MSRTC Student Helpline: विद्यार्थ्यांच्या सुरक्षित प्रवासासाठी सरकारचा मोठा निर्णय; MSRTC कडून 24×7 हेल्पलाइन सुरू

MSRTC Student Helpline: महाराष्ट्रातील शालेय आणि महाविद्यालयीन विद्यार्थ्यांचा सुरक्षित व वेळेवर प्रवास सुनिश्चित करण्यासाठी महाराष्ट्र राज्य मार्ग परिवहन महामंडळाने (एमएसआरटीसी) 24×7 हेल्पलाइन 1800-221-251 सुरू केली आहे. प्रवासात होणारा विलंब, बस रद्द होणे, तांत्रिक अडचणी अशा समस्यांवर तात्काळ मदत मिळावी या उद्देशाने ही हेल्पलाइन सुरू करण्यात आली आहे.

विद्यार्थ्यांच्या सुरक्षेला सरकारचे प्राधान्य

परिवहन मंत्री प्रताप सरनाईक यांनी सांगितले की विद्यार्थ्यांच्या वाहतुकीबाबत कोणतीही निष्काळजीपणा सहन केली जाणार नाही. सुरक्षित, विश्वासार्ह आणि वेळेवर सेवा देणे हे एमएसआरटीसीचे सर्वोच्च प्राधान्य असल्याचे त्यांनी स्पष्ट केले. राज्यभर एमएसआरटीसीकडून शेकडो विशेष विद्यार्थी बस सेवा चालवल्या जातात. विद्यार्थ्यांच्या खर्चाचा भार कमी करण्यासाठी सरकारकडून शालेय विद्यार्थ्यांना मासिक पासवर 66.66 टक्के अनुदान दिले जाते. तसेच 12 वीपर्यंतच्या मुलींना पुण्यश्लोक अहिल्याबाई होळकर योजनेअंतर्गत मोफत पास उपलब्ध करून देण्यात येतात.  

हेही वाचा – BMC Election 2025 : ‘सत्याचा मोर्चा’मुळे सत्य आले समोर; मुंबईत सुमारे 11 लाख दुबार मतदार

विद्यार्थ्यांच्या दीर्घकालीन तक्रारीवर सरकारची कारवाई

अलीकडेच धाराशिव मध्यवर्ती बस स्थानकाच्या पाहणीवेळी विद्यार्थ्यांनी मंत्र्यांकडे अनेक तक्रारी मांडल्या. बस वेळेवर न सुटणे, चालकांचा गर्दीच्या थांब्यांवरून न थांबता पुढे जाणे, वारंवार विलंब, बस अचानक रद्द होणे आदी समस्यांमुळे विद्यार्थ्यांचे वर्ग चुकणे, घरी उशिरा पोहोचणे, पालकांकडून ओरडा मिळणे अशी परिस्थिती निर्माण होत असल्याची माहिती विद्यार्थ्यांनी परिवहन मंत्र्यांना दिली. काही दुःखद प्रकरणांमध्ये बस उशिरा आल्याने घरी गैरसमज होऊन विद्यार्थ्यांनी आत्महत्या केल्याची नोंदही अधिकाऱ्यांनी केली. यामुळेच सरकारने तातडीने पावले उचलण्याचा निर्णय घेतला.

शालेय विद्यार्थी-विद्यार्थिनींसाठी "१८००२२१२५१" हि एसटीची हेल्पलाइन सुरू… pic.twitter.com/jLUqFDvbOy — Maharashtra State Road Transport Corporation (@msrtcofficial) November 26, 2025

हेही वाचा – Shivsena Politics: भाजप प्रवेशाच्या चर्चेला पूर्णविराम; शिवसेना जिल्हाप्रमुख राजेंद्र जंजाळ यांची स्पष्ट भूमिका

विद्यार्थ्यांसाठी तात्काळ मदतीचे हेल्पलाइन उघड

या समस्या सोडवण्यासाठी 1800-221-251 ही हेल्पलाइन सुरू करण्यात आली आहे. त्यामुळे आता विद्यार्थी बस उशिरा येणे, रद्द होणे, तांत्रिक बिघाड या कोणत्याही अडचणींवर विद्यार्थी थेट मदत मागवू शकतात. यासोबतच एमएसआरटीसीने सर्व 31 विभागीय नियंत्रकांचे संपर्क क्रमांक शाळा व महाविद्यालयांना दिले आहेत, ज्यामुळे शिक्षक, मुख्याध्यापक व विद्यार्थी तातडीच्या तक्रारी थेट नोंदवू शकतील.