Smriti Mandhana: भारतीय महिला क्रिकेट संघाची स्टार सलामीवीर स्मृती मानधना हिने जागतिक क्रीडा पटलावर देशाचा गौरव वाढवला आहे. जगातील प्रतिष्ठित 'टाइम' (TIME) मासिकाने जाहीर केलेल्या 100 सर्वात प्रभावशाली खेळाडूंच्या विशेष यादीत स्मृती मानधनाचा समावेश करण्यात आला आहे. विशेष म्हणजे, या संपूर्ण यादीत स्थान मिळवणारी ती एकमेव भारतीय खेळाडू ठरली आहे. क्रीडा विश्वामध्ये उल्लेखनीय आणि क्रांतीकारी योगदान देणारे खेळाडू, प्रशिक्षक आणि गुंतवणूकदार यांचा या यादीत गौरव केला जातो. स्मृती मानधना सध्या इंग्लंडमध्ये असून आयसीसी (ICC) महिला टी-20 विश्वचषकात भारतीय संघाचे प्रतिनिधित्व करत आहे. भारताने आपल्या पहिल्याच सामन्यात पाकिस्तानचा मोठा पराभव केला, ज्यामध्ये मानधनाने 44 चेंडूत 68 धावांची धडाकेबाज खेळी साकारून विजयात मोलाचा वाटा उचलला. आता भारतीय संघ 17 जून रोजी होणाऱ्या दुसऱ्या सामन्यात नेदरलँड्स विरुद्ध खेळण्यासाठी सज्ज झाला आहे.
मेस्सी आणि रोनाल्डोसारख्या जागतिक दिग्गजांच्या पंक्तीत मानाचे स्थान
'टाइम' मासिकाच्या या यादीत जागतिक क्रीडा क्षेत्रातील अतिशय दिग्गज नावांचा समावेश आहे. यामध्ये अमेरिकेचा बास्केटबॉल स्टार लेब्रॉन जेम्स, फुटबॉलचे महानायक लिओनेल मेस्सी आणि ख्रिस्तियानो रोनाल्डो, टेनिस स्टार कार्लोस अल्काराझ, प्रसिद्ध गोल्फर रोरी मॅकइलरॉय आणि फिफा (FIFA) अध्यक्ष जियानी इन्फेंटिनो यांसारख्या आंतरराष्ट्रीय स्तरावरील दिग्गजांसोबत भारताच्या स्मृती मानधनाने मानाचे स्थान मिळवले आहे.
स्मृती मानधनाच्या नावावर अनेक मोठे रेकॉर्ड्स
मुंबईत जन्मलेली 29 वर्षीय डावखुरी फलंदाज स्मृती मानधना हिच्या नावावर अनेक जागतिक आणि राष्ट्रीय विक्रमांची नोंद आहे. देशांतर्गत एकदिवसीय (ODI) सामन्यात द्विशतक झळकावणारी ती पहिली भारतीय महिला खेळाडू आहे. याव्यतिरिक्त, आंतरराष्ट्रीय क्रिकेटच्या तिन्ही प्रकारांमध्ये (कसोटी, एकदिवसीय आणि टी-20) शतके झळकावण्याचा अनोखा पराक्रमही तिच्या नावावर आहे. महिला क्रिकेटमध्ये सर्वाधिक 17 आंतरराष्ट्रीय शतके ठोकण्याचा संयुक्त विक्रम तिने प्रस्थापित केला असून, एकाच कॅलेंडर वर्षात 1,000 पेक्षा जास्त एकदिवसीय धावा करणारी ती पहिली महिला क्रिकेटपटू आहे.
हेही वाचा – Vaibhav Suryavanshi: आधी मैदानात घातला राडा! आता वैभव सूर्यवंशी ICC च्या रडारवर, होणार मोठी कारवाई?
नेतृत्व आणि संघाला जेतेपद मिळवून देण्यात मोलाचे योगदान
'टाइम' मासिकाने स्मृती मानधनाच्या नेतृत्वगुणांचेही विशेष कौतुक केले आहे. वैयक्तिक विक्रमांपेक्षा संघाच्या विजयाला प्राधान्य देणाऱ्या मानधनाने आपल्या नेतृत्वाखाली रॉयल चॅलेंजर्स बंगळुरू (RCB) संघाला 2024 आणि 2026 मध्ये 'वुमेन्स प्रीमियर लीग'चे (WPL) विजेतेपद मिळवून दिले. तसेच, गेल्या वर्षी आयसीसी महिला विश्वचषक जिंकणाऱ्या भारतीय संघाची उपकर्णधार म्हणून तिने चोख भूमिका बजावली होती, ज्यामध्ये ती सर्वाधिक धावा करणाऱ्या फलंदाजांच्या यादीत दुसऱ्या स्थानावर होती.
