Kalyan Stray Dog Attack: कल्याण पश्चिमेकडील संदीप हॉटेल परिसर आणि लगतच्या भागांमध्ये एका भटक्या कुत्र्याने अचानक हल्ला चढवून नागरिकांमध्ये प्रचंड घबराट निर्माण केली होती. एरवी गुन्हेगार किंवा चोरांच्या मागावर असणाऱ्या पोलिसांना या अनोख्या संकटामुळे चक्क श्वानाच्या शोधासाठी रस्त्यावर उतरावे लागले. अचानक नागरिकांवर झेप घेऊन चावा घेण्याच्या या धक्कादायक घटनांमुळे परिसरातील लहान मुले, ज्येष्ठ नागरिक आणि पादचाऱ्यांच्या सुरक्षेचा प्रश्न अत्यंत गंभीर बनला होता.
150 नागरिकांना चावा; पालिका आपत्कालीन यंत्रणेच्या गैरहजेरीमुळे नागरिक संतापले
या पिसाळलेल्या भटक्या कुत्र्याने अल्पावधीतच तब्बल 150 च्या आसपास नागरिकांना चावा घेतल्याचा दावा केला जात आहे. अशा अत्यंत आणीबाणीच्या परिस्थितीत कल्याण-डोंबिवली महानगरपालिकेची आपत्कालीन अथवा श्वान नियंत्रण यंत्रणा वेळीच घटनास्थळी दाखल न झाल्याने स्थानिक नगरसेवकांनी तीव्र संताप व्यक्त केला. नागरिकांच्या जीवितास थेट धोका निर्माण झाल्यामुळे प्रशासकीय दुर्लक्षाविरुद्ध स्थानिक पातळीवरून जोरदार टीका करण्यात आली.
हेही वाचा – BMC Corporators: महापालिकेचा कारभार होणार पेपरलेस; 237 नगरसेवकांना महिनाभरात मिळणार Apple टॅब
खडकपाडा अन् महात्मा फुले पोलिसांचे सर्च ऑपरेशन; श्वानाला पकडण्यात यश
स्थानिकांची सुरक्षेची मागणी ध्यानात घेऊन खडकपाडा पोलीस ठाणे आणि महात्मा फुले पोलीस ठाण्याची विशेष पथके तात्काळ मैदानात उतरली. कुत्र्याने सतत आपली जागा बदलल्यामुळे त्याला शोधणे हे मोठे आव्हान बनले होते. अखेर पोलीस अधिकारी, स्थानिक नगरसेवक आणि सामाजिक कार्यकर्त्यांनी संयुक्त शोधमोहीम राबवून या भटक्या कुत्र्याला सुरक्षितपणे ताब्यात घेतले.
कुत्र्याला पकडल्यानंतर नागरिकांना दिलासा; कायमस्वरूपी उपायांची मागणी
पोलीस व लोकप्रतिनिधींच्या तातडीच्या प्रयत्नांमुळे श्वानाला पकडण्यात यश आल्यानंतर संदीप हॉटेल परिसरातील रहिवाशांनी सुटकेचा निश्वास सोडला आहे. मात्र, या घटनेमुळे कल्याण-डोंबिवली महापालिका हद्दीतील भटक्या श्वानांचा प्रश्न पुन्हा एकदा ऐरणीवर आला आहे. केवळ तात्पुरती कारवाई न करता अशा धोकादायक भटक्या कुत्र्यांचा बंदोबस्त करण्यासाठी कायमस्वरूपी व ठोस उपाययोजना आखावी, अशी आग्रही मागणी आता नागरिक करत आहेत.
