Sangamner Car Accident: अहमदनगर जिल्ह्यातील संगमनेर तालुक्यात एका रस्ते अपघातामुळे प्रतिबंधित अमली पदार्थांच्या काळ्या बाजाराचा पर्दाफाश झाला आहे. कऱ्हे घाटात चालकाचे नियंत्रण सुटल्याने एक पांढऱ्या रंगाची इनोव्हा कार थेट दरीत कोसळली. या अपघाताची माहिती मिळताच स्थानिक पोलिसांनी बचाव पथकासह घटनास्थळी धाव घेऊन क्रेनच्या मदतीने वाहन बाहेर काढले. मात्र, अपघातग्रस्त कारची तपासणी करताना पोलीस अधिकारीही थक्क झाले. गाडीच्या आत बेकायदेशीर गुटख्याची पोती लपवून ठेवली होती. महाराष्ट्रात गुटखा विक्री आणि वाहतुकीवर पूर्ण बंदी असतानाही तस्करांनी थेट अलिशान गाड्यांचा वापर करून ही वाहतूक सुरू ठेवल्याचे यावरून उघड झाले आहे.
8 लाखांहून अधिक किमतीचा बेकायदेशीर माल जप्त
संगमनेर तालुका पोलीस ठाण्याचे प्रभारी अधिकारी प्रवीण साळुंखे यांनी दिलेल्या माहितीनुसार, या अपघातात कारमधील 2 युवक गंभीर जखमी झाले असून त्यांना तातडीने उपचारासाठी जवळच्या खाजगी रुग्णालयात दाखल करण्यात आले आहे. पोलिसांनी वाहनातून तब्बल 8,37,000 रुपये किमतीचा अवैध गुटखा साठा जप्त केला आहे. अन्न व औषध प्रशासन (FDA) सातत्याने कारवाई करत असतानाही, परराज्यातून हा प्रतिबंधित माल संगमनेरच्या बाजारपेठेत पुरवठा केला जात असल्याचे प्राथमिक तपासात समोर आले आहे. पोलिसांनी याप्रकरणी गुन्हा नोंदवला असून संशयितांची प्रकृती सुधारल्यानंतर त्यांची कसून चौकशी केली जाईल.
संगमनेर भागात तस्करांचे मोठे जाळे
या नव्या प्रकरणामुळे संगमनेर आणि आसपासच्या परिसरात आंतरराज्यीय गुटखा रॅकेट मोठ्या प्रमाणावर सक्रिय असल्याच्या संशयाला बळकटी मिळाली आहे. विशेष म्हणजे, काही दिवसांपूर्वीच पोलिसांनी सायखिंडी फाट्याजवळ अशाच पद्धतीने एका स्कॉर्पिओ गाड्याची नाकाबंदी करून लाखोंचा गुटखा पकडला होता.
दरम्यान, हा बेकायदेशीर साठा नेमका कोणत्या राज्यातून आणला जात होता आणि या रॅकेटचा मुख्य सुत्रधार कोण आहे, याचा शोध घेण्यासाठी पोलिसांनी आता तांत्रिक तपास आणि गुप्तहेरांची मदत सुरू केली आहे. आगामी काळात या प्रकरणात आणखी काही मोठ्या मोठ्या व्यक्तींवर कारवाई होण्याची शक्यता वर्तवली जात आहे.
