DGP Of Maharashtra Sadanand Date : महाराष्ट्राच्या पहिल्या महिला डीजीपी रश्मी शुक्ला निवृत्त; IPS सदानंद दाते यांनी स्वीकारला पदभार

New DGP Maharashtra : महाराष्ट्राच्या पहिल्या महिला पोलीस महासंचालक (DGP) रश्मी शुक्ला शनिवारी भारतीय पोलीस सेवेतून (IPS) 35 वर्षांच्या प्रदीर्घ सेवेनंतर निवृत्त झाल्या. त्यांच्या निवृत्तीनंतर राज्य सरकारने राज्याच्या पोलीस दलाची धुरा 1990 च्या बॅचचे कर्तव्यदक्ष अधिकारी आणि 26/11 च्या मुंबई दहशतवादी हल्ल्यातील नायक सदानंद दाते यांच्याकडे सोपवली आहे. दाते यांनी 3 जानेवारी रोजी अधिकृतपणे आपला पदभार स्वीकारला.

रश्मी शुक्ला यांचा ऐतिहासिक प्रवास आणि निरोप

दरम्यान, 1988 च्या बॅचच्या आयपीएस अधिकारी असलेल्या रश्मी शुक्ला यांनी महाराष्ट्राच्या पहिल्या महिला पोलीस अधिकारी आणि पहिल्या महिला डीजीपी होण्याचा मान मिळवला. त्यांच्या निवृत्तीनिमित्त मुंबईतील नायगाव पोलीस मैदानावर एका दिमाखदार निरोप समारंभाचे आयोजन करण्यात आले होते, जिथे त्यांना ‘गार्ड ऑफ ऑनर’ देऊन सन्मानित करण्यात आले. निवृत्तीनंतर त्यांनी मुख्यमंत्री देवेंद्र फडणवीस यांचीही भेट घेतली. निरोप समारंभाप्रसंगी बोलताना रश्मी शुक्ला भावनिक झाल्या. त्या म्हणाल्या, ‘महाराष्ट्र पोलिसांनी मला खूप काही दिले आहे. या साडेतीन वर्षांच्या प्रवासात आम्ही एक संघ म्हणून काम केले. हे पद लिंग-तटस्थ असून कामातील गुणवत्तेला येथे महत्त्व आहे.’ 

हेही वाचा – Balasaheb Sarvade Death : मनसे पदाधिकाऱ्याच्या मृत्यूप्रकरणी भाजप उमेदवाराला पोलीस कोठडी; महापालिका निवडणुकीच्या इतिहासातील पहिलीच घटना

रश्मी शुक्ला यांची कारकिर्द 

रश्मी शुक्ला यांची पोलीस दलातील कारकीर्द अनेक ऐतिहासिक टप्प्यांनी वैशिष्ट्यपूर्ण ठरली आहे. महाराष्ट्राच्या पोलीस इतिहासातील पहिल्या महिला पोलीस महासंचालक (DGP) होण्याचा बहुमान त्यांनी पटकावला. त्यांनी जानेवारी 2024 ते जानेवारी 2026 या दोन वर्षांच्या कालावधीत राज्याच्या पोलीस दलाचे अत्यंत समर्थपणे नेतृत्व केले. यापूर्वी त्यांनी पुण्याच्या पोलीस आयुक्त म्हणून काम करताना आपल्या धडाकेबाज कार्यशैलीमुळे मोठी प्रसिद्धी मिळवली होती. केवळ राज्यातच नव्हे, तर केंद्रातही त्यांनी सशस्त्र सीमा दलाच्या (SSB) महासंचालक पदाची महत्त्वाची जबाबदारी यशस्वीपणे सांभाळली. पोलीस दलात त्यांनी नेहमीच लिंग-तटस्थ नेतृत्वाचा (Gender-neutral leadership) आदर्श घालून दिला असून, त्यांच्या कार्यामुळे पोलीस दलात महिलांसाठी प्रगतीच्या नवीन वाटा आणि संधी निर्माण झाल्या आहेत.

हेही वाचा – Pregnant Woman and Baby Death : काळजाचा थरकाप! गरोदर मातेची जंगलातून 6 किलोमीटर पायपीट; माय-लेकराच्या मृत्यूनंतरही थांबली नाही वणवण

महाराष्ट्र राज्याच्या पोलीस महासंचालक मा. रश्मी शुक्ला यांचा आज कार्यकाळ पूर्ण झाला. त्यांच्या पश्चात १९९० तुकडीचे भा.पो.से. अधिकारी श्री. सदानंद दाते, यांनी महाराष्ट्र राज्य पोलीस महासंचालक, पदाचा पदभार स्वीकारला आहे. महाराष्ट्र पोलीस दल त्यांचे नेतृत्व आणि अनुभवाने अधिक सक्षम… pic.twitter.com/rRZLphkQIl — महाराष्ट्र पोलीस – Maharashtra Police (@DGPMaharashtra) January 3, 2026

नव्या पर्वाची सुरुवात

राज्याचे नवीन पोलीस महासंचालक म्हणून नियुक्त झालेले सदानंद दाते हे त्यांच्या स्वच्छ प्रतिमेसाठी आणि अदम्य धैर्यासाठी ओळखले जातात. 26/11 च्या हल्ल्यादरम्यान त्यांनी दाखवलेल्या शौर्याबद्दल त्यांचे मोठे नाव आहे. यापूर्वी त्यांनी ‘राष्ट्रीय तपास यंत्रणेचे’ (NIA) महासंचालक म्हणूनही यशस्वी काम पाहिले आहे. दाते हे पुढील सुमारे 2 वर्षे महाराष्ट्राच्या 2 लाख पोलीस दलाचे नेतृत्व करतील. 31 डिसेंबर 2025 रोजी त्यांच्या नियुक्तीची घोषणा करण्यात आली होती. रश्मी शुक्ला यांच्या निरोप समारंभाला उपस्थित राहून त्यांनी मावळत्या डीजीपींकडून शुभेच्छा स्वीकारल्या.