NEET UG 2026: NEET (UG) 2026 च्या पेपरफुटीच्या वादामुळे देशभरातील विद्यार्थ्यांमध्ये संतापाचे वातावरण असताना, केंद्रीय शिक्षणमंत्री धर्मेंद्र प्रधान यांनी शुक्रवारी एक महत्त्वाची पत्रकार परिषद घेतली. यावेळी त्यांनी विद्यार्थ्यांचे हित जोपासणे ही सरकारची सर्वोच्च प्राथमिकता असल्याचे सांगत, पुढच्या वर्षापासून NEET परीक्षेच्या स्वरूपात मोठा बदल करण्याची घोषणा केली. “पुढच्या वर्षापासून NEET परीक्षा OMR शीटवर न होता संगणकावर आधारित (Computer-based) असेल,” असं त्यांनी स्पष्ट केलं. या बदलामुळे परीक्षेतील पारदर्शकता वाढेल आणि मानवी हस्तक्षेपाची शक्यता कमी होईल, असा विश्वास त्यांनी व्यक्त केला.
पुनर्परीक्षेचे नियोजन आणि विद्यार्थ्यांसाठी सुविधा
रद्द झालेली NEET-UG परीक्षा आता 21 जून रोजी घेतली जाणार असून, त्यासाठीच्या प्रशासकीय तयारीची माहितीही मंत्र्यांनी दिली. या पुनर्परीक्षेसाठी विद्यार्थ्यांना त्यांच्या पसंतीचे परीक्षा शहर निवडण्यासाठी 1 आठवड्याचा कालावधी दिला जाणार आहे. परीक्षेची प्रवेशपत्रे (Admit Cards) 14 जून पर्यंत जारी केली जाण्याची शक्यता आहे. विशेष म्हणजे, विद्यार्थ्यांवरील ताण कमी करण्यासाठी या परीक्षेदरम्यान त्यांना अतिरिक्त 15 मिनिटांचा वेळ वाढवून दिला जाणार आहे. अफवांवर विश्वास न ठेवण्याचे आवाहनही यावेळी करण्यात आले.
#WATCH दिल्ली: केंद्रीय शिक्षा मंत्री धर्मेंद्र प्रधान ने कहा, "अभी NTA ने NEET-UG की नई परीक्षा की तिथि की घोषणा की है। 21 जून को पुनर्परीक्षा की तारीख की घोषणा की है…छात्रों का भविष्य, उनके परिश्रम के प्रति संवेदनशीलता हमारी प्राथमिकता है। 3 मई को परीक्षा हुई थी और 7 मई को… pic.twitter.com/tC9cfRtBxc — ANI_HindiNews (@AHindinews) May 15, 2026
पेपरफुटीवर कडक कारवाई आणि सीबीआय तपास
पेपरफुटीच्या घटनेवर भाष्य करताना धर्मेंद्र प्रधान म्हणाले की, 3 मे रोजी झालेल्या परीक्षेनंतर 7 मे रोजी प्रश्नपत्रिका फुटल्याची तक्रार प्राप्त झाली होती. चौकशीअंती तक्रारीत तथ्य आढळल्याने 12 मे रोजी परीक्षा रद्द करण्याचा धाडसी निर्णय घेण्यात आला. “ही परीक्षा माफिया आणि समाजकंटकांविरुद्धच्या एका दीर्घकालीन लढ्याची सुरुवात आहे,” असे सांगत त्यांनी या प्रकरणाचा तपास सीबीआयकडे सोपवण्यात आल्याचे जाहीर केले. सीबीआयने तपासाला सुरुवात केली असून, दोषींवर अत्यंत कडक कारवाई केली जाईल, अशी ग्वाही त्यांनी दिली.
NTA कडून 21 जूनची तयारी पूर्ण
‘नॅशनल टेस्टिंग एजन्सी’ने (NTA) पुनर्परीक्षेसाठी 21 जून ही तारीख निश्चित केली आहे. 7 मे रोजी प्राप्त झालेल्या तक्रारीनुसार, एका ‘गेस पेपर’मधील प्रश्न प्रत्यक्ष परीक्षेत आल्याचे निदर्शनास आले होते. पात्र विद्यार्थ्यांवर अन्याय होऊ नये यासाठी संपूर्ण यंत्रणा कामाला लागली आहे. शिक्षणमंत्र्यांनी स्पष्ट केले की, कोणताही गैरप्रकार खपवून घेतला जाणार नाही आणि विद्यार्थ्यांचे शैक्षणिक भविष्य सुरक्षित करण्यासाठी सरकार सर्वतोपरी प्रयत्न करेल.
