Shakumbhari Siddhapeeth Flood: उत्तर प्रदेशातील सहारनपूर जिल्ह्यात स्थित, अत्यंत पूजनीय सिद्धपीठ असलेल्या श्री शाकुंभरी देवी मंदिराच्या परिसरात गुरुवारी रात्री उशिरा अचानक आलेल्या महापुराने मोठा हाहाकार माजवला. शिवालिक पर्वतरांगेत झालेल्या मुसळधार पावसानंतर, स्थानिक ओढ्यातून वेगाने वाहणाऱ्या पाण्याचा प्रचंड लोंढा खाली आला आणि अवघ्या काही मिनिटांतच मंदिर परिसर व आजूबाजूचा भाग पाण्याखाली बुडाला. या दुर्दैवी घटनेत दोन महिला भाविकांना आपला जीव गमवावा लागला असून, अनेक वाहने आणि दुकाने पाण्याचा वेगासोबत वाहून गेली आहेत.
अचानक आलेल्या लोंढ्यामुळे भाविकांमध्ये घबराट
प्रत्यक्षदर्शींच्या वर्णनानुसार, भाविक मंदिर परिसरात आणि लगतच्या भागात विश्रांती घेत असतानाच, कोणत्याही पूर्वसूचनेशिवाय पाण्याचा प्रचंड लोंढा आणि त्याचा भीषण आवाज ऐकून लोकांमध्ये एकच घबराट उडाली. बघता बघता पाण्याचा प्रवाह भाविकांच्या दिशेने वेगाने धावू लागला. आपला जीव वाचवण्याच्या धडपडीत, लोक महिला आणि लहान मुलांना सोबत घेऊन सुरक्षित अशा उंचावरील जागेकडे धाव घेताना दिसले. या धावपळीत अनेक ट्रॅक्टर-ट्रॉलीज, कार्स, मोटरसायकली आणि बांधकामाची यंत्रसामग्री पाण्याच्या शक्तिशाली प्रवाहामध्ये वाहून गेली.
दोन महिलांचा मृत्यू; परिसरात शोककळा
या नैसर्गिक आपत्तीत ज्या दोन महिलांचा मृत्यू झाला, त्या दोघीही पुराच्या त्या रौद्र प्रवाहाच्या थेट मार्गात सापडल्या होत्या. या दुर्दैवी घटनेनंतर त्यांचे कुटुंबीय शोकाने व्याकुळ झाले आहेत. रात्री उशिरापर्यंत मंदिर परिसरात सर्वत्र दुःखद वातावरण पसरले होते. पहाट होताच या विध्वंसाची भीषण दृश्ये समोर आली. नदीकाठावर अनेक वाहने चिखल आणि ढिगाऱ्याखाली गाडली गेलेल्या अवस्थेत आढळली.
चिखलाचे साम्राज्य आणि मोठे आर्थिक नुकसान
महापुराचे पाणी ओसरल्यानंतर भाविक आणि स्थानिक लोक चिखलात रुतलेली आपली वाहने बाहेर काढण्यासाठी तासन् तास अथक प्रयत्न करताना दिसून आले. धार्मिक प्रसाद, खेळणी आणि इतर वस्तू विकणाऱ्या अनेक लहान-मोठ्या दुकानांचे या पुरामुळे मोठ्या प्रमाणावर आर्थिक नुकसान झाले आहे. सध्या संपूर्ण मंदिर परिसर चिखल आणि ढिगाऱ्याने व्यापला आहे.
प्रशासन आणि पोलिसांकडून युद्धपातळीवर बचावकार्य
या घटनेची माहिती मिळताच जिल्हा प्रशासन आणि पोलीस दलाची पथके तातडीने घटनास्थळी दाखल झाली. प्रशासनाने स्थानिक पोलिसांच्या मदतीने युद्धपातळीवर मदत आणि बचाव कार्य सुरू केले आहे. उपस्थित अधिकाऱ्यांनी उर्वरित लोकांना तातडीने सुरक्षित ठिकाणी हलवले असून, परिस्थिती पूर्णपणे नियंत्रणात आणण्यासाठी शर्थीचे प्रयत्न सुरू आहेत.
