Pune School Timings: पुणे शहरातील सर्व प्राथमिक शाळांच्या व्यवस्थापनाबाबत एक अत्यंत महत्त्वाची बातमी समोर आली आहे. भारत निवडणूक आयोगाच्या राष्ट्रीय कर्तव्यासाठी शिक्षकांना पुरेसा वेळ उपलब्ध करून देणे आणि विद्यार्थ्यांचे शैक्षणिक नुकसान टाळणे, या दुहेरी उद्देशाने पुणे महानगरपालिकेच्या प्राथमिक शिक्षण विभागाने शाळांच्या वेळेत मोठा बदल केला आहे. महानगरपालिका क्षेत्रात येणाऱ्या सर्व माध्यमांच्या, मनपाच्या आणि खाजगी प्राथमिक शाळांसाठी हा नवा नियम लागू करण्यात आला आहे. शाळांच्या वेळेतील हा तात्पुरता बदल 1 जुलै ते 31 ऑगस्ट 2026 या दोन महिन्यांच्या कालावधीसाठी असणार आहे.
पुणे महानगरपालिकेने जारी केलेल्या अधिकृत परिपत्रकानुसार, सुधारित वेळापत्रकानुसार आता शाळा सकाळी 7.00 वाजता सुरू होतील आणि दुपारी 12.15 वाजता सुटतील. या संदर्भात पुणे महापालिकेच्या प्राथमिक शिक्षण विभागाच्या प्रशासकीय अधिकारी सुनंदा वाखारे आणि उप आयुक्त वसुंधरा बारवे यांनी शहरातील सर्व मनपा व खाजगी प्राथमिक शाळांच्या मुख्याध्यापकांना कडक निर्देश दिले आहेत. शाळांच्या वेळेत झालेल्या या बदलाची माहिती तातडीने आणि गांभीर्याने पालकांपर्यंत पोहोचवावी, जेणेकरून विद्यार्थ्यांची किंवा पालकांची कोणतीही गैरसोय होणार नाही, असे प्रशासनाने स्पष्ट केले आहे.
आगामी निवडणुकांच्या पार्श्वभूमीवर 'बीएलओ' मोहिमेसाठी निर्णय
भारत निवडणूक आयोगाने 14 मे 2026 रोजी महाराष्ट्रासह देशातील 16 राज्ये आणि 3 केंद्रशासित प्रदेशांमध्ये मतदार याद्यांच्या विशेष सखोल पुनरीक्षणाचा (SIR) कार्यक्रम जाहीर केला आहे. आगामी विधानसभा निवडणुका पारदर्शक आणि त्रुटीरहित पार पाडण्यासाठी शिक्षकांची भूमिका 'मतदान केंद्रस्तरीय अधिकारी' (BLO) म्हणून अतिशय महत्त्वाची असते. शिक्षकांना त्यांचे शैक्षणिक कर्तव्य सांभाळून हे राष्ट्रीय काम योग्य पद्धतीने करता यावे, यासाठी मुख्य निवडणूक अधिकाऱ्यांच्या पत्राचा संदर्भ घेऊन आणि अतिरिक्त महापालिका आयुक्तांच्या मंजुरीने हा निर्णय घेण्यात आला आहे.
शैक्षणिक नुकसान टाळण्यासाठी सुट्टीऐवजी वेळेत कपात
यापूर्वी राज्यात पावसाच्या पार्श्वभूमीवर पालघर सारख्या काही जिल्ह्यांमध्ये शाळांना सुट्ट्या जाहीर करण्यात आल्या आहेत. पुण्यात मात्र शाळांना थेट सुट्टी न देता, शिक्षकांना शाळा सुटल्यानंतर आणि सुट्टीच्या दिवशी मतदार याद्यांचे काम पूर्ण करता यावे, अशी व्यवस्था करण्यात आली आहे. शिक्षकांना संपूर्ण वेळेसाठी बीएलओ म्हणून नियुक्त न करता, शाळा लवकर सोडून उर्वरित वेळेत त्यांच्याकडून हे काम करून घेतले जाणार आहे. हा विशेष नियम 31 ऑगस्ट 2026 पर्यंत लागू राहील आणि त्यानंतर शाळा पूर्ववत सुरू होतील.
