Tukaram Mundhe : राज्याचे अन्न आणि औषध प्रशासन (FDA) आयुक्त तुकाराम मुंढे यांच्या धडाकेबाज आणि पारदर्शक कार्यपद्धतीची सध्या संपूर्ण महाराष्ट्रात जोरदार चर्चा सुरू आहे. अन्न भेसळ करणाऱ्या माफियांचे धाबे दणाणून सोडणारे मुंढे सध्या बड्या हॉटेल्सचे किचन, दूध, पनीर आणि खव्याच्या अड्ड्यांवर सातत्याने छापे टाकत आहेत. त्यांच्या याच आक्रमक 'सिंघम' रूपामुळे सर्वसामान्य नागरिक त्यांची तुलना थेट 'नायक' चित्रपटातील अनिल कपूरच्या पात्राशी करत आहेत. याच पार्श्वभूमीवर एका डिजिटल पॉडकॉस्टमध्ये त्यांना 'तुम्हाला एक दिवसाचा मुख्यमंत्री केले तर काय कराल?' असा थेट प्रश्न विचारण्यात आला, ज्यावर त्यांनी दिलेले उत्तर सध्या प्रचंड व्हायरल होत आहे.
लोकशाहीत 'अमर अधिकार' कोणालाच नसतात: मुंढे
या प्रश्नाचे उत्तर देताना तुकाराम मुंढे यांनी अत्यंत प्रगल्भ भूमिका मांडली. ते म्हणाले की, लोकशाही व्यवस्थेमध्ये असे 'अमर' किंवा अमर्याद अधिकार कोणालाच मिळत नसतात. 'मी एक शासकीय कर्मचारी असून समाजाला प्रगतीच्या सर्वोच्च पातळीवर नेणे, त्यांना योग्य मार्गदर्शन करणे आणि ताकद देणे हे आमचे मूळ कर्तव्य आहे,' असे त्यांनी स्पष्ट केले. समाज जेवढा जास्त विकसित होईल, तेवढाच देश आणि पर्यायाने प्रत्येक व्यक्ती प्रगती करेल, असे सांगत त्यांनी प्रशासनात कोणतीही जबाबदारी मिळाल्यास प्रत्येक दिवशी कामाचा स्तर 1 इंच पुढे कसा नेतात, यावर प्रकाश टाकला. कामातील संपूर्ण पारदर्शकता आणि उद्दिष्ट पूर्ती हीच त्यांची मुख्य प्राथमिकता असते.
लोकांनी 'नायक' म्हटल्यावर व्यक्त केली इच्छा
जनतेने त्यांना 'नायक' चित्रपटातील हिरोप्रमाणे मानल्याबद्दल त्यांनी नागरिकांचे आभार मानले आणि त्यांच्या या भावनेचा चांगल्या हेतूने स्वीकार केला. 'नायक' चित्रपटातील 'शिवाजी गायकवाड' हे पात्र आपल्याला आवडले होते, अशी कबुलीही त्यांनी दिली. मात्र, त्यांनी पुढे बोलताना आवर्जून सांगितले की, 'मला लोकांनी केवळ एक चांगला अधिकारी म्हणण्यापेक्षा 'बदल घडवणारा अधिकारी' (Change Maker) म्हटलेलं जास्त आवडेल.' आपण स्वतःहून कधीच प्रसिद्धीचा पाठपुरावा करत नाही किंवा सोशल मीडियावरील कौतुकाने हुरळून जात नाही, असेही त्यांनी यावेळी आवर्जून नमूद केले.
21 वर्षांच्या सेवेत 24 पेक्षा जास्त बदल्यांवर स्पष्ट मत
आपल्या 21 वर्षांच्या शासकीय सेवेत तब्बल 24 पेक्षा जास्त वेळा झालेल्या बदल्यांवरही त्यांनी निर्भीडपणे भाष्य केले. बदली होणे हा पूर्णपणे प्रशासकीय प्रक्रियेचा एक भाग आहे, असे ते मानतात. 'मी सध्या कोणत्या ठिकाणी कार्यरत आहे याने मला काहीच फरक पडत नाही; मी ज्या पदावर आहे तिथे सर्वसामान्य जनतेच्या हितासाठी कायद्याच्या चौकटीत राहून 100 टक्के प्रामाणिकपणे काम करणे हेच माझे परम कर्तव्य आहे,' अशा शब्दांत त्यांनी आपली कर्तव्यनिष्ठा पुन्हा एकदा अधोरेखित केली.
FDA आयुक्तपदाचा धडाका आणि थेट हॉटेल्स सील
मुंढे यांनी एफडीए (FDA) प्रमुख म्हणून पदभार हाती घेतल्यापासून अन्न भेसळखोरांविरोधात युद्ध पातळीवर मोहीम सुरू केली आहे. मुंबई, पुणे, नाशिकसह संपूर्ण राज्यातील मोठ्या हॉटेल्सच्या किचनचे थेट 'रियालिटी चेक' केले जात आहे. या तपासणीत अस्वच्छता किंवा निकृष्ट दर्जाचे अन्न आढळल्यास कोणतीही गय न करता थेट हॉटेल्स सील करण्याचे कडक आदेश त्यांनी दिले आहेत. विशेषतः सण-उत्सवाच्या काळात दूध, खवा आणि दुग्धजन्य पदार्थांमधील भेसळ पूर्णपणे रोखण्यासाठी त्यांनी विशेष पथके तैनात केली आहेत. त्यांच्या या धडक कारवायांमुळे येत्या काळात सकारात्मक बदल घडून यावेत, अशी अपेक्षा व्यक्त आहे.
