Mark Zuckerberg: फेसबुक आणि मेटाचे सर्वेसर्वा मार्क झुकरबर्ग यांच्याबद्दल एक मोठी बातमी समोर आली आहे. झुकरबर्ग आता कंपनीचा दैनंदिन कारभार चालवण्यासाठी एका विशेष 'AI एजंट'ची निर्मिती करत आहेत. हा कृत्रिम बुद्धिमत्तेवर आधारित एजंट झुकरबर्ग यांचा 'वैयक्तिक बॉट' म्हणून काम करेल आणि कंपनीच्या महत्त्वाच्या निर्णयांमध्ये त्यांची मदत करेल.
'डिजिटल चीफ ऑफ स्टाफ' म्हणून करणार काम
मार्क झुकरबर्ग यांनी आपल्या खांद्यावरील कामाचा व्याप कमी करण्यासाठी आणि निर्णयप्रक्रिया वेगवान करण्यासाठी या तंत्रज्ञानावर विश्वास टाकला आहे. हा AI एजंट मेटा कंपनीसाठी 'डिजिटल चीफ ऑफ स्टाफ' (Digital Chief of Staff) म्हणून भूमिका बजावेल. यामुळे झुकरबर्ग यांना छोट्या-मोठ्या कामांसाठी मोठ्या कर्मचारी-संघांवर (Teams) अवलंबून राहण्याची गरज उरणार नाही. हा बॉट थेट सीईओंच्या आदेशानुसार काम करून कंपनीतील संवादाची साखळी अधिक मजबूत करेल.
डेटा विश्लेषण आणि वेगवान निर्णय
हा AI एजंट सध्या प्रशिक्षणाच्या (Training) टप्प्यात असून, तो पूर्णपणे विकसित झाल्यावर झुकरबर्ग यांना कंपनीचा गुंतागुंतीचा डेटा आणि माहिती क्षणात उपलब्ध करून देईल. बाजारातील कल (Market Trends) आणि उपलब्ध आकडेवारीचे सखोल विश्लेषण करून हा एजंट सर्वोत्तम उपाय सुचवेल. यामुळे विविध विभागांशी समन्वय साधण्यात जाणारा वेळ वाचणार असून, झुकरबर्ग यांना अत्यंत वेगाने धोरणात्मक निर्णय घेणे शक्य होईल.
मेटाव्हर्समधील अपयशानंतर AI कडे वळले लक्ष
मार्क झुकरबर्ग यांनी यापूर्वी 'मेटाव्हर्स' (Metaverse) या महत्त्वाकांक्षी प्रकल्पावर सुमारे 80 अब्ज डॉलर्सची अफाट गुंतवणूक केली होती. मात्र, या प्रकल्पाने अपेक्षित यश न मिळवल्यामुळे त्यांनी आता आपले लक्ष पूर्णपणे कृत्रिम बुद्धिमत्तेकडे (AI) वळवले आहे. मेटाव्हर्सची संकल्पना मागे पडल्यानंतर, आता हा नवीन AI प्रकल्प मेटा कंपनीला कोणत्या उंचीवर नेतो, याकडे संपूर्ण टेक विश्वाचे लक्ष लागले आहे.
