Fuel Update: मध्यपूर्वेतील तणावादरम्यान भारताकडे ‘इतक्या’ दिवसांचा इंधन साठा शिल्लक; कच्च्या तेलाच्या आयातीसाठी नव्या देशांशी चर्चा सुरू

Fuel Update: मध्यपूर्वेतील वाढत्या भू-राजकीय तणावाच्या पार्श्वभूमीवर भारताच्या ऊर्जा सुरक्षेबाबत केंद्र सरकारने मोठे आश्वासन दिले आहे. सरकारी सूत्रांनी मंगळवारी स्पष्ट केले की, भारताकडे सध्या सुमारे 25 दिवसांचा कच्चे तेल (Crude Oil) आणि शुद्ध तेलाचा साठा उपलब्ध आहे. जागतिक बाजारपेठेत कच्च्या तेलाच्या पुरवठ्यावर परिणाम होण्याची शक्यता असली, तरी भारत कच्चे तेल, एलपीजी आणि एलएनजी आयात करण्यासाठी पर्यायी स्रोतांचा शोध घेत असून परिस्थितीवर बारीक लक्ष ठेवून आहे.

पेट्रोल-डिझेलच्या किमती स्थिर राहणार
पश्चिम आशियातील अशांततेमुळे जागतिक स्तरावर इंधनाचे दर वधारण्याची भीती व्यक्त केली जात असताना, भारतातील वाहनधारकांसाठी दिलासादायक बातमी समोर आली आहे. सरकारी सूत्रांनुसार, सद्यस्थितीत देशात पेट्रोल किंवा डिझेलच्या किमती वाढवण्याची कोणतीही तात्काळ योजना नाही. केंद्रीय पेट्रोलियम आणि नैसर्गिक वायू मंत्री हरदीप पुरी यांनी सोमवारीच वरिष्ठ अधिकाऱ्यांसोबत पेट्रोलियम उत्पादनांच्या पुरवठ्याचा सविस्तर आढावा घेतला असून, देशात इंधनाची कमतरता भासणार नाही याची खात्री दिली आहे.

वाणिज्य मंत्रालयाकडून आयात-निर्यात प्रवाहाचा आढावा
इंधन पुरवठ्यासोबतच भारताच्या व्यापारी उलाढालीवर होणाऱ्या परिणामांचे मूल्यांकन करण्यासाठी वाणिज्य मंत्रालयाने एक महत्त्वाची बैठक घेतली. वाणिज्य विभागाचे विशेष सचिव सुचिंद्र मिश्रा आणि डीजीएफटी (DGFT) लव अग्रवाल यांच्या अध्यक्षतेखाली झालेल्या या बैठकीत शिपिंग लाईन्स, लॉजिस्टिक्स ऑपरेटर आणि बँकिंग क्षेत्रातील प्रतिनिधी उपस्थित होते. यामध्ये मालवाहतुकीचा खर्च, विम्याचा हप्ता आणि जहाजांच्या मार्गात होणारे बदल यावर सविस्तर चर्चा करण्यात आली. विशेषतः वेळेच्या दृष्टीने संवेदनशील असलेल्या निर्यातीवर (Time-sensitive exports) याचा काय परिणाम होईल, याचे विश्लेषण यावेळी करण्यात आले.

हेही वाचा – Ayatollah Khamenei Death: इराणचे सर्वेसर्वा खामेनेईंच्या मृत्यूवर भारत गप्प का ? मोदी सरकारने प्रतिक्रिया न देण्यामागे दडलंय 'हे' मोठं कारण

पर्यायी मार्ग आणि अखंड पुरवठ्यावर भर
भारत हा पश्चिम आशियाई देशांमधून मोठ्या प्रमाणावर कच्चे तेल आणि नैसर्गिक वायू आयात करतो. सध्याच्या बदलत्या परिस्थितीमुळे जहाजांच्या वेळापत्रकात समायोजन आणि संक्रमण काळात (Transition time) वाढ होण्याची शक्यता आहे. हे टाळण्यासाठी पेट्रोलियम मंत्रालय आणि वाणिज्य मंत्रालय संयुक्तपणे प्रयत्न करत आहेत. "आम्ही सतत बदलत्या परिस्थितीवर लक्ष ठेवून आहोत आणि देशातील प्रमुख पेट्रोलियम उत्पादनांची उपलब्धता सुनिश्चित करण्यासाठी सर्व आवश्यक पावले उचलली जातील," असे आश्वासन पेट्रोलियम मंत्रालयाने 'X' (ट्विटर) वरील पोस्टद्वारे दिले आहे.