Chocolate Sales 2026: स्विस अन्न आणि मिठाई क्षेत्रातील दिग्गज कंपनी 'नेस्ले' (Nestlé) साठी भारत आता सर्वात सामर्थ्यवान बाजारपेठ म्हणून उदयास आला आहे. कंपनीच्या ताज्या अहवालानुसार, KitKat चॉकलेटसाठी भारत आता अधिकृतपणे जगातील सर्वात मोठी बाजारपेठ बनला आहे. केवळ 10 वर्षांपूर्वी जागतिक स्तरावर 10 व्या स्थानावर असलेल्या भारताने, अवघ्या एका दशकात ही गरुडझेप घेतली आहे. सातत्याने वाढणारी मागणी आणि विक्रीतील दमदार कामगिरीमुळे भारताने जपान आणि युरोपसारख्या देशांनाही मागे टाकले आहे.
मॅगीनंतर किट-कॅटचा जलवा; मनीष तिवारी यांची माहिती
Nestlé India चे अध्यक्ष आणि व्यवस्थापकीय संचालक मनीष तिवारी यांनी सांगितले की, 'मॅगी' (Maggi) नंतर KitKat हा कंपनीचा असा दुसरा मोठा ब्रँड ठरला आहे, ज्यासाठी भारत जागतिक स्तरावर प्रथम क्रमांकावर आहे. आर्थिक वर्ष 2026 (FY26) मध्ये मिठाई (Confectionery) विभागाने महसूल आणि विक्रीचे प्रमाण या दोन्ही बाबतीत दुहेरी अंकी वाढ नोंदवली आहे. विशेष म्हणजे, ही मागणी केवळ महानगरांपुरती मर्यादित नसून लहान शहरे आणि गावांमध्येही चॉकलेटची क्रेझ मोठ्या प्रमाणावर वाढली आहे.
नवीन फ्लेवर्स आणि प्रीमियम उत्पादनांचा धमाका
KitKat च्या या यशाचे मोठे श्रेय कंपनीने आणलेल्या नाविन्यपूर्ण उत्पादनांना जाते. भेटवस्तू देण्यासाठी KitKat Celebreak, तर नाश्त्याचा पर्याय म्हणून KitKat Pops लाँच करण्यात आले. याशिवाय प्रीमियम श्रेणीत Salted Caramel आणि Hazelnut सारख्या फ्लेवर्ससह KITKAT Delights सादर करण्यात आले. तरुणाईला आकर्षित करण्यासाठी Lemon & Lime आणि KITKAT DUO सारखे फ्लेवर्सही अत्यंत लोकप्रिय ठरले आहेत, ज्यामुळे ब्रँडचे आकर्षण केवळ मुलांपुरते न राहता नोकरी करणाऱ्या व्यावसायिकांपर्यंत पोहोचले आहे.
गावागावांत पोहोचली चॉकलेट्स; 'व्हिसिकूलर' रणनीती यशस्वी
नेस्लेने केवळ उत्पादने लाँच केली नाहीत, तर वितरण व्यवस्थाही बळकट केली आहे. उष्ण हवामान असलेल्या भारतात चॉकलेटचा दर्जा टिकवून ठेवण्यासाठी कंपनीने "व्हिसिकूलर" (Visicooler) कार्यक्रम राबवला. याअंतर्गत किरकोळ विक्रेत्यांना विशेष रेफ्रिजरेटर्स पुरवण्यात आले. या रणनीतीमुळे ग्रामीण भागातही चॉकलेटची विक्री वाढली आहे. आर्थिक वर्ष 2025 मध्ये कंपनीने भारतात तब्बल 395 कोटी 'किट-कॅट फिंगर्स'ची विक्री केली आहे, जो एक विक्रम मानला जात आहे.
हेही वाचा – Indian Mangoes In USA: भारताची 'मँगो डिप्लोमसी' जोरात! अमेरिकेत किती रुपये किलोने मिळतो भारतील आंबा?
भारतीयांची बदलती अभिरुची आणि जागतिक वर्चस्व
जपान, ब्राझील आणि युरोपला मागे टाकून भारताने मिळवलेले प्रथम स्थान हे भारतीय बाजारपेठेच्या वाढत्या शक्तीचे निदर्शक आहे. 1930 च्या दशकात जागतिक स्तरावर सुरू झालेली KitKat आज भारतात यशाची नवनवीन शिखरे गाठत आहे. आगामी काळात भारतीय ग्राहकांची पसंती ओळखून कंपन्या आपली गुंतवणूक आणखी वाढवतील, असा अंदाज वर्तवण्यात येत आहे, ज्यामुळे देशाच्या मिठाई आणि चॉकलेट बाजारपेठेला मोठी गती मिळणार आहे.
