Oman Tanker Attack: ओमानच्या सागरी हद्दीतून भारताची चिंता वाढवणारी एक अत्यंत धक्कादायक बातमी समोर आली आहे. ओमानच्या किनाऱ्याजवळ एका मोठ्या व्यापारी ऑईल टँकरवर अचानक भीषण हल्ला झाला आहे. या हल्ल्यामुळे जहाजाच्या इंजिन रूममध्ये मोठा स्फोट होऊन संपूर्ण इंजिन रूम आगीच्या भक्ष्यस्थानी पडली आहे. सर्वात चिंतेची बाब म्हणजे या जहाजावर भारतीय कर्मचारी तैनात असून त्यांचे प्राण धोक्यात आले आहेत. नुकत्याच मिळालेल्या माहितीनुसार, या दुर्घटनेत टँकरवरील 2 कर्मचारी समुद्रात बेपत्ता झाले असून, 1 जण गंभीर जखमी झाला आहे.
'सेटोबेलो' टँकरवर सोहार बंदराजवळ भीषण स्फोट
ही गंभीर घटना ओमानच्या सोहार बंदरापासून (Sohar Port) सुमारे 20 नॉटिकल मैल अंतरावर खोल समुद्रात घडली. 'सेटोबेलो' (Setobello) नावाचा हा रासायनिक आणि ऑईल टँकर 'पलाऊ' देशाचा ध्वज लावून प्रवास करत होता. जहाज आपल्या निर्धारित मार्गावरून जात असतानाच अचानक एका अज्ञात शक्तीने त्यावर हल्ला केला आणि जोरदार स्फोट झाला. स्फोटाची तीव्रता इतकी भयानक होती की जहाजातून काळ्या धुराचे प्रचंड लोट आकाशात उठू लागले आणि जहाजावर एकच घबराट पसरली.
भारतीय दूतावास अॅक्टिव्ह; युद्धपातळीवर बचावकार्य सुरू
घटनेनंतर जहाजावरून तातडीने 'डिस्ट्रेस सिग्नल' पाठवण्यात आला. हा संदेश मिळताच ओमानचे नौदल (Oman Navy) आणि आंतरराष्ट्रीय सुरक्षा यंत्रणांनी घटनास्थळाकडे धाव घेत युद्धपातळीवर बचावकार्य सुरू केले आहे. टँकरवर भारतीय खलाशी असल्याने दिल्लीतील परराष्ट्र आणि सुरक्षा वर्तुळात वेगाने हालचाली सुरू झाल्या आहेत. मस्कत येथील भारतीय दूतावास ओमानच्या वरिष्ठ अधिकाऱ्यांच्या सतत संपर्कात असून, भारतीय कर्मचाऱ्यांच्या सुरक्षिततेसाठी सर्वतोपरी प्रयत्न केले जात आहेत.
हेही वाचा – Army Mi-17 Chopper Crash: मोठी बातमी! लष्कराचं Mi-17 हेलिकॉप्टर कोसळलं; सर्व जवानांचा मृत्यू
खवळलेल्या समुद्रात बेपत्ता 2 कर्मचाऱ्यांचा शोध सुरू
या हल्ल्यातील स्फोटानंतर जहाजावर झालेल्या प्रचंड गोंधळात 2 व्यक्ती समुद्रात बेपत्ता झाल्या आहेत. बेपत्ता झालेल्या कर्मचाऱ्यांचा शोध घेण्यासाठी ओमान नौदल आणि तटरक्षक दलाकडून हेलिकॉप्टर्सच्या साहाय्याने मोठी शोधमोहीम राबवली जात आहे. मात्र, सोसाट्याचा वारा आणि खवळलेल्या समुद्रामुळे या मोहिमेत मोठे अडथळे येत आहेत. बेपत्ता झालेले नागरिक भारतीय आहेत की अन्य देशांचे, याबाबत अद्याप अधिकृत माहिती समोर आलेली नाही. दरम्यान, या घटनेत गंभीर जखमी झालेल्या 1 खलाशाला तातडीने उपचारासाठी रुग्णालयात दाखल करण्यात आले आहे. या हल्ल्यामुळे जागतिक सागरी व्यापार मार्गावर कमालीचा तणाव निर्माण झाला आहे.
