3 Years Old Toddler Saves Lives after Death : नियतीचा भयानक घाला कोणावर कधी येईल, याचा नेम नसतो. पुण्यातून एक अत्यंत हृदय हेलावून टाकणारी आणि डोळ्यात पाणी आणणारी घटना समोर आली आहे. या घटनेत एका 3 वर्षीय निष्पाप चिमुरड्याचा खेळता खेळता अचानक दुसऱ्या मजल्यावरून खाली पडल्याने दुर्दैवी अंत झाला. तो या जगातून कायमचा निघून गेला असला, तरी त्याच्या दुःखात बुडालेल्या आई-वडिलांनी काळजावर दगड ठेवून एक अत्यंत मोठा आणि कौतुकास्पद निर्णय घेतला. आपल्या पोटच्या गोळ्याचे अवयव दान करून त्यांनी इतर दोन लहान मुलांना जीवनदान दिले असून, दोन अंध व्यक्तींना नवीन दृष्टी बहाल केली आहे.
राहत्या घराच्या गॅलरीतून अपघात आणि 10 दिवसांची मृत्यूशी झुंज
ही अत्यंत वेदनादायक घटना पुण्यातील ताडीवाला रस्ता परिसरात घडली असून, आरुष शिंदे असे या अवघ्या 3 वर्षांच्या बालकाचे नाव आहे. राहत्या घराच्या दुसऱ्या मजल्यावरून खाली पडल्याने आरुष गंभीर जखमी झाला होता. ही घटना 2 जून रोजी घडली होती. यानंतर त्याला तातडीने रुग्णालयात दाखल करण्यात आले. रुबी हॉल क्लिनिकमधील बाल अतिदक्षता विभागातील डॉक्टरांच्या टीमने आरुषचे प्राण वाचवण्यासाठी प्रयत्नांची शर्थ केली. मात्र, तब्बल 10 दिवस मृत्यूशी झुंज दिल्यानंतर, अखेर 12 जून रोजी डॉक्टरांनी आरुषला 'मेंदुमृत' (Brain Dead) घोषित केले.
अथांग दुःखातही पालकांनी रडत रडत दिला अवयवदानाचा संमतीवर अंगठा
आपला लाडका आरुष आता कधीच परत येणार नाही हे कटू सत्य समोर आल्यानंतर, रुबी हॉलच्या प्रत्यारोपण समन्वयक लोचना जाधव यांनी आरुषच्या पालकांचे समुपदेशन केले. स्वतःचा 3 वर्षांचा मुलगा गमावल्याचे अथांग दुःख बाजूला सारून, दुसऱ्या कोणाचे तरी हसतेखेळते मूल वाचावे म्हणून आरुषच्या पालकांनी दाखवलेले धैर्य कौतुकास्पद आहे. अत्यंत जड अंतःकरणाने आणि डोळ्यात अश्रू धरून आरुषच्या आई-वडिलांनी अवयवदानाच्या संमतीपत्रावर आपला अंगठा दिला.
हेही वाचा – Mumbai BEST Bus: मुंबईकरांसाठी दिलासादायक बातमी, बेस्टबाबत सरकार मोठा निर्णय घेण्याच्या तयारीत
आरुषच्या अवयवांमुळे दोन लहान मुलांना जीवनदान आणि दोघांना दृष्टी
आरुषच्या कुटुंबियांच्या या ऐतिहासिक निर्णयामुळे 'झेडटीसीसी' (ZTCC) मार्फत अवयव प्रत्यारोपणाची प्रक्रिया अत्यंत वेगाने पार पाडण्यात आली. आरुषने जाता-जाता आपली 2 मूत्रपिंडे (Kidneys) आणि यकृत (Liver) रुबी हॉल क्लिनिक आणि बाणेर येथील मनिपाल रुग्णालयातील मृत्यूच्या दारात असलेल्या 2 अत्यंत लहान मुलांना देऊन त्यांना नवीन जीवनदान दिले. यासोबतच आरूषचे नेत्रदानही करण्यात आले, ज्यामुळे 2 अंध व्यक्तींच्या आयुष्यातील अंधार दूर होऊन त्यांना हे सुंदर जग पाहण्यासाठी नवीन दृष्टी मिळाली.
वैद्यकीय क्षेत्रातून कौतुक: पुणे झोनमधील अत्यंत दुर्मिळ क्षण
रुबी हॉल क्लिनिकचे वैद्यकीय संचालक लेफ्टनंट कर्नल डॉ. विवेक लाल आणि मुख्य कार्यकारी अधिकारी डॉ. मुदित सक्सेना यांनी बाल अतिदक्षता विभागाची टीम, ट्रान्सप्लांट टीम आणि नर्सिंग स्टाफचे या यशस्वी शस्त्रक्रियेबद्दल अभिनंदन केले. डॉ. लाल अत्यंत भावूक होऊन म्हणाले की, पुणे झोनसाठी हा अत्यंत ऐतिहासिक आणि तितकाच डोळ्यात पाणी आणणारा क्षण आहे; कारण, इतक्या लहान वयाचा अवयवदाता मिळणे अत्यंत दुर्मिळ आहे. आज आरुष या जगात नसला, तरी तो इतरांच्या रूपात या जगात जिवंत आहे, असे सर्वत्र म्हटले जात आहे.
