ठाणे: ठाणे जिल्ह्यातील बदलापूरमधून अत्यंत धक्कादायक बातमी समोर येत आहे. बदलापूर येथील 9 वर्षांच्या मुलीवर भटक्या कुत्र्याने हल्ला होता. या मुलीचा रेबीजमुळे मृत्यू झाल्याचं सांगण्यात येत आहे. मृत रितिका करोचिया ही बदलापूरमध्ये तिच्या पालकांसोबत राहत होती. 4 मे रोजी रितिका तिच्या घराजवळ मित्रांसोबत खेळत असताना भटक्या कुत्र्याने तिच्यावर हल्ला केला होता.
भटक्या कुत्र्याने रितिकावर हल्ला केल्यानंतर रस्त्यावरून जाणारे लोक आणि स्थानिक लोक तिला वाचवण्यासाठी धावले. त्यानंतर तिच्या पालकांना माहिती देण्यात आली आणि तिला बदलापूर येथील प्राथमिक आरोग्य केंद्रात नेण्यात आले, जिथे तिला रेबीजचे एक इंजेक्शन देण्यात आले. 7 मे रोजी तिला दुसरा डोस देखील देण्यात आला.
हेही वाचा – मोकाट कुत्र्यांचा 6 वर्षीय चिमुकल्यावर हल्ला; जखमी मुलावर खाजगी रूग्नालयात उपचार सुरू
तथापि, 11 मे रोजी असणाऱ्या तिसऱ्या डोससाठी ती रुग्णालयात गेली नाही. 21 मे रोजी तिची तब्येत बिघडू लागली आणि तिला एका खाजगी रुग्णालयात नेण्यात आले, जिथे डॉक्टरांनी हायड्रोफोबियाचे निदान केले. तसेच डॉक्टरांनी तिच्या पालकांना तिला मुंबईतील कस्तुरबा रुग्णालयात हलवण्याचा सल्ला दिला. दुर्दैवाने, 22 मे रोजी उपचारादरम्यान तिचा मृत्यू झाला.
हेही वाचा – मोकाट कुत्र्याचा सात वर्षीय चिमुकल्यावर हल्ला
दरम्यान, बदलापूर ग्रामीण रुग्णालयाच्या अधीक्षक ज्योत्स्ना सावंत यांनी सांगितले की, गेल्या वर्षी कुत्र्यांच्या चाव्याच्या एकूण 3324 घटना घडल्या, त्यापैकी 254 प्रकरणे गंभीर म्हणून वर्गीकृत केली गेली. शिवाय, 14 प्रकरणे उल्हासनगर येथील मध्यवर्ती रुग्णालयात प्रगत उपचारांसाठी पाठवण्यात आली. आम्हाला संशय आहे की तिचा मृत्यू रेबीजमुळे झाला. आतापर्यंत, आम्हाला मृत्यूचे अधिकृत कारण समजलेले नाही.
