PM Kisan Yojana: प्रधानमंत्री किसान सन्मान निधी योजनेच्या लाभार्थ्यांसाठी एक अत्यंत महत्त्वाची बातमी आहे. या योजनेचा बहुप्रतीक्षित 23 वा हप्ता येत्या शनिवारी, 20 जून रोजी शेतकऱ्यांच्या खात्यात जमा केला जाणार आहे. मात्र, या दिवशी शनिवार असल्याने बँका चालू असतील की बंद, याबाबत देशातील लाखो शेतकऱ्यांमध्ये संभ्रमाचे वातावरण आहे. तुम्हीही पीएम किसान योजनेचे लाभार्थी असाल, तर तुमच्या या प्रश्नाचे सविस्तर उत्तर खालीलप्रमाणे आहे.
20 जून रोजी बँका सुरू राहणार की बंद?
भारतीय रिझर्व्ह बँकेच्या (RBI) नियमांनुसार, देशभरातील बँकांना दर रविवारी आणि महिन्याच्या दुसऱ्या व चौथ्या शनिवारी सुट्टी असते. या व्यतिरिक्त इतर शनिवारी बँकांचे कामकाज नियमितपणे सुरू असते. या आठवड्यात येणारा शनिवार म्हणजेच 20 जून हा चालू महिन्याचा तिसरा शनिवार आहे. त्यामुळे नियमानुसार या दिवशी बँका पूर्णपणे उघड्या राहतील. शेतकरी आणि इतर ग्राहक कोणत्याही अडचणीशिवाय बँकेत जाऊन आपले व्यवहार करू शकतील.
शेतकऱ्यांच्या खात्यात जमा होणार 2,000 रुपये
पश्चिम बंगालमधील हुगळी जिल्ह्यातील तारकेश्वर येथून शनिवार, 20 जून रोजी पीएम किसान योजनेचा 23 वा हप्ता अधिकृतपणे जारी केला जाणार आहे. या दिवशी देशातील 9 कोटींहून अधिक पात्र शेतकऱ्यांच्या बँक खात्यात एकाच वेळी प्रत्येकी 2,000 रुपयांची रक्कम थेट हस्तांतरित (DBT) केली जाईल. 20 जून रोजी तिसरा शनिवार असल्याने बँका चालू राहणार आहेत, ज्यामुळे शेतकरी थेट बँकेत जाऊनही आपले पैसे काढू शकतात. याशिवाय एटीएम (ATM) किंवा यूपीआय (UPI) चा वापर करूनही ही रक्कम काढता येईल.
आतापर्यंत 4.28 लाख कोटी रुपयांचे वाटप
केंद्र सरकारने 2019 मध्ये देशपातळीवर 'पीएम किसान सन्मान निधी योजना' सुरू केली होती. या योजनेचा उद्देश अल्पभूधारक शेतकऱ्यांना आर्थिक हातभार लावणे हा आहे. योजना सुरू झाल्यापासून आतापर्यंत तब्बल 9.44 कोटींहून अधिक शेतकऱ्यांच्या खात्यांवर 4.28 लाख कोटी रुपयांपेक्षा जास्त निधी थेट वर्ग करण्यात आला असून, ही योजना शेतकऱ्यांसाठी अत्यंत आधारवड ठरली आहे.
