मुंबई: राष्ट्रीय तपास संस्थेने (NIA) बंदी घातलेल्या दहशतवादी संघटने आयसिसच्या पुणे स्लीपर मॉड्यूलशी संबंधित 2023 च्या प्रकरणात मुंबई विमानतळावरून दोन फरार दहशतवाद्यांना अटक केली आहे. अटक केलेल्या दहशतवाद्यांची नावे अब्दुल्ला फयाज शेख उर्फ डायपरवाला आणि तल्हा खान अशी आहेत. इंडोनेशियातील जकार्ता येथून भारतात परतण्याचा प्रयत्न करत असताना मुंबई आंतरराष्ट्रीय विमानतळाच्या टी-2 मधून दोघांनाही अटक करण्यात आली. हे दोघेही आयसिससाठी स्लीपर सेल म्हणून काम करत होते.
दोन्ही आरोपी गेल्या दोन वर्षांपासून फरार होते आणि त्यांच्याविरुद्ध एनआयए विशेष न्यायालयाने मुंबईतील अजामीनपात्र वॉरंट देखील जारी केले होते. एनआयएने दोन्ही आरोपींबद्दल माहिती देणाऱ्यांना प्रत्येकी 3 लाख रुपयांचे रोख बक्षीसही जाहीर केले होते. हा खटला अब्दुल्ला फयाज शेख आणि तल्हा खान यांच्यासह आधीच अटक केलेल्या आयसिस पुणे स्लीपर मॉड्यूलच्या इतर 8 सदस्यांनी रचलेल्या गुन्हेगारी कटाशी संबंधित आहे. या लोकांनी भारतातील शांतता आणि सांप्रदायिक सौहार्द बिघडवण्यासाठी दहशतवादी कारवाया करण्याचा कट रचला होता.
हेही वाचा – रक्षकच बनला भक्षक; पोलिसाने शिक्षिकेवर केला अत्याचार, धक्कादायक प्रकार उघड
दहशतवादी कृत्याचा कट –
हिंसाचार आणि दहशतवादाच्या माध्यमातून देशात इस्लामिक राज्य प्रस्थापित करण्याच्या आयसिसच्या अजेंडाला पुढे नेण्यासाठी भारत सरकारविरुद्ध युद्ध पुकारून भारतातील शांतता आणि सांप्रदायिक सौहार्द बिघडवण्याच्या उद्देशाने त्यांनी दहशतवादी कृत्ये करण्याचा कट रचला होता. अटक केलेल्या इतर आरोपींसह आरोपपत्र दाखल केलेले हे दोघे जण पुण्यातील कोंढवा येथे अब्दुल्ला फयाज शेख यांनी भाड्याने घेतलेल्या घरात आयईडी बनवण्याचे काम करत होते. 2022-23 या कालावधीत, त्यांनी बॉम्ब बनवण्याच्या आणि प्रशिक्षण कार्यशाळांचे आयोजन केले आणि त्यात भाग घेतला, तसेच या ठिकाणी त्यांनी बनवलेल्या आयईडीची चाचणी करण्यासाठी नियंत्रित स्फोट केले.
NIA Arrests 2 Absconders in ISIS Pune Sleeper Module Case from Mumbai Airport pic.twitter.com/B6q5iVOcTD — NIA India (@NIA_India) May 17, 2025
हेही वाचा – बीडमधील तरुणाने सोशल मीडियावर स्टेटस ठेवून संपवले जीवन; पुण्यात केली आत्महत्या
दरम्यान, भारतातील आयसिसच्या हिंसक आणि नापाक भारतविरोधी दहशतवादी योजना उधळून लावण्यासाठी त्यांच्या कारवायांचा सक्रियपणे तपास करणाऱ्या एनआयएने यापूर्वी या प्रकरणातील सर्व 10 आरोपींविरुद्ध युए(पी) कायदा, स्फोटक पदार्थ कायदा, शस्त्रास्त्र कायदा आणि आयपीसीच्या विविध कलमांखाली आरोपपत्र दाखल केले होते. अब्दुल्ला फयाज शेख आणि तलहा खान यांच्याशिवाय, मोहम्मद इम्रान खान, मोहम्मद युनूस साकी, अब्दुल कादिर पठाण, सिमाब नसिरुद्दीन काझी, झुल्फिकार अली बडोदावाला, शमिल नाचन, आकीफ नाचन आणि शाहनवाज आलम अशी अटक करण्यात आलेल्यांची नावे आहेत.
