Rahul-Priyanka Gandhi Meet Nitin Gadkari: लोकसभेतील विरोधी पक्षनेते राहुल गांधी आणि काँग्रेस नेत्या प्रियांका गांधी वाड्रा यांनी बुधवारी संसद भवनात केंद्रीय रस्ते वाहतूक मंत्री नितीन गडकरी यांची अचानक भेट घेतली. ही भेट प्रामुख्याने राजस्थानमधील बस आणि ट्रक बॉडी उत्पादकांच्या समस्यां संदर्भात होती. या उत्पादकांच्या एका शिष्टमंडळाने सकाळी राहुल गांधींची भेट घेऊन आपल्या व्यवसायावर परिणाम करणाऱ्या धोरणात्मक आव्हानांची माहिती दिली होती. त्यानंतर, या समस्यांवर तातडीने तोडगा काढण्यासाठी राहुल आणि प्रियांका गांधी या शिष्टमंडळाला सोबत घेऊन थेट गडकरींच्या भेटीला गेले.
नव्या नियमावलीवर झाली सविस्तर चर्चा
काही मिनिटे चाललेल्या या बैठकीदरम्यान, बॉडी निर्मिती उद्योगाशी संबंधित तांत्रिक मुद्दे आणि सरकारी नियमावलीतील संभाव्य बदलांवर सविस्तर चर्चा करण्यात आली. नवीन नियमांमुळे या व्यवसायासमोर उभ्या राहिलेल्या अडचणी आणि त्याचा व्यावसायिक कामकाजावर होणारा परिणाम राहुल गांधींनी गडकरींच्या निदर्शनास आणून दिला. या भेटीत राजकीय मतभेद बाजूला सारून जनसामान्यांच्या आणि व्यावसायिकांच्या प्रश्नांवर लक्ष केंद्रित करण्यात आले.
संसद हे 'मुक्त विद्यापीठ'; पंतप्रधानांकडून निवृत्त खासदारांना निरोप
दुसरीकडे, एप्रिल ते जुलै 2026 या कालावधीत राज्यसभेतून निवृत्त होणाऱ्या 59 खासदारांना बुधवारी सभागृहात निरोप देण्यात आला. यावेळी पंतप्रधान नरेंद्र मोदी यांनी संसदेचे वर्णन एक 'मुक्त विद्यापीठ' (Open University) असे केले. निवृत्त होणाऱ्या सदस्यांना संबोधित करताना पंतप्रधान म्हणाले की, राजकारणात कधीही 'पूर्णविराम' (Full Stop) नसतो. त्यांनी खासदारांना आवाहन केले की, सभागृहाबाहेरही त्यांनी राष्ट्रीय जीवनात आपले योगदान सुरू ठेवावे, कारण त्यांचा अनुभव देशासाठी अत्यंत मोलाचा आहे.
ज्येष्ठ नेत्यांच्या योगदानाचे विशेष कौतुक
पंतप्रधानांनी आपल्या भाषणात माजी पंतप्रधान एच.डी. देवेगौडा, विरोधी पक्षनेते मल्लिकार्जुन खर्गे आणि राष्ट्रवादी काँग्रेसचे अध्यक्ष शरद पवार या तीन ज्येष्ठ नेत्यांचा विशेष गौरव केला. या नेत्यांनी आपल्या आयुष्यातील अर्ध्याहून अधिक काळ संसदीय लोकशाही बळकट करण्यासाठी समर्पित केला असून, ते भारतीय राजकारणाचे भक्कम 'स्तंभ' असल्याचे मोदींनी नमूद केले. पक्षीय राजकारणाच्या पलीकडे जाऊन सर्व सदस्यांनी या निरोप समारंभात एकमेकांप्रती आदर व्यक्त केला.
