Geet Ramayan Birthplace : मराठी साहित्यविश्वातील अजरामर कृती 'गीतरामायण' ज्या वास्तूमध्ये रचली गेली, त्या ग. दि. माडगूळकर यांच्या पुण्यातील 'पंचवटी' बंगल्यावरून सध्या मोठा वाद निर्माण झाला आहे. गदिमांच्या वारसांमध्येच आता या ऐतिहासिक वास्तूवरून 'महाभारत' सुरू झाले असून, हे घर पाडण्यावरून दोन गट पडल्याचे समोर येत आहे. गदिमांचे नातू सुमित्र माडगूळकर यांनी सोशल मीडियाद्वारे या वादाला वाचा फोडली असून गंभीर आरोप केले आहेत.
ऐतिहासिक वास्तू वाचवण्यासाठी नातवाचा लढा
सुमित्र माडगूळकर यांनी आपल्या पोस्टमध्ये स्पष्ट केले आहे की, ही वास्तू वाचवण्यासाठी ते शेवटपर्यंत लढा देणार आहेत. त्यांच्या मते काही जवळचे नातेवाईक केवळ पैशांच्या हव्यासापोटी हा बंगला बिल्डरला विकण्याचा प्रयत्न करत आहेत. गदिमांनी हयात असताना म्हटले होते की, जोपर्यंत 'पंचवटी' आहे तोपर्यंत त्यांचे अस्तित्व या जगात राहील. ज्या वास्तूने अनेक साहित्यिक कलाकृतींचा जन्म पाहिला, ती पाडणे हे गदिमांच्या स्मृतींचा अपमान ठरेल.
कौटुंबिक आरोप आणि बदनामीचा दावा
सुमित्र यांनी आपल्या जवळच्या नातेवाईकांवर अत्यंत गंभीर आरोप केले आहेत. ज्या लोकांनी गदिमांच्या साहित्यावर आणि या वास्तूवर मोठी पुस्तके लिहिली, तेच लोक पडद्यामागून ही वास्तू पाडण्याच्या कटात सामील असल्याचा दावा त्यांनी केला आहे. या प्रक्रियेला विरोध केल्यामुळे आपली आणि आपल्या पत्नीची जाणीवपूर्वक बदनामी केली जात असल्याचेही त्यांनी म्हटले आहे.
हेही वाचा – HC On Maternity Rights: 'महिलांना गरोदरपणामुळे नोकरी नाकारणे बेकायदेशीर…'; औरंगाबाद खंडपीठाचा ऐतिहासिक निकाल
जीवाला धोका आणि न्यायालयीन संघर्षाची तयारी
या वादात आता वैयक्तिक सुरक्षा आणि गुन्हेगारी स्वरूपाचे आरोपही समोर आले आहेत. सुमित्र यांनी असा आरोप केला आहे की, घरातील काही महिला नातेवाईक खोटे नाटे आरोप करून त्यांना दबावाखाली आणण्याचा प्रयत्न करत आहेत. इतकेच नाही तर, आपल्या आणि आपल्या कुटुंबाच्या जीवाला धोका निर्माण झाला असल्याचे सांगत, जीव गेला तरी ही वास्तू पाडू देणार नाही, असा पवित्रा त्यांनी घेतला आहे.
स्मारकाचा लढा आणि घराचे पावित्र्य
गेल्या 10 वर्षांपासून सुमित्र हे गदिमांच्या स्मारकासाठी प्रयत्नशील आहेत. त्यांच्या प्रयत्नांमुळे आता स्मारकाची इमारत पूर्ण झाली असून अंतर्गत कामे लवकरच सुरू होणार आहेत. स्मारक जितके महत्त्वाचे आहे, तितकीच 'पंचवटी' ही वास्तू त्यांच्यासाठी एका मंदिराप्रमाणे असल्याचे त्यांनी म्हटले आहे. गदिमांच्या वारशाचा केवळ नावापुरता वापर करणाऱ्यांना त्यांनी या पोस्टमधून खुले आव्हान दिले आहे.
रसिक प्रेक्षकांना मदतीचे आवाहन
गदिमांच्या लेखणीवर आणि व्यक्तिमत्वावर प्रेम करणाऱ्या जगभरातील मराठी रसिकांनी या वास्तूच्या जतनासाठी पाठिंबा द्यावा, अशी सुमित्र यांची भावना आहे. ही वास्तू वाचवण्यासाठी कोणत्याही कोर्ट केसेस किंवा त्रासाला सामोरे जाण्याची आपली तयारी असल्याचे त्यांनी जाहीर केले आहे. 'गीतरामायण' लिहिलेली ही पवित्र जागा गदिमांच्या खऱ्या स्मृतींचे प्रतीक म्हणून टिकली पाहिजे, हाच त्यांचा मुख्य उद्देश आहे.
