Amruta Fadnavis Resign : महाराष्ट्राचे मुख्यमंत्री देवेंद्र फडणवीस यांच्या पत्नी आणि ज्येष्ठ बँकर अमृता फडणवीस यांनी आपल्या व्यावसायिक आयुष्यातील एका मोठ्या अध्यायाला पूर्णविराम दिला आहे. अॅक्सिस बँकेत तब्बल 23 वर्षांची प्रदीर्घ सेवा बजावल्यानंतर त्यांनी आपल्या वरिष्ठ उपाध्यक्ष (Senior Vice President) पदाचा राजीनामा दिला आहे. 19 फेब्रुवारी 2026 रोजी त्यांनी सोशल मीडियाच्या माध्यमातून ही माहिती शेअर करत आपल्या भावनांना वाट मोकळी करून दिली.
प्रशिक्षणार्थी ते वरिष्ठ नेतृत्व: एक यशस्वी प्रवास
अमृता फडणवीस यांनी 2003 मध्ये अॅक्सिस बँकेत एक सामान्य ‘मॅनेजमेंट ट्रेनी’ (Management Trainee) म्हणून आपल्या कारकिर्दीची सुरुवात केली होती. आपल्या कामातील मेहनत, सातत्य आणि व्यावसायिक कौशल्याच्या जोरावर त्यांनी बँकेत विविध महत्त्वाची पदे भूषवली. ब्रँच ऑपरेशन्सपासून कॉर्पोरेट बँकिंगपर्यंत आणि ट्रेझरीपासून कस्टमर रिलेशन्सपर्यंत त्यांनी बँकेच्या अनेक विभागांत मोलाचे योगदान दिले. एका प्रशिक्षणार्थी पदापासून सुरू झालेला हा प्रवास बँकेच्या वरिष्ठ नेतृत्वापर्यंत पोहोचला, जो अनेक कॉर्पोरेट महिलांसाठी प्रेरणादायी आहे.
‘अॅक्सिस बँक माझे दुसरे घर’
राजीनामा देताना अमृता फडणवीस यांनी अत्यंत भावूक पोस्ट लिहिली आहे. त्या म्हणाल्या, “अॅक्सिस बँक ही संस्था माझ्यासाठी केवळ कामाचे ठिकाण नव्हते, तर ती माझे कुटुंब, शिक्षक आणि दुसरे घर राहिली आहे. इथून बाहेर पडताना माझे हृदय कृतज्ञतेने भरलेले आहे.” त्यांनी आपल्या प्रदीर्घ प्रवासात सहकार्य करणाऱ्या सर्व सहकाऱ्यांचे आणि मार्गदर्शकांचे आभार मानले. विशेषतः बँकेचे व्यवस्थापकीय संचालक आणि मुख्य कार्यकारी अधिकारी अमिताभ चौधरी यांनी दिलेल्या संधीबद्दल त्यांनी कृतज्ञता व्यक्त केली.
23 years ago, I walked into Axis Bank as a young Management Trainee. Today, I sign off as Senior Vice President, with a heart full of gratitude. With experience spanning branch operations to corporate banking , treasury to customer relations , this institution has been my family,… pic.twitter.com/Mo2171NBi2 — AMRUTA FADNAVIS (@fadnavis_amruta) February 19, 2026
स्वतंत्र ओळखीचा आदर्श
देवेंद्र फडणवीस राज्याचे मुख्यमंत्री असतानाही अमृता फडणवीस यांनी आपली खासगी क्षेत्रातील नोकरी आणि व्यावसायिक कारकीर्द कधीही सोडली नाही. ‘मिसेस मुख्यमंत्री’ ही ओळख असतानाही त्यांनी कॉर्पोरेट क्षेत्रात आपली स्वतंत्र मुद्रा उमटवली. त्या केवळ बँकिंगमध्येच नव्हे, तर शास्त्रीय गायन, सामाजिक उपक्रम आणि सांस्कृतिक क्षेत्रातही तितक्याच सक्रिय आहेत. राजकीय कुटुंबात असूनही स्वतःचे व्यावसायिक अस्तित्व टिकवून ठेवल्याबद्दल त्यांचे अनेकदा कौतुकही झाले आहे.
नव्या प्रवासाची नांदी?
अमृता फडणवीस यांनी नोकरीचा राजीनामा दिल्यानंतर आता त्या पूर्णवेळ सामाजिक कार्यात आणि संगीत क्षेत्रात सक्रिय होणार असल्याची चर्चा आहे. ‘प्रोजेक्ट दिशा’ सारख्या उपक्रमांतून त्या महिला सशक्तीकरणासाठी आधीच काम करत आहेत. आता व्यावसायिक जबाबदारीतून मुक्त झाल्यानंतर त्या अधिक जोमाने समाजसेवा आणि आपली गायनाची आवड जपतील, अशी शक्यता वर्तवण्यात येत आहे. त्यांच्या या निर्णयामुळे एका यशस्वी कॉर्पोरेट कारकिर्दीची सांगता झाली असून, आयुष्याच्या नव्या वळणावर त्या कशा प्रकारे समोर येतात, याकडे सर्वांचे लक्ष लागले आहे.
