वारंवार पिन विसरणाऱ्यांना दिलासा; आता फिंगरप्रिंटने करा UPI पेमेंट, BHIM अ‍ॅपमध्ये नवीन बायोमेट्रिक फिचर लाँच, मोबाईलमध्ये कसं सुरू कराल?

BHIM UPI Fingerprint Digital Payment : डिजिटल पेमेंटच्या जगात अधिक वेग आणि सुरक्षितता आणण्यासाठी BHIM अ‍ॅपने एक क्रांतिकारी पाऊल उचलले आहे. आता युजर्सना प्रत्येक छोट्या व्यवहारासाठी UPI पिन टाकण्याची गरज भासणार नाही. नॅशनल पेमेंट्स कॉर्पोरेशन ऑफ इंडियाने (NPCI) आपल्या BHIM अ‍ॅपमध्ये बायोमेट्रिक ऑथेंटिकेशनचे नवीन फिचर लाँच केले आहे, ज्यामुळे केवळ फिंगरप्रिंट किंवा फेस लॉकद्वारे पेमेंट करणे शक्य होणार आहे.

पिनशिवाय 5,000 रुपयांपर्यंतचे व्यवहार
BHIM अ‍ॅपच्या या नवीन सुविधेमुळे युजर्सना मोठा दिलासा मिळाला आहे. अनेकदा गर्दीच्या ठिकाणी किंवा घाईत असताना UPI पिन टाकणे गैरसोयीचे ठरते किंवा अनेकजण पिन विसरल्यामुळे पेमेंट फेल होते. यावर उपाय म्हणून हे फिचर आणले गेले आहे:
– मर्यादा: युजर्स केवळ फिंगरप्रिंट किंवा फेस आयडी वापरून 5,000 रुपयांपर्यंतचे पेमेंट करू शकतील.
– सुरक्षा: 5,000 रुपयांपेक्षा जास्त रकमेच्या व्यवहारांसाठी मात्र जुन्या पद्धतीनुसार UPI पिन टाकणे अनिवार्य असेल.
– उपलब्धता: हे फिचर अँड्रॉइड (Android) आणि iOS अशा दोन्ही प्लॅटफॉर्मवर उपलब्ध करून देण्यात आले आहे.

सुरक्षा आता अधिक भक्कम
बायोमेट्रिक फिचर केवळ सोयीचे नाही, तर सुरक्षिततेच्या दृष्टीनेही अत्यंत महत्त्वाचे आहे. UPI पिन कोणालाही दिसू शकतो किंवा चोरीला जाऊ शकतो, परंतु फिंगरप्रिंट आणि फेस डेटा हा प्रत्येक व्यक्तीसाठी वेगळा असतो. हा डेटा मोबाईलमध्येच सुरक्षित (Encypted) राहत असल्याने सायबर फसवणुकीची शक्यता लक्षणीयरीत्या कमी होते. क्यूआर (QR) कोड स्कॅन करून पेमेंट करताना किंवा मित्रांना पैसे पाठवताना हे फिचर अत्यंत उपयुक्त ठरेल.

हेही वाचा – आता Social Media आणि Gaming Appsवर खरी ओळखच द्यावी लागणार! सायबर गुन्हेगारांना चाप लावण्यासाठी सरकारचा मास्टरप्लॅन

हे नवीन फिचर कसे सुरू करावे?
जर तुम्हाला तुमच्या BHIM अ‍ॅपमध्ये ही सुविधा सुरू करायची असेल, तर खालील सोप्या स्टेप्स फॉलो करा:
– तुमच्या मोबाईलमधील BHIM अ‍ॅप उघडा आणि तुमच्या प्रोफाईल विभागात जा.
– तुमचा जो बँक खाते क्रमांक लिंक आहे, त्यावर क्लिक करा.
– तेथे तुम्हाला 'बायोमेट्रिक ट्रान्झॅक्शन' (Biometric Transaction) हा पर्याय दिसेल, तो 'ऑन' करा.
– तुमच्या मोबाईलचा फिंगरप्रिंट किंवा फेस लॉक वापरून याची खातरजमा करा.
– एकदा का हे सेट झाले की, तुम्ही पिन न टाकता झटपट पेमेंट करू शकाल.

डिजिटल इंडियाच्या दिशेने मोठे पाऊल
रिझर्व्ह बँकेने (RBI) नुकत्याच जाहीर केलेल्या टू-फॅक्टर ऑथेंटिकेशनच्या नियमावलीनुसार, हे बदल अत्यंत महत्त्वाचे मानले जात आहेत. यामुळे तांत्रिक बिघाडामुळे अडकणारे व्यवहार कमी होतील आणि ग्रामीण भागातील लोकांसाठीही डिजिटल पेमेंट वापरणे सोपे होईल. BHIM अ‍ॅपमधील या बदलामुळे इतर पेमेंट्स अ‍ॅप्सवरही अशाच प्रकारचे अपडेट्स लवकरच येण्याची शक्यता वर्तवली जात आहे.

हेही वाचा – RBI MPC Meeting 2026: गृहकर्ज घेणाऱ्यांसाठी मोठी बातमी, 'या' दिवशी होणार RBI ची पहिली बैठक; रेपो दरात कपात होणार का? वाचा