Maharashtra Doctors Strike: महाराष्ट्र सरकारने होमिओपॅथिक डॉक्टरांना एक वर्षाचा औषधनिर्माणशास्त्र (CCMP) अभ्यासक्रम पूर्ण केल्यानंतर अॅलोपॅथीची मर्यादित प्रॅक्टिस करण्याची परवानगी दिल्यानंतर राज्यातील अॅलोपॅथिक वैद्यकीय क्षेत्रातून तीव्र विरोध सुरू झाला आहे. या निर्णयाच्या निषेधार्थ 18 सप्टेंबर रोजी राज्यातील 1.8 लाख अॅलोपॅथिक डॉक्टर संपावर जाणार आहेत. इंडियन मेडिकल असोसिएशन (IMA) च्या आवाहनानुसार, सर्व खाजगी रुग्णालये, नर्सिंग होम आणि क्लिनिक गुरुवारी सकाळी 8 पासून ते शुक्रवार सकाळी 8 वाजेपर्यंत बाह्यरुग्ण विभाग (OPD) आणि क्लिनिक बंद ठेवतील. मात्र, आपत्कालीन सेवा सुरू राहतील. परंतु, या संपामुळे नवीन रुग्णांची नोंदणी, उपचार आणि शस्त्रक्रियांवर मोठा परिणाम होण्याची शक्यता आहे.
आयएमएचा इशारा
IMA महाराष्ट्राचे अध्यक्ष डॉ. संतोष कदम यांनी सांगितले की, अल्पकालीन प्रमाणपत्र अभ्यासक्रमानंतर होमिओपॅथिक डॉक्टरांना अॅलोपॅथीची प्रॅक्टिस करण्याची परवानगी देणे हे रुग्णांच्या जीवाशी खेळण्यासारखे आहे. चुकीचे औषध किंवा चुकीचे निदान गंभीर धोका निर्माण करू शकते, असे त्यांनी नमूद केले.
हेही वाचा – Sharad Pawar: 'देवाभाऊ शेतकऱ्यांकडे पाहायला तयार नाहीत, सरकारवर दबाव…'; पवारांचा सरकारवर जोरदार हल्लाबोल
देशव्यापी आंदोलनाची शक्यता
फेडरेशन ऑफ ऑल इंडिया मेडिकल असोसिएशनचे अध्यक्ष डॉ. अक्षय डोंगरदिवे यांनी इशारा दिला आहे की, सरकारने हा निर्णय मागे घेतला नाही तर देशभरात डॉक्टर आंदोलन छेडतील आणि जनतेला धोक्यांबद्दल जागरूक करण्यासाठी रस्त्यावर उतरतील.
संपाला व्यापक समर्थन
या संपाला बॉम्बे नर्सिंग होम असोसिएशन, महाराष्ट्र सीनियर रेसिडेंट डॉक्टर्स असोसिएशन (MSRDA), सरकारी रुग्णालयांतील वैद्यकीय अधिकारी, महाराष्ट्र ऑप्थॅल्मोलॉजिकल सोसायटी आणि इंडियन अकादमी ऑफ पेडियाट्रिक्सच्या महाराष्ट्र युनिटसह अनेक वैद्यकीय संस्थांचा पाठिंबा मिळाला आहे.
