Iran US Conflict: अमेरिकेचे राष्ट्राध्यक्ष डोनाल्ड ट्रम्प यांनी इराणसोबत 'विधायक चर्चा' सुरू असल्याचा दावा केल्यानंतर, इराणने अत्यंत कठोर शब्दांत प्रत्युत्तर दिले आहे. इराणच्या लष्करी अधिकाऱ्यांनी अमेरिकेचे राजनैतिक प्रयत्न म्हणजे केवळ एक 'दिखावा' असल्याचे सांगून ते फेटाळून लावले आहेत. इराणचे सरकारी माध्यम 'प्रेस टीव्ही' नुसार, खतम अल-अंबिया केंद्रीय मुख्यालयाचे प्रवक्ते लेफ्टनंट कर्नल इब्राहिम झोल्फाकारी यांनी स्पष्ट केले की, अमेरिकेचा जागतिक प्रभाव आता संपुष्टात आला असून त्यांच्या तथाकथित धोरणात्मक शक्तीचे आता पराभवात रूपांतर झाले आहे.
48 तासांचा अल्टिमेटम आणि अमेरिकेची माघार
इराणच्या वीज प्रकल्पांवर हल्ले करण्यासाठी अमेरिकेने दिलेला 48 तासांचा अल्टिमेटम मागे घेतल्यानंतर इराणची ही आक्रमक भूमिका समोर आली आहे. इराणने इशारा दिला होता की, जर अमेरिकेने कोणताही आक्रमकपणा दाखवला, तर प्रत्युत्तर म्हणून संपूर्ण प्रदेशातील अमेरिकेच्या प्रत्येक ऊर्जा आणि वीज केंद्राला लक्ष्य केले जाईल. या धमकीनंतर अमेरिकेच्या भूमिकेत बदल झाला. यावर भाष्य करताना झोल्फाकारी म्हणाले, "जगाची स्वयंघोषित महासत्ता जर या पेचप्रसंगातून सुटू शकली असती, तर तिने आतापर्यंत तसे केले असते. तुमच्या पराभवाला 'करार' असे नाव देऊ नका."
ट्रम्प यांचा 'ट्रुथ सोशल'वरील दावा फेटाळला
राष्ट्राध्यक्ष ट्रम्प यांनी त्यांच्या 'ट्रुथ सोशल' या व्यासपीठावर दावा केला होता की, गेल्या 2 दिवसांत दोन्ही देशांमध्ये अतिशय चांगली आणि विधायक चर्चा झाली आहे. मात्र, तेहरानमधील विश्वासार्ह सूत्रांनी या दाव्याला छेद दिला आहे. दोन्ही राजधानींमध्ये कोणताही अधिकृत संवाद झालेला नसल्याचे इराणने स्पष्ट केले. झोल्फाकारी यांनी अमेरिकन प्रशासनातील अंतर्गत गोंधळाची थट्टा करताना उपरोधिक प्रश्न विचारला की, "तुमच्यातील अंतर्गत कलहाची पातळी स्वतःशीच वाटाघाटी करण्याच्या पोहोचली आहे का?"
दरम्यान, प्रादेशिक सुरक्षेबाबत बोलताना इराणने पाश्चात्य हितसंबंधांसाठी धोक्याची घंटा वाजवली आहे. अमेरिकेच्या गुंतवणुकीची पूर्वीची पातळी किंवा तेल आणि उर्जेच्या जुन्या किमती आता कधीही परत येणार नाहीत, असे त्यांनी ठामपणे सांगितले. "या प्रदेशातील स्थिरता आमच्या सशस्त्र दलांच्या शक्तिशाली हाताने सुनिश्चित केली जाते," असे म्हणत त्यांनी या परिस्थितीला आमच्या सामर्थ्याद्वारे स्थिरता असे संबोधले. जोपर्यंत इराणविरुद्ध लष्करी कारवाई करण्याचा विचार अमेरिकेच्या मनातून पूर्णपणे पुसला जात नाही, तोपर्यंत कोणत्याही तडजोडीची शक्यता नसल्याचे इराणने पुन्हा एकदा स्पष्ट केले आहे.
