Tukaram Mundhe FDA : अन्न व औषध प्रशासन विभागाच्या आयुक्तपदी नियुक्ती झाल्यापासून आपल्या कडक कार्यपद्धतीने संपूर्ण राज्यात खळबळ उडवून देणारे सनदी अधिकारी तुकाराम मुंढे यांच्या बदलीची चर्चा पुन्हा एकदा रंगू लागली आहे. या संभाव्य बदलीच्या पार्श्वभूमीवर अखिल भारतीय ग्राहक पंचायतीने तीव्र आक्षेप घेतला असून मुख्यमंत्री देवेंद्र फडणवीस यांच्या नेतृत्वातील सरकारला थेट इशारा दिला आहे. मुंढे यांच्या धडक कारवाईमुळे धास्तावलेल्या बड्या व्यापारी वर्गाकडून सरकारवर राजकीय दबाव आणला जात असल्याचा आरोप ग्राहक संघटनेने केला आहे. हा दबाव झुगारून सरकारने त्यांची बदली करू नये, यासाठी आता थेट जनतेच्या दरबारात स्वाक्षरी मोहीम राबवण्याची तयारी सुरू झाली आहे.
21 वर्षांच्या सेवेत 25 बदल्या; मुंढेंच्या धडाक्याने सुस्तावलेला विभाग जागा
कडक शिस्तीचे अधिकारी म्हणून ओळखल्या जाणाऱ्या तुकाराम मुंढे यांची प्रशासकीय कारकीर्द कायमच वादळी ठरली आहे. त्यांच्या कामाची थेट आणि पारदर्शक पद्धत अनेक राजकारण्यांना व व्यापाऱ्यांना रुचत नसल्याने त्यांना वारंवार बदलीला सामोरे जावे लागते. त्यांच्या कारकिर्दीची धक्कादायक आकडेवारी आणि सद्यस्थिती पाहिल्यास आपल्या एकूण 21 वर्षांच्या प्रशासकीय सेवेमध्ये तुकाराम मुंढे यांच्या तब्बल 25 वेळा बदल्या झाल्या आहेत. बहुतांश वेळा कोणत्याही पदाचा निश्चित कार्यकाळ पूर्ण होण्याआधीच त्यांची तडकाफडकी रवानगी करण्यात आली आहे. पूर्वी वर्षभरात बोटावर मोजता येतील एवढ्याच कारवाया करणारा अन्न व औषध प्रशासन विभाग मुंढेंच्या आगमनानंतर दररोज करोडो रुपयांचा भेसळयुक्त माल जप्त करत आहे. यापूर्वी कर्मचारी आणि मनुष्यबळाच्या कमतरतेचे कारण पुढे करणारे अधिकारी आता कोणतीही सबब न सांगता दररोज धडक मोहिमा राबवत आहेत.
व्यापाऱ्यांचा दबाव झुगारण्याचे आवाहन; ग्राहक पंचायत मंत्रालयात भेटणार
अखिल भारतीय ग्राहक पंचायतीचे केंद्रीय कार्यकारिणी सदस्य विजय सागर यांनी या संदर्भात ग्राहकांच्या वतीने आपली भूमिका स्पष्ट केली आहे. मुंढे यांच्याकडून बाजारात सुरू असलेली कारवाई ही थेट सर्वसामान्य ग्राहकांच्या आरोग्य आणि कल्याणाशी संबंधित असल्याने या मोहिमेला ग्राहकांचा पूर्ण पाठिंबा आहे. व्यापारी आणि भेसळखोरांच्या दबावापुढे झुकून जर सरकारने बदलीचे पाऊल उचलले, तर राज्यभर ग्राहकांमध्ये जनजागृती करून व्यापक स्वाक्षरी मोहीम राबवली जाईल. या संपूर्ण प्रकरणी मुख्यमंत्री देवेंद्र फडणवीस यांना अधिकृत पत्र पाठवले जाणार असून, आज ग्राहक पंचायतीचे शिष्टमंडळ मंत्रालयात जाऊन स्वतः आयुक्त तुकाराम मुंढे यांची भेट घेणार आहे.
भेसळखोरांचे धाबे दणाणले; ग्राहकांच्या आरोग्यासाठी मुंढे हवेच आहेत
राज्यात दुध, अन्नपदार्थ आणि औषधांमधील भेसळ रोखण्यासाठी एफडीएने घेतलेली आक्रमक भूमिका कौतुकास्पद ठरत आहे. दररोज होणाऱ्या धाडसत्रांमुळे काळाबाजार करणाऱ्यांचे धाबे दणाणले असून बाजारपेठेत स्वच्छतेचे वातावरण निर्माण होत आहे. अशा वेळी प्रामाणिक अधिकाऱ्याची बदली केल्यास चुकीचा संदेश जाईल, अशी भीती सर्वसामान्य जनतेतून व्यक्त होत आहे. त्यामुळे आता सरकार या जनभावनेची दखल घेणार की नेहमीप्रमाणे दबाव गटाच्या प्रभावाखाली येऊन आणखी एक बदली करणार, याकडे संपूर्ण महाराष्ट्राचे लक्ष लागले आहे.
हेही वाचा – Deva Bhau Taxi Mumbai: महायुती सरकारची मोठी घोषणा; 'देवाभाऊ टॅक्सी' सेवा लवकरच मुंबईत, काय होणार फायदा?
