General Manager Of BEST: भारतीय प्रशासकीय सेवेतील वरिष्ठ अधिकारी डॉ. सोनिया सेठी यांनी 27 सप्टेंबर 2025 रोजी बृहन्मुंबई विद्युत पुरवठा आणि वाहतूक (बेस्ट) उपक्रमाच्या महाव्यवस्थापक म्हणून पदभार स्वीकारला. महाराष्ट्र कॅडरच्या 1994 बॅचच्या आयएएस अधिकारी डॉ. सेठी यांनी ऑक्सफर्ड विद्यापीठातून प्रोग्राम मॅनेजमेंटमध्ये पदव्युत्तर पदवी प्राप्त केली असून, अर्थशास्त्र आणि सार्वजनिक धोरण क्षेत्रात प्रगत शिक्षण घेतले आहे. तसेच, इन्फ्रास्ट्रक्चर फायनान्समध्ये पीएच.डी. केलेली आहे.
महाराष्ट्र आणि केंद्रातील अनुभव
डॉ. सेठी यांनी सिंधुदुर्ग जिल्हाधिकारी, सिडको, एमएसआरडीसी, महाराष्ट्र जीवन प्राधिकरण (एमजेपी) आणि मुंबई महानगर प्रदेश विकास प्राधिकरण (एमएमआरडीए) यासारख्या प्रमुख पायाभूत सुविधा संस्थांमध्ये महत्त्वाची भूमिका बजावली आहे.
पायाभूत सुविधांमध्ये योगदान
2010 मध्ये आठ-लेन वांद्रे-वरळी सी लिंक कार्यान्वित करणे तसेच मुंबई मेट्रो नेटवर्कचा 20 किमी भाग अंधेरी, डी.एन. नगर आणि दहिसरला जोडण्यात त्यांची महत्त्वाची भूमिका आहे. तथापी, अतिरिक्त मुख्य सचिव (आपत्ती व्यवस्थापन, मदत आणि पुनर्वसन) म्हणून, डॉ. सेठी यांनी राज्य आपत्कालीन ऑपरेशन सेंटर (SEOC) चे आधुनिकीकरण, जिल्हा आपत्कालीन ऑपरेशन सेंटरची स्थापना आणि राज्यातील पहिले समर्पित राज्य आपत्ती व्यवस्थापन संस्था (SIDM) बांधण्यात महत्त्वपूर्ण भूमिका बजावली.
हेही वाचा – Weather Update Today: कोकणात पावसाचा जोर वाढला, मुंबईतही मुसळधार सरी कोसळणार; 5 जिल्ह्यांना ऑरेंज अलर्ट जारी
डॉ. सेठी महाराष्ट्राच्या पहिल्या महिला राज्य परिवहन आयुक्त आहेत. त्यांनी राष्ट्रीय पातळीवर सांस्कृतिक मंत्रालय व वाणिज्य मंत्रालयात सहसचिव म्हणून काम केले आहे. डॉ. सोनिया सेठींची नियुक्ती बेस्टच्या कार्यक्षमतेत आणि पायाभूत सुविधा व्यवस्थापनात सुधारणा घडवून आणेल, अशी अपेक्षा आहे.
