Ketan Agarwal Death Case: लोहगड येथील केतन अग्रवाल मृत्यू प्रकरणाच्या तपासाला 28 दिवस पूर्ण झाले असून, तपासादरम्यान पोलिसांच्या हाती नवीन माहिती लागल्याची माहिती समोर येत आहे. या प्रकरणातील संशयित सिया गोयल आणि चेतन चौधरी यांनी केतन अग्रवालला संपवण्यासाठी आधीपासूनच नियोजन केले होते, असा संशय तपास यंत्रणांकडून व्यक्त करण्यात येत आहे. पोलिसांकडून या सर्व बाबींची सखोल पडताळणी सुरू आहे.
अन्न किंवा पेयातून विष देण्याचा कथित डाव
तपासात समोर आलेल्या माहितीनुसार, केतन अग्रवाल यांना अन्न किंवा पेयामधून हळूहळू परिणाम करणारे विष देण्याचा कथित कट रचण्यात आल्याचा संशय पोलिसांना आहे. या माध्यमातून त्यांच्या आरोग्यावर गंभीर परिणाम व्हावेत किंवा त्यांचे अंतर्गत अवयव निकामी व्हावेत, असा उद्देश असल्याचा तपासातील प्राथमिक निष्कर्ष असल्याचे सांगितले जात आहे. तसेच, या प्रयत्नातून मृत्यू झाला नाही तरी ते कायमस्वरूपी शारीरिकदृष्ट्या अक्षम व्हावेत, अशीही योजना असल्याचा तपासात दावा करण्यात आला आहे.
विष मिळाले नसल्याने कथित योजना अपूर्ण राहिल्याचा संशय
पोलिसांच्या माहितीनुसार, या कथित योजनेसाठी संशयितांनी विविध मार्गांनी हळूहळू परिणाम करणारे विष मिळवण्याचा प्रयत्न केल्याचा तपासात उल्लेख आहे. मात्र, आवश्यक पदार्थ उपलब्ध न झाल्यामुळे हा कथित डाव प्रत्यक्षात साकार होऊ शकला नाही, असा संशय तपास यंत्रणांनी व्यक्त केला आहे.
तांत्रिक पुराव्यांचा शोध सुरू
या प्रकरणातील प्रत्येक बाबीची पोलिसांकडून बारकाईने चौकशी सुरू असून, तांत्रिक आणि डिजिटल पुरावेही तपासले जात आहेत. तपास पूर्ण झाल्यानंतरच संपूर्ण घटनाक्रम आणि त्यामागील सत्य स्पष्ट होणार असल्याचे पोलिसांकडून सांगितले जात आहे. दरम्यान, या प्रकरणातील तपास कोणत्या दिशेने पुढे जातो आणि आरोपपत्रात कोणते पुरावे मांडले जातात, याकडे सर्वांचे लक्ष लागले आहे.
