ICC Player of The Month Award: आंतरराष्ट्रीय क्रिकेट परिषदेने (ICC) 23 मार्च 2026 रोजी फेब्रुवारी महिन्यासाठीच्या 'प्लेअर ऑफ द मंथ' पुरस्कारांची घोषणा केली आहे. यामध्ये महिलांच्या श्रेणीत भारताची वेगवान गोलंदाज अरुंधती रेड्डीने बाजी मारली आहे, तर पुरुषांच्या श्रेणीत पाकिस्तानच्या साहिबजादा फरहानला या पुरस्काराने सन्मानित करण्यात आले आहे.
ऑस्ट्रेलिया दौऱ्यावरील कामगिरी ठरली निर्णायक
अरुंधती रेड्डीने ऑस्ट्रेलियाविरुद्धच्या 3 सामन्यांच्या T20 मालिकेत 8 बळी घेत सर्वांचे लक्ष वेधून घेतले होते. या मालिकेत तिने 10.87 च्या सरासरीने आणि 7.25 च्या इकॉनॉमी रेटने धाकधूक निर्माण केली. विशेषतः सिडनीमध्ये झालेल्या सामन्यात तिने केवळ 22 धावांत 4 बळी टिपले होते. या उत्कृष्ट कामगिरीमुळे तिने श्रीलंकेची हर्षिता समरविक्रमा आणि पाकिस्तानची फातिमा सना यांना मागे टाकत पहिल्यांदाच हा किताब पटकावला.
पुरस्कारानंतर अरुंधतीची भावना
हा सन्मान मिळाल्यानंतर अरुंधती रेड्डी म्हणाली, "ICC 'प्लेअर ऑफ द मंथ' म्हणून निवड होणे हा माझ्यासाठी मोठा गौरव आहे. ऑस्ट्रेलियाला त्यांच्याच भूमीत हरवणे सोपे नसते, पण त्या विजयात मी योगदान देऊ शकले याचा आनंद अधिक आहे. या यशामुळे संघाचा आत्मविश्वास वाढला असून आगामी महिला T20 विश्वचषकातही आम्ही अशाच कामगिरीची पुनरावृत्ती करू."
पुरुषांच्या श्रेणीत साहिबजादा फरहानची बाजी
पुरुषांच्या विभागात पाकिस्तानचा फलंदाज साहिबजादा फरहान याने 'प्लेअर ऑफ द मंथ'चा पुरस्कार जिंकला. 2026 च्या T20 विश्वचषकात सर्वाधिक धावा करणाऱ्या खेळाडूंमध्ये तो आघाडीवर होता. त्याने इंग्लंडचा विल जॅक्स आणि अमेरिकेचा शॅडली व्हॅन शॅल्कविक या तगड्या खेळाडूंना मागे टाकून हे स्थान मिळवले. जरी त्याचा संघ उपांत्य फेरीपर्यंत पोहोचू शकला नसला, तरी वैयक्तिक कामगिरीच्या जोरावर त्याने हा बहुमान मिळवला.
