Sharad Pawar analyzes impact of PM Narendra Modi’s Statements : पंतप्रधान नरेंद्र मोदी यांनी नुकत्याच केलेल्या काही आवाहनांमुळे देशातील सामान्य नागरिकांपासून ते गुंतवणूकदारांपर्यंत सर्वांमध्येच अस्वस्थता निर्माण झाली आहे. पुढील 1 वर्ष सोने खरेदी टाळणे, परदेश दौरे रद्द करणे आणि पेट्रोल-डिझेलचा वापर कमी करणे अशा प्रकारची आवाहने पंतप्रधानांनी केल्याने आर्थिक वर्तुळात खळबळ उडाली आहे. या पार्श्वभूमीवर राष्ट्रवादी काँग्रेसचे अध्यक्ष शरद पवार यांनी सोशल मीडियावर एक सविस्तर पोस्ट लिहून आपली परखड भूमिका मांडली आहे. या अचानक केलेल्या घोषणांमुळे अर्थव्यवस्थेवर दूरगामी परिणाम होऊ शकतात आणि जनतेमध्ये भीतीचे वातावरण निर्माण होऊ शकते, असा इशारा पवारांनी दिला आहे.
सर्वपक्षीय बैठकीची आग्रही मागणी
पवार यांनी या विषयाचे गांभीर्य लक्षात घेऊन केंद्र सरकारने तातडीने पावले उचलावीत, असे सुचवले आहे. राष्ट्रीय हिताच्या अशा मोठ्या प्रश्नांवर निर्णय घेताना केवळ एकाधिकारशाही न वापरता सर्व राजकीय पक्षांच्या नेत्यांना विश्वासात घेणे आवश्यक असल्याचे त्यांनी म्हटले आहे. “पंतप्रधानांनी स्वतःच्या अध्यक्षतेखाली तातडीने एक सर्वपक्षीय बैठक आयोजित करावी,” अशी मागणी शरद पवारांनी केली आहे. अशा कठीण परिस्थितीत सर्वांना सोबत घेऊन चालणेच देशाच्या हिताचे ठरेल, असा विश्वास त्यांनी व्यक्त केला आहे.
मध्यपूर्वेतील अस्थिर आणि युद्धजन्य परिस्थितीच्या पार्श्वभूमीवर देशाचे प्रधानमंत्री नरेंद्रजी मोदी (@narendramodi) यांनी दोन दिवसांपूर्वी काही घोषणा केल्या. त्यांचा देशाच्या अर्थव्यवस्थेवर दूरगामी परिणाम होण्याची शक्यता आहे. या घोषणा अचानक करण्यात आल्याने सर्वसामान्य नागरिक,… — Sharad Pawar (@PawarSpeaks) May 12, 2026
हेही वाचा – Raj Thackeray: ‘चुका तुमच्या, भुर्दंड जनतेला का?’ मोदींच्या काटकसरीच्या आवाहनावर राज ठाकरेंचा बेधडक सवाल
अर्थतज्ज्ञ आणि उद्योजकांशी चर्चेचा सल्ला
आंतरराष्ट्रीय स्तरावरील युद्धजन्य परिस्थिती आणि पश्चिम आशियातील अस्थिरता पाहता सरकारने अधिक संवेदनशीलता दाखवणे गरजेचे असल्याचे पवारांनी म्हटले आहे. केवळ राजकीय नेत्यांशीच नव्हे, तर देशातील नामवंत अर्थतज्ज्ञ आणि उद्योग क्षेत्रातील प्रतिनिधींचीही बैठक बोलवावी, असा सल्ला त्यांनी दिला आहे. परिस्थितीचा सखोल आढावा घेऊन भविष्यातील धोरणांबाबत व्यापक विचारविनिमय होणे आवश्यक आहे. सरकारचे सर्वोच्च प्राधान्य हे जनतेमध्ये विश्वास आणि स्थैर्य निर्माण करणे हेच असले पाहिजे, अशी ठाम भूमिका त्यांनी मांडली आहे.
आवाहनांमागचे आर्थिक संदर्भ
पंतप्रधानांच्या या आवाहनामागे इंधन तुटवडा आणि जागतिक बाजारपेठेतील अस्थिरता ही प्रमुख कारणे असल्याचे सांगितले जात आहे. डेस्टिनेशन वेडिंग टाळण्यापासून ते खाद्यतेलाचा वापर मर्यादित करण्यापर्यंतचे सल्ले मोदींनी दिले आहेत. मात्र, अशा विधानांमुळे सामान्य नागरिकांमध्ये संभ्रम वाढला असून विरोधकांनी यावरून सरकारला धारेवर धरले आहे. शरद पवारांनी या संपूर्ण वादाला अर्थशास्त्रीय आणि लोकशाहीवादी वळण देत चर्चेद्वारे मार्ग काढण्याची विनंती केली आहे.
हेही वाचा – Cannes Film Festival: पंतप्रधान मोदींच्या निर्णयाचा फटका ‘Cannes Film Festival’ला, घेतला मोठा निर्णय
