Sakib Hussain: इंडियन प्रीमियर लीगच्या (IPL) यंदाच्या हंगामात सोमवार, 13 एप्रिल हा दिवस दोन नव्या दमाच्या खेळाडूंसाठी ऐतिहासिक ठरला. विशेषतः बिहारच्या एका अत्यंत गरीब कुटुंबातून आलेल्या साकिब हुसैनने आपल्या गोलंदाजीने क्रिकेट विश्वाचे लक्ष वेधून घेतले. एकेकाळी पायात चप्पल नसलेल्या साकिबने आपल्या संघर्षाचे रूपांतर यशात करत आयपीएलच्या मैदानात आपली चमक दाखवली.
संघर्षातून साकिबचा देदीप्यमान प्रवास
साकिब हुसैनचा इथपर्यंतचा प्रवास थक्क करणारा आहे. त्याचे वडील कुटुंबाच्या उदरनिर्वाहासाठी शेतात मोलमजुरी करायचे. आर्थिक परिस्थिती अत्यंत हलाखीची असतानाही साकिबने हार मानली नाही. आज त्याने केवळ स्वतःचेच नव्हे, तर आपल्या कुटुंबाचे नाव जगभरात मोठे केले आहे. साकिबला जेव्हा आयपीएलमध्ये पदार्पणाची संधी मिळाली, तेव्हा त्याने या संधीचे सोने करत आपली प्रतिभा सिद्ध केली.
राजस्थान रॉयल्सच्या विजयरथाला लावला लगाम
साकिबने आपल्या पहिल्याच सामन्यात चार बळी घेत सनरायझर्स हैदराबादच्या (SRH) विजयात मोलाचा वाटा उचलला. विशेष म्हणजे, त्याने अशा वेळी ही कामगिरी केली जेव्हा राजस्थान रॉयल्सचा संघ सलग चार विजय मिळवून फॉर्मात होता. राजस्थानची फलंदाजी अत्यंत घातक मानली जात असताना, साकिबने त्यांच्या फलंदाजांना पूर्णपणे जखडून ठेवले. दीर्घकाळ प्रतीक्षा केल्यानंतर मैदानात उतरून इतकी अचूक गोलंदाजी करणे साकिबसाठी सोपे नव्हते, पण त्याने हे आव्हान यशस्वीपणे पेलले.
मराठमोळ्या प्रफुल्ल हिंगेची साथ आणि हैदराबादचा विजय
या सामन्यात साकिबला महाराष्ट्राच्या प्रफुल्ल हिंगेची उत्तम साथ लाभली. प्रफुल्लनेही आपल्या पहिल्याच षटकात विकेट घेत खळबळ उडवून दिली होती. या दोन्ही युवा वेगवान गोलंदाजांनी प्रत्येकी चार गडी बाद करत राजस्थानच्या फलंदाजीचे कंबरडे मोडले. या दोघांच्या सांघिक कामगिरीमुळेच सनरायझर्स हैदराबादला चालू हंगामातील आपला दुसरा विजय नोंदवता आला. बिहार आणि महाराष्ट्राच्या या दोन शिलेदारांच्या कामगिरीचे सध्या सर्वत्र कौतुक होत आहे.
