Ganpatipule Drowning Incident: रत्नागिरी जिल्ह्यातील प्रसिद्ध पर्यटन स्थळ असलेल्या गणपतीपुळे समुद्रकिनाऱ्यावर आज सकाळी 10 वाजण्याच्या सुमारास एक अत्यंत दुर्दैवी घटना घडली आहे. छत्रपती संभाजीनगर येथून पर्यटनासाठी आलेल्या 19 जणांच्या गटातील 5 तरुण समुद्रात बेपत्ता झाले आहेत. समुद्राच्या लाटा आणि पाण्याच्या खोलीचा अचूक अंदाज न आल्याने हे पर्यटक समुद्रात वाहून गेल्याची प्राथमिक माहिती समोर आली असून, या दुर्घटनेमुळे संपूर्ण परिसरात खळबळ उडाली आहे.
‘या’ पाच तरुणांचा अद्याप शोध सुरू
समुद्रात बेपत्ता झालेल्या आणि सध्या शोधकार्य सुरू असलेल्या तरुणांची नावे खालीलप्रमाणे आहेत:
आदित्य संतोष राऊत
अनिकेत बंडू हिवराळे
आनंद राजू नरवडे
प्रेम दीपक आदमाने
यश रामेश्वर कांबळे
स्थानिक नागरिक आणि जीवरक्षकांची तातडीने धाव
ही दुर्घटना घडताच किनाऱ्यावर उपस्थित असलेले स्थानिक ग्रामस्थ, व्यापारी आणि जीवरक्षकांनी पर्यटकांना वाचवण्यासाठी तात्काळ समुद्राकडे धाव घेतली. मात्र, समुद्रातील प्रबळ पाण्याचा प्रवाह आणि वेगवान लाटांमुळे सुरुवातीच्या बचावकार्यात अनेक अडथळे निर्माण झाले.
युद्धपातळीवर शोधमोहीम आणि प्रशासनाचे आवाहन
घटनेची माहिती मिळताच स्थानिक पोलीस आणि प्रशासकीय अधिकारी घटनास्थळी दाखल झाले आहेत. जीवरक्षक आणि स्थानिक मच्छीमारांच्या बोटींच्या मदतीने समुद्रात बेपत्ता तरुणांचा कसून शोध घेतला जात आहे. या संदर्भात माहिती देताना रत्नागिरीचे जिल्हा पोलीस अधीक्षक नितीन बागाटे यांनी सांगितले की, जिल्हा पोलीस प्रशासन परिस्थितीवर बारीक लक्ष ठेवून असून शोधमोहीम वेगाने सुरू आहे.
हेही वाचा – Parbhani News : परभणीत मंदिरातील सभामंडप कोसळला; 5 जणांचा मृत्यू, 30 ते 40 जण दबल्याची भीती
या दुर्दैवी घटनेमुळे गणपतीपुळे किनाऱ्यावर सध्या चिंतेचे आणि हळहळीचे वातावरण पसरले आहे. दरम्यान, पावसाळा आणि आगामी हवामानाचा अंदाज लक्षात घेता, पर्यटकांनी समुद्रात उतरताना प्रशासनाने दिलेल्या नियमांचे पालन करावे आणि आवश्यक ती खबरदारी बाळगावी, असे आवाहन प्रशासनाकडून करण्यात आले आहे.
