Shreyas Iyer fine : IPL 2026 मध्ये चेन्नई सुपर किंग्सविरुद्ध (CSK) रोमहर्षक विजय मिळवूनही पंजाब किंग्सच्या (PBKS) आनंदावर विरजण पडले आहे. एमए चिदंबरम स्टेडियमवर पार पडलेल्या या सामन्यात स्लो ओव्हर-रेट राखल्याबद्दल बीसीसीआयने पंजाबच्या संपूर्ण संघावर कठोर कारवाई केली आहे. आयपीएल इतिहासातील ही आतापर्यंतची सर्वात मोठी दंडात्मक कारवाई मानली जात आहे. विजयामुळे गुणतालिकेत आघाडी मिळाली असली, तरी शिस्तपालनाच्या बाबतीत झालेल्या चुकीमुळे कर्णधार श्रेयस अय्यरच्या अडचणीत मोठी वाढ झाली आहे.
कर्णधारासह संपूर्ण संघाला दंडाचा फटका
आयपीएलच्या आचारसंहितेनुसार (Code of Conduct) पंजाब किंग्सचा या हंगामातील हा दुसरा गुन्हा ठरला आहे. आर्टिकल 2.22 अंतर्गत करण्यात आलेल्या या कारवाईत कर्णधार श्रेयस अय्यरला तब्बल 24 लाख रुपयांचा दंड ठोठावण्यात आला आहे. विशेष म्हणजे, या दंडाचा फटका केवळ कर्णधारालाच बसला नसून, प्लेइंग इलेव्हनमधील सर्व खेळाडू आणि 'इम्पॅक्ट प्लेयर'लाही त्याचे परिणाम भोगावे लागणार आहेत. संघातील उर्वरित 11 खेळाडूंना प्रत्येकी 6 लाख रुपये किंवा त्यांच्या मॅच फीच्या 25 टक्के (जी रक्कम कमी असेल ती) दंड म्हणून भरावे लागणार आहेत.
हेही वाचा – Rohit Sharma Record: रोहित शर्माचा ऐतिहासिक विक्रम; धोनी-विराटच्या पंक्तीत मिळवले स्थान
श्रेयस अय्यरवर बंदीची टांगती तलवार
या सलग दुसऱ्या चुकीमुळे श्रेयस अय्यरच्या नेतृत्वावर आता सस्पेंशनची टांगती तलवार आहे. आयपीएलच्या नियमांनुसार, जर एखाद्या संघाने एकाच हंगामात सलग तिसऱ्यांदा स्लो ओव्हर-रेटची चूक केली, तर कर्णधारावर एका सामन्याची बंदी (Suspension) घातली जाते. पंजाबने यापूर्वी गुजरातविरुद्धच्या सामन्यातही अशीच चूक केली होती. त्यामुळे आगामी सामन्यांमध्ये वेळेचे नियोजन करणे श्रेयससाठी अनिवार्य झाले आहे. वेळेत षटके पूर्ण करण्यासाठी त्याला अर्शदीप सिंग आणि इतर गोलंदाजांना कडक सूचना द्याव्या लागणार आहेत.
विजयानंतरही पंजाबच्या गोटात चिंतेचे वातावरण
चेन्नईविरुद्धच्या सामन्यात 18 व्या षटकापर्यंतच गोलंदाजीचा निर्धारित अवधी संपला होता, ज्यामुळे ही कारवाई अटळ होती. पंजाब किंग्सने मैदानात उत्कृष्ट खेळ करून सलग दुसरा विजय मिळवला असला, तरी बीसीसीआयच्या या मोठ्या कारवाईमुळे संघाच्या मॅनेजमेंटमध्ये चिंतेचे वातावरण आहे. आयपीएल प्रशासनाने स्पष्ट केले आहे की खेळाच्या वेगाशी आणि नियोजित वेळेच्या मर्यादेशी कोणतीही तडजोड केली जाणार नाही. आता आगामी सामन्यांमध्ये पंजाबची टीम वेळेचे व्यवस्थापन कशा प्रकारे करते, याकडे सर्वांचे लक्ष लागले आहे.
हेही वाचा – Sunil Gavaskar: 'त्याला आधी संघातून बाहेर काढा…'; सुनील गावस्कर 'या' अष्टपैलू खेळाडूवर संतापले
