Salman Khan: 'ब्लकबक: बॅटल फॉर लेगसी' (Blackbuck: Battle for Legacy) हा चित्रपट जाहीर झाल्यापासूनच मोठ्या वादात सापडला आहे. बॉलीवूडचा सुपरस्टार सलमान खान याने या चित्रपटाच्या कथेवर आणि संकल्पनेवर तीव्र आक्षेप घेतला असून, या चित्रपटाचे प्रदर्शन रोखण्यासाठी दिल्ली उच्च न्यायालयात (Delhi High Court) धाव घेतली आहे. या दाखल केलेल्या याचिकेवर आज न्यायालयात महत्त्वपूर्ण सुनावणी पार पडली. सुनावणीदरम्यान न्यायालयाने या प्रकरणाची गंभीर दखल घेत चित्रपटाचे दिग्दर्शक आणि निर्माते अमित जानी यांच्यासह इतरांना कायदेशीर नोटीस बजावली असून, त्यांना आपली बाजू मांडण्याचे आदेश दिले आहेत.
सलमानच्या वकिलांचा जोरदार युक्तिवाद
न्यायालयात सलमान खानची बाजू मांडताना त्याचे वकील निजाम पाशा यांनी जोरदार युक्तिवाद केला. ते म्हणाले, "चित्रपट निर्मात्यांनी 29 मे रोजी या चित्रपटाचे एक पोस्टर जारी केले होते. या पोस्टरमध्ये हुबेहूब सलमान खानसारखा दिसणारा आणि त्याच्यासारखाच पेहराव केलेला एक व्यक्ती दाखवण्यात आला आहे." वकिलांनी न्यायालयाचे लक्ष वेधले की, या संपूर्ण प्रकरणाशी संबंधित एकूण 4 एफआयआर (FIR) पैकी 3 प्रकरणांमध्ये सलमान खानची न्यायालयाने यापूर्वीच निर्दोष मुक्तता केली आहे. असे असतानाही, त्याची ओळख आणि प्रतिमेचा गैरवापर करून हा चित्रपट तयार केला जात आहे, जे थेट सलमान खानच्या 'व्यक्तिमत्व अधिकारांचे' (Personality Rights) उल्लंघन आहे.
चित्रपटाचा प्रकल्पच थांबवण्याची मागणी
सलमान खानच्या वकिलांनी न्यायालयात 'ब्लकबक' चित्रपटाच्या प्रदर्शनावर तात्काळ स्थगिती आणण्याची मागणी केली आहे. प्रसारमाध्यमांमध्ये दररोज सलमान खानचे नाव नाहक या प्रकरणाशी जोडले जात असल्याचा दावा वकिलांनी केला. आजच सकाळी या चित्रपटाचा ट्रेलर प्रदर्शित करण्यात आल्याची माहिती देत वकिलांनी न्यायालयाला विनंती केली की, "या चित्रपटाची अधिकृत रिलीज डेट अद्याप निश्चित झालेली नसली, तरी चित्रपटाचा प्रचार आणि प्रदर्शन रोखण्याचे आदेश देण्यात यावेत. आम्हाला हा संपूर्ण प्रकल्पच थांबवायचा आहे."
आता 19 जून रोजी होणार पुढील सुनावणी
सलमान खानच्या वकिलांचा युक्तिवाद ऐकल्यानंतर दिल्ली उच्च न्यायालयाने आपली भूमिका स्पष्ट केली. "प्रथम दुसऱ्या पक्षाला नोटीस बजावणे अत्यंत आवश्यक आहे; त्यांची बाजू ऐकून घेतल्याशिवाय न्यायालय कोणताही एकतर्फी आदेश देऊ शकत नाही," असे निरीक्षण न्यायालयाने नोंदवले. यानंतर न्यायालयाने चित्रपट निर्माते अमित जानी आणि संबंधित इतर घटकांना नोटीस पाठवून त्यांचे उत्तर मागवले आहे. या हायप्रोफाईल प्रकरणाची पुढील सुनावणी आता 19 जून रोजी होणार असून, संपूर्ण बॉलीवूडचे लक्ष याकडे लागले आहे.
