Mumbai Pune Expressway: महाराष्ट्रातील रस्ते पायाभूत सुविधांमध्ये ऐतिहासिक बदल घडवणाऱ्या महत्त्वाकांक्षी प्रकल्पांना केंद्र सरकारने मंजुरी दिली असून सुमारे 1.5 लाख कोटी रुपयांची गुंतवणूक होणार आहे. केंद्रीय रस्ते वाहतूक आणि महामार्ग मंत्री नितीन गडकरी यांनी या नव्या एक्सप्रेसवे नेटवर्कची घोषणा केली. या प्रकल्पांमुळे प्रवासाचा वेळ मोठ्या प्रमाणात कमी होणार असून वाहतूक कोंडी, लॉजिस्टिक्स खर्च आणि अपघातांचे प्रमाण कमी होण्याची अपेक्षा आहे.
मुंबई-पुणे एक्सप्रेसवे II, प्रवास फक्त 90 मिनिटांत
130 किलोमीटर लांबीचा आणि सुमारे 15,000 कोटी रुपये खर्चाचा मुंबई-पुणे एक्सप्रेसवे II विद्यमान एक्सप्रेसवेच्या समांतर उभारण्यात येणार आहे. या नव्या द्रुतगती महामार्गामुळे सध्या 2.5 ते 3 तास लागणारा मुंबई-पुणे प्रवास अवघ्या 90 मिनिटांत पूर्ण होईल. नितीन गडकरी यांनी सांगितले की, जेएनपीए जवळील पागोटे ते पनवेलमधील चौक यांना जोडणाऱ्या पहिल्या टप्प्याला अधिकृत मान्यता देण्यात आली आहे. विशेषतः घाट विभागातील वाहतूक कोंडीपासून मोठी दिलासा मिळणार आहे.
मुंबई ते बंगळुरू अवघ्या 5.5 तासांत
नव्या एक्सप्रेसवे नेटवर्कमुळे मुंबई-पुणे-बंगळुरू हा प्रवास फक्त 5.5 तासांत शक्य होणार आहे. यामुळे पश्चिम व दक्षिण भारतातील व्यापार, पर्यटन आणि औद्योगिक कनेक्टिव्हिटीला मोठी चालना मिळणार आहे.
पुणे-छत्रपती संभाजीनगर ग्रीनफील्ड एक्सप्रेसवे
पुणे आणि छत्रपती संभाजीनगरला जोडणारा नवीन ग्रीनफील्ड एक्सप्रेसवे सुमारे 16,318 कोटी रुपयांच्या खर्चाने उभारला जाणार आहे. या प्रकल्पामुळे दोन्ही शहरांमधील प्रवास वेळ किमान 2 तासांनी कमी होईल. या महामार्गासाठी 2 पर्यायांचा विचार सुरू आहे. एक अहिल्यानगर मार्गे आणि दुसरा बीड जिल्ह्यातील शिक्रापूर मार्गे. या एक्सप्रेसवेच्या माध्यमातून संभाजीनगर ते नागपूर प्रवासाचा वेळही 2.5 ते 3 तासांनी कमी होणार आहे.
हेही वाचा – Manikrao Kokate Health Update: माणिकराव कोकाटेंवर आज अँजिओग्राफी; पोलिसांचे पथक लीलावती रुग्णालयात दाखल
पुणे जिल्ह्यात 50 हजार कोटींची गुंतवणूक
पुणे जिल्ह्यातील रस्ते आणि वाहतूक पायाभूत सुविधांसाठी सुमारे 50,000 कोटी रुपयांची गुंतवणूक होणार आहे. स्थानिक स्वराज्य संस्थांच्या निवडणुकीनंतर 3 महिन्यांत बांधकामाला सुरुवात होण्याची शक्यता आहे. यामध्ये तळेगाव–चाकण–शिक्रापूर उन्नत कॉरिडॉरचा समावेश असून, 4,207 कोटी रुपयांच्या या प्रकल्पात रस्ते, उड्डाणपूल आणि मेट्रो लाईनचा समावेश असेल.
हडपसर-यवत उन्नत रस्ता आणि बंदर कनेक्टिव्हिटी
दरम्यान, हडपसर-यवत उन्नत रस्ता सध्या डीपीआर टप्प्यात असून निवडणुकीनंतर काम सुरू होणार आहे. तसेच मालवाहतूक सुलभ करण्यासाठी एनएचएआयकडून मोरबे आणि कळंबोली यांना जोडणारा 15 किलोमीटरचा लिंक रोड विकसित करण्यात येणार आहे. हा रस्ता दिल्ली-मुंबई एक्सप्रेसवे थेट जेएनपीए बंदराशी जोडेल. दिल्ली-मुंबई एक्सप्रेसवेचा महाराष्ट्रातील भाग 2026 पर्यंत पूर्ण होणार असून सुमारे 9,000 कोटी रुपये खर्चाच्या या प्रकल्पामुळे लॉजिस्टिक्स आणि उद्योग क्षेत्राला मोठा फायदा होणार आहे. एकूणच, या नव्या एक्सप्रेसवे प्रकल्पांमुळे महाराष्ट्रातील प्रवास अधिक वेगवान, सुरक्षित आणि सोयीस्कर होणार असून राज्याच्या आर्थिक विकासाला नवे बळ मिळणार आहे.
