Budget 2026 Date And Time: संपूर्ण देशाचे लक्ष लागून राहिलेला 'केंद्रीय अर्थसंकल्प 2026' आता अवघ्या काही तासांवर येऊन ठेपला आहे. केंद्रीय अर्थमंत्री निर्मला सीतारमण 1 फेब्रुवारी 2026 रोजी संसदेत आपला सलग 9 वा अर्थसंकल्प सादर करतील. विशेष म्हणजे, भारताच्या संसदीय इतिहासात पहिल्यांदाच रविवारी अर्थसंकल्प सादर केला जाणार असून, या ऐतिहासिक क्षणाकडे संपूर्ण आर्थिक विश्वाचे लक्ष लागले आहे.
बजेट 2026: वेळ आणि स्वरूप
2017 पासून अर्थसंकल्प फेब्रुवारीच्या पहिल्या दिवशी सादर करण्याची परंपरा सुरू झाली, जी यंदाही कायम राखली जात आहे. 1 फेब्रुवारी 2026 रोजी सकाळी 11:00 वाजता अर्थमंत्र्यांच्या भाषणाला संसदेत सुरुवात होईल. साप्ताहिक सुट्टीचा दिवस असूनही संसदेचे कामकाज या दिवशी सुरू राहणार आहे.
यंदाच्या बजेटकडून काय आहेत अपेक्षा?
जागतिक पातळीवर सुरू असलेल्या आर्थिक अस्थिरतेच्या पार्श्वभूमीवर, भारतीय अर्थव्यवस्थेला उभारी देण्यासाठी सरकार काही धाडसी निर्णय घेण्याची शक्यता वर्तवण्यात येत आहे. पगारदार वर्ग यंदा 'स्टँडर्ड डिडक्शन'च्या मर्यादेत वाढ होण्याची आणि GST दरांमध्ये कपातीची मोठी आस लावून बसला आहे. अर्थसंकल्पात वस्तू आणि सेवा कर (GST) अधिक सुटसुटीत करणे आणि सीमाशुल्क प्रणालीत (Customs) बदल करण्यावर सरकारचा भर असू शकतो. देशाचे कर्ज आणि जीडीपी (GDP) गुणोत्तर संतुलित ठेवण्यासाठी अर्थमंत्री कोणत्या नव्या उपाययोजना करतात, याकडे तज्ज्ञांचे बारीक लक्ष आहे.
हेही वाचा – Gold Price : दुष्काळात तेरावा…, ऐन लग्नसराईत सोन्याने उच्चांक गाठला; आजचे दर किती?
लाईव्ह प्रक्षेपण आणि डिजिटल अपडेट्स
तुम्ही या अर्थसंकल्पाचे थेट सादरीकरण दूरदर्शन (DD News), केंद्र सरकारचे अधिकृत युट्यूब चॅनेल आणि सर्व प्रमुख खासगी वृत्तवाहिन्यांवर पाहू शकता. तसेच 'मिंट' (Mint) सारख्या आर्थिक पोर्टल्सवर हिंदी आणि इंग्रजीमध्ये लाईव्ह अपडेट्स उपलब्ध असतील.
डिजिटल बजेट: पीडीएफ (PDF) कशी मिळवाल?
अर्थमंत्र्यांचे भाषण संपल्यानंतर काही वेळातच संपूर्ण अर्थसंकल्पीय दस्तऐवज डिजिटल स्वरूपात उपलब्ध करून दिले जातात. नागरिक indiabudget.gov.in या अधिकृत वेबसाईटवरून माहिती डाऊनलोड करू शकतात. तसेच सरकारच्या 'Union Budget Mobile App' वर देखील अर्थसंकल्पातील महत्त्वाचे मुद्दे आणि भाषणाची प्रत पीडीएफ स्वरूपात सहज उपलब्ध होईल.
