Indore 3 year old Girl Anika 9 Crore Injection case : मध्य प्रदेशातील इंदूर येथील रहिवासी असलेल्या अवघ्या ३ वर्षांच्या अनिकाचा मृत्यूशी जीवघेणा संघर्ष सुरू आहे. गंभीर आजाराने ग्रस्त असलेल्या या चिमुकलीचा प्राण वाचवण्यासाठी तब्बल 9 कोटी रुपयांच्या अत्यंत महागड्या इंजेक्शनची तातडीने गरज आहे. या संवेदनशील प्रकरणी दाखल झालेल्या याचिकेवर सुनावणी करताना उच्च न्यायालयाने राज्य सरकारची तीव्र शब्दांत खरडपट्टी काढली. अनिकाची नाजूक स्थिती आणि प्रकरणाचे गांभीर्य लक्षात घेऊन न्यायालयाने थेट प्रशासनाला जाब विचारला की, ही लहान मुलगी राज्याची लाडकी बहीण योजना अंतर्गत येत नाही का? या संपूर्ण प्रकरणाची पुढील सुनावणी आता 22 जून रोजी होणार आहे.
लाडकी बहीण योजनेचा संदर्भ आणि वकिलांचा भावनिक युक्तिवाद
या प्रकरणाची सुनावणी 16 जून रोजी झाली, ज्यामध्ये अनिकाच्या वतीने वकिलांनी न्यायालयात एक अत्यंत भावुक आणि महत्त्वाचा तार्किक हिशोब मांडला. त्यांनी न्यायालयात सांगितले की, 'सध्या राज्यात लाडकी बहीण योजना मोठ्या प्रमाणावर राबवली जात आहे, ज्याअंतर्गत लाखो गरीब आणि गरजू महिलांना दरमहा आर्थिक मदत दिली जाते. जर या योजनेतील प्रत्येक लाभार्थी महिलेच्या मानधनातून केवळ 2 रुपये वजा केले, तर अनिकाच्या उपचारांसाठी लागणारे 9 कोटी रुपये अगदी सहज उभे राहू शकतात'. हा युक्तिवाद ऐकल्यानंतर न्यायालयाने सरकारकडे तात्काळ उत्तर मागितले.
वेळेविरुद्ध अनिकाची लढाई; लोकसहभागातून 8 कोटी जमा
दुसरीकडे, वेळ हातातून वेगाने निसटत चालल्याने अनिकाच्या कुटुंबासमोरील आव्हाने प्रचंड वाढली आहेत. गेल्या महिन्यापासून ती केवळ द्रव पदार्थांच्या (Liquid diet) आधारावर जगत असून तिची प्रकृती दिवसेंदिवस चिंताजनक होत चालली आहे. वैद्यकीय नियमांनुसार, हे 9 कोटींचे इंजेक्शन देताना मुलीचे वजन 13 किलोपेक्षा कमी असणे अनिवार्य आहे. अनिकाचा जीव वाचवण्यासाठी तिच्या कुटुंबीयांनी केलेल्या आवाहनाला प्रतिसाद देत समाजाने मदतीचा हात पुढे केला आणि लोकसहभागातून आतापर्यंत 8 कोटी रुपये उभे राहिले आहेत. परंतु, उर्वरित मोठी रक्कम आणि प्रलंबित प्रशासकीय मंजुऱ्या यांमुळे आता सर्वांचे लक्ष 22 जूनच्या न्यायालयीन निर्णयाकडे लागले आहे.
हेही वाचा – 21 June 2026 : एकाच दिवशी 5 महत्त्वाच्या गोष्टी; 21 जून 2026 चा रविवार का असणार आहे खास?
