मुंबई: सध्या महागाई दिवसेंदिवस वाढत असून याचा सामान्य माणसाला मोठा फटका सहन कराला लागत आहे. भाज्यांसह दैनंदिन वापराच्या वस्तूंच्या किमती सतत वाढत आहेत. तीन दिवसांपूर्वी अमूल कंपनीने दुधाच्या किमतीत वाढ केली होती. दुधाच्या किमतीत प्रति लिटर 2 रुपयांची वाढ झाली आहे. अमूल दुधानंतर आता गोकुळ दुधाच्या किमतीतही वाढ जाहीर करण्यात आली आहे. यामुळे पुन्हा एकदा ग्राहकांच्या खिशावर भार पडणार आहे.
गोकुळ ब्रँडच्या दुधाच्या किमतीत वाढ –
दरम्यान, कोल्हापूर दूध उत्पादक संघाने दुधाच्या दरात वाढ जाहीर करणारे परिपत्रक जारी केले आहे. त्यात म्हटले आहे की, कोल्हापूरहून मुंबई शहर आणि उपनगरे, ठाणे, रायगड आणि पालघर जिल्ह्यांमध्ये वितरित केल्या जाणाऱ्या गोकुळ ब्रँडच्या सर्व पॉलिथिन पॅकेजिंगमधील फुल क्रीम आणि गाईच्या दुधाच्या किमती वाढत आहेत. तथापि, असोसिएशनने असेही म्हटले आहे की नवीन दर 4 मे पासून लागू होतील. तथापि, टोन्ड (ताजे) आणि गोकुळ शक्ती दुधाच्या किमतीत कोणताही बदल होणार नाही.
हेही वाचा – आज बारावीचा निकाल जाहीर होणार, फक्त काही तास शिल्लक; गेल्यावर्षी मुलींची बाजी, यंदा काय चित्र असेल?
गोकूळ दुधाची किंमत किती असेल?
फुल क्रीम दूध (क्लासिक) प्रति लिटर 74 रुपये असेल. तर 5 लिटर फुल क्रीम दुधाची किंमत 365 रुपये असेल. याशिवाय, गायीच्या दुधाची (सात्विक) किंमतही आता 58 रुपये प्रति लिटर झाली आहे. तथापि, टोन्ड आणि गोकुळ शक्ती दुधाच्या किमती वाढणार नाहीत. दूध उत्पादकांना फायदा व्हावा म्हणून दर वाढवणे आवश्यक होते, असे युनियनने नमूद केले आहे.
हेही वाचा – 21 मेपासून रिक्षा संघटनांचं आंदोलन; प्रादेशिक परिवहन कार्यालयांसमोर निषेध आंदोलन
पराग दुधाच्या किमतीत वाढ –
अमूल, मदर डेअरी आणि गोकूळ दुधाच्या किमतीनंतर आता उत्तर प्रदेशातील दूध पुरवठा करणारी संस्था लखनऊ मिल्क युनियन (पराग) नेही दुधाच्या किमती वाढवल्या आहेत. हे नवीन दर 3 मे पासून लागू झाले आहेत. कंपनीने यासाठी खर्चात वाढ असल्याचे कारण दिले आहे.
