Plane Engine Glitch: उत्तर प्रदेशचे उपमुख्यमंत्री ब्रजेश पाठक यांच्या चार्टर्ड विमानाला उड्डाणापूर्वीच भीषण अपघात टळल्याची धक्कादायक घटना समोर आली आहे. सोमवारी दुपारी मोरादाबाद विमानतळावरून उड्डाण करण्याच्या तयारीत असलेल्या या विमानाचे एक इंजिन अचानक निकामी झाले आणि त्यातून मोठ्या प्रमाणात धूर निघू लागला. इंजिनमधून धूर निघत असल्याचे लक्षात येताच विमानतळ प्रशासन आणि सुरक्षा यंत्रणांनी तात्काळ हालचाली सुरू केल्या. खबरदारीचा उपाय म्हणून विमानाला धावपट्टीवरच (रनवे) थांबवण्यात आले आणि उपमुख्यमंत्री ब्रजेश पाठक यांच्यासह सर्वांना सुरक्षितपणे विमानातून बाहेर काढण्यात आले.
विमानाला उड्डाण करणे शक्य झाले नाही; तांत्रिक तपास सुरू
मुंडापांडे विमानतळाचे अधिकारी अमरजीत सिंग यांनी दिलेल्या माहितीनुसार, शेवटच्या क्षणी झालेल्या या तांत्रिक बिघाडामुळे विमानाला उड्डाण करणे अजिबात शक्य झाले नाही. परिणामी, विमान हवेत झेप घेऊ शकले नाही आणि मोठा अनर्थ टळला. सध्या एका विशेष तांत्रिक पथकाने या संपूर्ण प्रकरणाचा तपास सुरू केला असून, इंजिन बंद पडण्यामागची आणि धूर निघण्यामागची नेमकी कारणे शोधली जात आहेत. या घटनेनंतर विमानतळावरील सुरक्षा व्यवस्था आणि दक्षता अधिक कडक करण्यात आली आहे.
आढावा बैठक संपवून लखनौकडे निघण्याच्या तयारीत असतानाच बिघाड
उपमुख्यमंत्री ब्रजेश पाठक हे मोरादाबाद, संभल आणि अमरोहाच्या 2 दिवसांच्या महत्त्वपूर्ण दौऱ्यावर होते. संभल येथील प्रशासकीय आढावा बैठक आटोपून ते दुपारी 4:15 च्या सुमारास मोरादाबादच्या भदरसाना विमानतळावर पोहोचले होते. ते आणि त्यांचे संपूर्ण पथक विमानात बसल्यानंतर धावपट्टीवर विमानाची इंजिने सुरू करण्यात आली; आणि नेमकी त्याच वेळी अचानक एका इंजिनमध्ये बिघाड होऊन धूर निघू लागला. अशा अत्यंत धोकादायक परिस्थितीत विमान उडवणे असुरक्षित मानून वैमानिकाने प्रसंगावधान राखले आणि उड्डाण रद्द केले.
हेही वाचा – Farmer Loan Waiver: मोठी बातमी! 14.22 लाख शेतकऱ्यांचे कर्ज माफ; मुख्यमंत्र्यांची घोषणा
शेवटी रस्तेमार्गाने गंगा द्रुतगती मार्गाने लखनौकडे रवाना
उपमुख्यमंत्र्यांच्या ओएसडींनी (विशेष कार्य अधिकारी) दिलेल्या माहितीनुसार, दुपारी 4:15 वाजता इंजिनमध्ये झालेल्या बिघाडामुळे विमानाचा प्रवास रद्द करावा लागला. विमानतळावर काही वेळ विमानाची दुरुस्ती होण्याची वाट पाहिल्यानंतर, अखेर ब्रजेश पाठक यांनी रस्तेमार्गे जाण्याचा निर्णय घेतला. ते गंगा द्रुतगती मार्गाने लखनौकडे रवाना झाले. प्रशासनाने अधिकृतपणे स्पष्ट केले आहे की, परिस्थिती आता पूर्णपणे नियंत्रणात असून सर्व प्रवासी आणि अधिकारी सुरक्षित आहेत.
