सुरुवात
विशाखाचा विवाह 30 एप्रिल रोजी डॉ. नितीन टिळकर याच्याशी झाला होता. लग्नापूर्वी दोन्ही कुटुंबांमधील संबंध अत्यंत सलोख्याचे होते, मात्र विशाखा सासरी गेल्यानंतर अवघ्या काही दिवसांतच परिस्थिती पूर्णपणे बदलली. लग्नातील भेटवस्तू आणि देवाणघेवाणीवरून सासरचे लोक असंतुष्ट होते, ज्यावरून विशाखाला वारंवार टोमणे मारले जात असत. तिच्या माहेरून आणखी सोने आणि रोकड आणण्यासाठी तिच्यावर सतत दबाव टाकला जात होता आणि मागण्या पूर्ण न केल्यास तिला अमानुष मानसिक व शारीरिक छळाला सामोरे जावे लागत होते.
घरात सीसीटीव्ही कॅमेरे लावून ठेवली जात होती पाळत
या प्रकरणातील धक्कादायक बाब म्हणजे, पती नितीन याने विशाखाच्या दैनंदिन हालचालींवर लक्ष ठेवण्यासाठी घराच्या आत आणि बाहेर सीसीटीव्ही कॅमेरे बसवले होते. या कॅमेऱ्यांद्वारे तिच्या प्रत्येक कृत्यावर बारीक पाळत ठेवली जात असे. विशाखाने शेजाऱ्यांशी किंवा इतर कोणाशीही साधलेल्या साध्या संवादावरही तिला जाब विचारला जायचा आणि त्यावरून घरात वाद घातले जात असत. आत्महत्येच्या अवघ्या 2 दिवस आधी, विशाखाने जवळच राहणाऱ्या एका महिलेशी संवाद साधल्यामुळे तिला सासरच्यांकडून बेदम मारहाण करण्यात आली होती, अशी माहिती तक्रारीत समोर आली आहे.
पोलिसांकडून तपास आणि डिजिटल पुराव्यांची तपासणी
मंगळवारी विशाखाचा मृतदेह तिच्या सासरच्या घरात लटकलेल्या अवस्थेत आढळून आला, ज्यानंतर शिवाजीनगर पोलिसांनी घटनास्थळी धाव घेत मृतदेह ताब्यात घेतला आणि तो शवविच्छेदनासाठी पाठवला. प्राथमिक तपासणीत पोलिसांनाही घरात सीसीटीव्ही कॅमेरे असल्याचे आढळले असून, याद्वारे पती तिच्यावर पाळत ठेवत असल्याच्या संशयाला बळ मिळाले आहे. विशाखाच्या कुटुंबीयांनी दिलेल्या तक्रारीवरून पोलिसांनी हुंडाबळी, आत्महत्येस प्रवृत्त करणे आणि इतर कलमांखाली गुन्हा नोंदवून बुधवारी तिन्ही आरोपींना गजाआड केले. पोलीस सध्या घरातील डिजिटल उपकरणे आणि सीसीटीव्ही फुटेजची तपासणी करत असून, घटनेशी संबंधित इतर पुरावे गोळा करत आहेत.
हेही वाचा – Nerul Crime News : नेरुळ हादरलं! 'बिनकामाचा' टोमणा सहन होईना; पतीने पत्नीसह सासूवरही केले चाकूने सपासप वार
