Maval Patan Village: मावळ तालुक्यातील मळवलीजवळील पाटण गावावर आलेले संकट संपण्याआधीच आणखी एका धक्कादायक घटनेने गावकऱ्यांचे हाल वाढवले आहेत. काही दिवसांपूर्वी झालेल्या मुसळधार पावसामुळे डोंगराचा भाग कोसळून एका कुटुंबातील 3 जणांचा मृत्यू झाला होता. या दुर्घटनेनंतर प्रशासनाने खबरदारीचा उपाय म्हणून ग्रामस्थांना तात्पुरते सुरक्षित ठिकाणी स्थलांतर करण्याच्या सूचना दिल्या होत्या. त्यामुळे अनेकांनी आपली घरे बंद करून नातेवाईकांकडे आश्रय घेतला. याच संधीचा फायदा घेत अज्ञात चोरट्यांनी गावातील 19 बंद घरांमध्ये घुसून मोठ्या प्रमाणात चोरी केली.
रोख रक्कम, दागिने आणि मौल्यवान वस्तूंवर चोरट्यांचा डल्ला
गुरुवारी मध्यरात्रीच्या सुमारास चोरट्यांनी अनेक घरांची कुलपे आणि दरवाज्यांच्या कड्या तोडून आत प्रवेश केला. घरांमध्ये ठेवलेली रोख रक्कम, सोन्या-चांदीचे दागिने तसेच विविध मौल्यवान घरगुती वस्तू घेऊन चोरटे पसार झाले. एकाच वेळी इतक्या घरांमध्ये चोरी झाल्याने संपूर्ण गावात भीतीचे वातावरण निर्माण झाले असून या प्रकारामुळे नागरिकांमध्ये तीव्र संताप व्यक्त केला जात आहे.
दरड, मनुष्यहानी आणि पाणीटंचाई; गावासमोर संकटांची मालिका
विसापूर किल्ल्याच्या परिसरातील पाटण गाव आधीच नैसर्गिक आपत्तीचा मोठा फटका सहन करत आहे. 6 जुलै रोजी झालेल्या दरड दुर्घटनेत जीवितहानीसोबतच अनेक घरांचे आणि वाहनांचे नुकसान झाले. याशिवाय गावाला पाणीपुरवठा करणारी मुख्य जलवाहिनीही दरडीमुळे तुटल्याने पिण्याच्या पाण्याची गंभीर समस्या निर्माण झाली आहे. अशा परिस्थितीत गाव रिकामे झाल्यानंतर चोरीची घटना घडल्याने ग्रामस्थांवरील संकट अधिकच गडद झाले आहे.
सुरक्षेच्या प्रश्नावर प्रशासनाला ग्रामस्थांचा थेट सवाल
चोरीची माहिती मिळताच स्थलांतरित ग्रामस्थांनी तातडीने गावात धाव घेतली. घरांचे उघडे दरवाजे आणि अस्ताव्यस्त पडलेले सामान पाहून अनेकांना मोठा धक्का बसला. प्रशासनाने गाव रिकामे करण्याचे आदेश दिल्यानंतर नागरिकांच्या मालमत्तेच्या सुरक्षेची जबाबदारी कोणी घ्यायची, असा सवाल ग्रामस्थांनी उपस्थित केला आहे. गावात पोलिसांचा पुरेसा बंदोबस्त असता तर ही घटना टाळता आली असती, अशी नाराजीही त्यांनी व्यक्त केली.
हेही वाचा – Nagpur Missing Family : नागपुरातून गायब झालेले ते कुटुंब अखेर 10 दिवसांनी सापडलं; धक्कादायक कारण आलं समोर
भरपाई, पोलीस बंदोबस्त आणि पुनर्वसनाची मागणी
या घटनेनंतर ग्रामस्थांनी चोरीच्या सर्व प्रकरणांचा तातडीने पंचनामा करून नुकसानभरपाई देण्याची मागणी केली आहे. तसेच चोरी करणाऱ्यांचा त्वरित शोध घेऊन कठोर कारवाई करावी, गावात 24 तास पोलीस गस्त ठेवावी आणि परिस्थिती सामान्य होईपर्यंत सुरक्षा वाढवावी, अशी मागणी करण्यात आली आहे. यासोबतच पाणी, वीज, रस्ते यांसारख्या मूलभूत सुविधा पूर्ववत करण्याबरोबरच आपत्तीग्रस्त गावाच्या पुनर्वसनाची प्रक्रिया वेगाने राबवावी, अशीही मागणी ग्रामस्थांकडून करण्यात येत आहे.
