Gold Silver Price Today: जागतिक पातळीवर अमेरिका आणि इराण यांच्यात पुन्हा एकदा राजकीय तणाव निर्माण झाल्याचे पाहायला मिळत आहे. या आंतरराष्ट्रीय घडामोडींचा थेट परिणाम आता सराफा बाजारावर झाला असून, सोने आणि चांदीच्या दरात मोठी घसरण नोंदवली गेली आहे. जागतिक बाजारातील घडामोडींमुळे गुंतवणूकदारांनी सुरक्षित गुंतवणूक म्हणून सोन्याकडे पाठ फिरवल्याने सोन्याच्या दरात प्रति तोळा 2000 रुपयांची घट झाली आहे. तर दुसरीकडे, औद्योगिक मागणीवर परिणाम झाल्यामुळे चांदीच्या दरात अवघ्या दोन दिवसांत तब्बल 10,000 रुपयांची मोठी घसरण झाली आहे. या घसरणीमुळे लग्नकार्यासाठी खरेदी करणाऱ्या ग्राहकांना मोठा दिलासा मिळाला आहे.
सोन्याचे दर 1 लाख 53 हजार रुपयांवर
या ताज्या घसरणीनंतर सराफा बाजारात सोन्याचे दर आता प्रति तोळा 1,53,000 रुपयांवर आले आहेत. तर दुसरीकडे, ग्राहकांना यावर 3 टक्के वस्तू आणि सेवा कर (GST) मोजावा लागत असल्याने, जीएसटीसह सोन्याचा अंतिम दर आता 1,57,000 रुपयांवर पोहोचला आहे. आंतरराष्ट्रीय बाजारातील अनिश्चिततेमुळे सोन्याच्या दरात पुढील काही दिवस असाच चढ-उतार पाहायला मिळू शकतो, असा अंदाज बाजार तज्ज्ञांनी व्यक्त केला आहे.
हेही वाचा – RBI New Rules 2026: कर्जदारांना मोठा दिलासा! RBI ने ग्राहकांच्या हितासाठी जारी केले 5 कडक नियम
चांदीच्या दरात मोठी पडझड
सोन्यापेक्षाही चांदीच्या दरातील घसरण अधिक तीव्र असल्याचे दिसून आले आहे. दोन दिवसांतील 10,000 रुपयांच्या घसरणीनंतर चांदीचा प्रति किलोचा दर आता 2,65,000 रुपयांवर खाली आला आहे. तर जीएसटीसह (GST) नवीन दरांचा विचार केला, तर ग्राहकांसाठी चांदीचा भाव आता 2,72,000 रुपये प्रति किलो इतका झाला आहे. अमेरिका आणि इराणमधील वाद आणखी चिघळल्यास किंवा जागतिक शेअर बाजारात पडझड झाल्यास या मौल्यवान धातूंच्या किंमतींवर आणखी परिणाम होण्याची शक्यता वर्तवली जात आहे.
