Pakistani Fairness Cream in Chhatrapati Sambhajinagar : छत्रपती संभाजीनगरमध्ये केवळ सौंदर्याच्या हव्यासापोटी नागरिकांच्या आरोग्याशी खेळ सुरू असल्याचा धक्कादायक प्रकार समोर आला आहे. शहरात बंदी असलेल्या पाकिस्तानी सौंदर्य प्रसाधनांची सर्रास विक्री होत असल्याची माहिती मिळताच सिटी चौक पोलिसांनी मोठी कारवाई केली. या कारवाईत पोलिसांनी 'शहागंज', 'घासमंडी' आणि 'सिटी सेंटर मॉल' परिसरातील दुकानांवर छापे टाकून लाखो रुपयांचा माल जप्त केला असून तिघांना अटक केली आहे.
पोलिसांची कारवाई आणि जप्त केलेला मुद्देमाल
छत्रपती संभाजीनगर पोलिसांनी 'हायलाईट कलेक्शन', 'ओम ट्रेडर्स' आणि 'फलक इम्पोरियम' या दुकानांवर छापे टाकून एकूण 59,980 रुपयांची बंदी असलेली उत्पादने जप्त केली आहेत. यामध्ये मल्लिका, झलक, गोरी, गोल्डन पर्ल, चांदणी, उजूबा, फेस फ्रेश, नूर हर्बल आणि न्यू फेस ब्युटी क्रीम यांसारख्या विविध क्रीम्सचा समावेश आहे. यासोबतच पारले गोल्ड, गोरी साबण आणि मल्लिका व्हिटॅमिन-C सिरम देखील हस्तगत करण्यात आले आहेत. पोलिसांनी या प्रकरणी 3 जणांना ताब्यात घेतले असून, काळ्याबाजारात ही उत्पादने कोठून येत आहेत याचा तपास सुरू केला आहे.
बंदी असलेली घातक उत्पादने आणि बनावट क्रीम्स
पाकिस्तानातून आयात होणारी ही सौंदर्य प्रसाधने भारतात पूर्णपणे प्रतिबंधित आहेत. या क्रीम्समध्ये पारा (Mercury) आणि स्टिरॉइड्सचे प्रमाण प्रमाणाबाहेर असल्याने त्या त्वचेसाठी अत्यंत घातक मानल्या जातात. पाकिस्तानमधील अनेक स्थानिक कंपन्या कोणताही वैद्यकीय निकष न पाळता ही उत्पादने तयार करतात. या क्रीम्सचा वापर केल्यामुळे सुरुवातीला त्वचा गोरी दिसत असली, तरी त्याचे दीर्घकालीन परिणाम अत्यंत भयानक असतात. आंतरराष्ट्रीय स्तरावरही अशा उत्पादनांच्या विक्रीवर अनेकदा निर्बंध लादले गेले आहेत. विशेष म्हणजे, ही सौंदर्य उत्पादने ऑनलाईनसुद्धा उपलब्ध आहेत.
हेही वाचा – Rohit Pawar: "भोंदू खरातला संवपले जाणार?" फेसबुक पोस्टद्वारे प्रश्न विचारात रोहित पवारांनी व्यक्त केली शंका
आरोग्यावर होणारे गंभीर परिणाम आणि तज्ज्ञांचा सल्ला
तज्ज्ञ डॉक्टरांच्या मते, या विषारी क्रीम्समुळे त्वचेचे आजार होत आहेत. शिवाय, त्यातील घातक रसायने रक्ताद्वारे शरीरात शिरून थेट किडनीवर (मूत्रपिंड) परिणाम करतात. अनेक तरुण-तरुणींनी या क्रीम्सच्या वापरामुळे आरोग्य बिघडल्याच्या तक्रारी केल्या आहेत. डॉक्टर सांगतात की, अशा क्रीम्स वापरून कायमस्वरूपी गोरे होता येत नाही. उलट, यामुळे त्वचा कायमची खराब होऊ शकते आणि किडनी निकामी होण्याचा धोका वाढतो. सौंदर्यापेक्षा आरोग्याला प्राधान्य देणे आता काळाची गरज बनली आहे.
प्रशासकीय आव्हान आणि जनजागृती
सरकारची बंदी आणि पोलिसांची सततची कारवाई असूनही शहरात या उत्पादनांचा काळाबाजार सुरूच आहे, हे प्रशासनासमोर मोठे आव्हान आहे. स्वस्त आणि लवकर निकाल देणाऱ्या उत्पादनांकडे नागरिक आकर्षित होतात, ज्याचा फायदा विक्रेते घेतात. अशा उत्पादनांवर विश्वास न ठेवण्याचे आवाहन पोलिसांनी केले आहे. नागरिकांनी स्वतःच्या आरोग्याशी खेळू नये आणि केवळ अधिकृत व डॉक्टरांनी प्रमाणित केलेली उत्पादनेच वापरावीत, असा सल्ला दिला जात आहे.
हेही वाचा – Eknath Khadse: कागदपत्रांत खाडाखोड आणि वतन जमिनीचा पेच; एकनाथ खडसेंनी फेटाळले आरोप, काय आहे नेमकं प्रकरण?
