Maharashtra Monsoon Casualties: राज्यात कोसळत असलेल्या मुसळधार पावसामुळे राज्यात भीषण परिस्थिती निर्माण झाली आहे. गेल्या 3 ते 4 दिवसांपासून सुरू असलेल्या या महावृष्टीमुळे अनेक घरांमध्ये आणि रस्त्यांवर पाणी साचले असून जनजीवन पूर्णपणे विस्कळीत झाले आहे. या पावसाच्या दणक्यामुळे राज्यात वेगवेगळ्या ठिकाणी घडलेल्या दुर्घटनांमध्ये आत्तापर्यंत 9 जणांना आपले प्राण गमवावे लागले असून, 4 जण गंभीर जखमी झाले आहेत. यामध्ये प्रामुख्याने भिंत कोसळल्याने 8 जणांचा, तर झाड अंगावर पडल्याने 1 व्यक्तीचा मृत्यू झाला आहे.
मानखुर्दमध्ये भीषण दुर्घटना; 6 जणांचा ढिगाऱ्याखाली मृत्यू
मुंबईतील मानखुर्द परिसरामध्ये एक अत्यंत दुर्दैवी घटना घडली आहे. येथील एका अत्यंत धोकादायक झालेल्या 3 मजली चाळीचा भाग कोसळल्याने मोठी दुर्घटना झाली. ही चाळ रिकामी करण्यासाठी रहिवासी घरातील सामान आवरत असतानाच अचानक ही इमारत पत्त्यासारखी कोसळली. या दुर्घटनेत ढिगाऱ्याखाली गाडले गेल्याने 5 लहान मुले आणि 1 महिलेसह एकूण 6 जणांचा जागीच मृत्यू झाला. या प्रकरणी निष्काळजीपणाचा ठपका ठेवत मानखुर्द पोलीस ठाण्यात गु.र.क्र. 425/2026 अन्वये गुन्हा नोंदवण्यात आला असून, पोलिसांनी 2 आरोपींना अटक केली आहे. याव्यतिरिक्त मुंबई उपनगरात 1, पुण्यात 1 आणि ठाण्यात 1 अशा इतर ठिकाणी भिंत कोसळून मृत्यूच्या नोंदी झाल्या आहेत.
पालघरमध्ये नद्यांना पूर; वैतरणा आणि तानसाने ओलांडली धोक्याची पातळी
पालघर जिल्ह्यात मुसळधार पावसामुळे जलप्रलयाची स्थिती आहे. जिल्ह्यातील वैतरणा, तानसा, सूर्या, देहेरजा आणि पिंजाळ या सर्वच प्रमुख नद्यांना प्रचंड पूर आला आहे. तानसा नदीने आधीच धोक्याची पातळी ओलांडली असून, वैतरणा नदी देखील इशारा पातळीच्या वर वाहत आहे. पूरपरिस्थिती एवढी गंभीर आहे की, नदीकाठच्या गावांमध्ये पाणी शिरण्यास सुरुवात झाली आहे. त्यामुळे जिल्हा प्रशासनाने किनारपट्टीवरील आणि नदीकाठच्या सर्व गावांना सुरक्षित स्थळी जाण्याचा व सतर्क राहण्याचा इशारा दिला आहे.
इंद्रायणी नदीच्या पुरामुळे वारीच्या नियोजनात बदल; मुख्यमंत्र्यांचे वारकऱ्यांना आवाहन
पुणे जिल्ह्यातील आळंदी परिसरात सध्या रिमझिम पाऊस सुरू असला तरी संततधारेमुळे इंद्रायणी नदीला मोठा पूर आला आहे. आळंदीतील मंदिर परिसरात पूरपाणी साचले आहे. संत ज्ञानेश्वर महाराज आणि संत तुकाराम महाराज यांच्या पालख्यांचे पंढरपूरकडे प्रस्थान होणार असल्याने आळंदीत हजारो वारकरी विसावले आहेत. परिस्थितीचे गांभीर्य ओळखून प्रशासनाने भाविकांना घाट परिसरात न जाण्याचा कडक इशारा दिला आहे. तसेच, मुख्यमंत्री देवेंद्र फडणवीस यांनीही एक विशेष आवाहन केले असून, अद्याप आळंदी किंवा देहूच्या दिशेने निघालेल्या वारकऱ्यांनी तेथे न जाता थेट पुण्यातूनच या वारीत सामील व्हावे, जेणेकरून गर्दी आणि पुराचा धोका टाळता येईल.
