Toothpaste Controversy: देवरिया पोलिसांच्या कार्यपद्धतीवर प्रश्नचिन्ह उपस्थित करणारी एक धक्कादायक घटना समोर आली आहे. माजी आयपीएस (IPS) अधिकारी अमिताभ ठाकूर यांना अटकेदरम्यान जप्त केलेल्या वस्तूंपैकी 'टूथपेस्ट' आणि रोख रक्कम परत न केल्यामुळे हे प्रकरण आता थेट न्यायालयात पोहोचले आहे. विशेष म्हणजे, पिन-लॉक असलेला मोबाईल फोन पोलिसांनी अनलॉक करून परत केल्याने या प्रकरणातील गुंतागुंत अधिक वाढली आहे.
काय आहे नेमकं प्रकरण?
माजी आयपीएस अधिकारी अमिताभ ठाकूर यांना 9 आणि 10 डिसेंबरच्या रात्री शाहजहांपूर येथे रेल्वेतून अटक करण्यात आली होती. अटकेच्या वेळी देवरिया कोतवाली पोलिसांनी त्यांच्याकडून अंदाजे 42,000 रुपये रोख, दोन अँड्रॉइड मोबाईल फोन, लॅपटॉप, कपडे आणि टूथपेस्ट जप्त केली होती. मात्र, काही काळानंतर जेव्हा पोलिसांनी जप्त केलेल्या वस्तू परत केल्या, तेव्हा त्यातून रोख रक्कम आणि टूथपेस्ट गायब असल्याचे समोर आले.
संशयाची सुई टूथपेस्टवर का?
दिसायला हे प्रकरण क्षुल्लक वाटत असले, तरी अमिताभ ठाकूर यांचे वकील भीमसेन राव आणि प्रवीण द्विवेदी यांनी यात मोठ्या कटाचा संशय व्यक्त केला आहे. वकिलांच्या मते, "जर साधी टूथपेस्टची ट्यूबही पोलिसांनी परत केली नसेल, तर त्यात नक्कीच काहीतरी छेडछाड झाली असण्याची शक्यता आहे. टूथपेस्टच्या ट्यूबमध्ये दुसरे काहीतरी भरून नंतर अडकवण्याचा प्रयत्न होऊ शकतो का?" अशी भीतीही त्यांनी व्यक्त केली आहे.
मोबाईल अनलॉक झाल्याने गोपनीयता धोक्यात
सर्वात गंभीर बाब म्हणजे, जप्त केलेला 'विवो' कंपनीचा मोबाईल फोन जो अटकेवेळी पिन-लॉक होता, तो परत मिळताना अनलॉक स्थितीत आढळला. या फोनवरून युपीआय (UPI) आणि इतर डिजिटल व्यवहार केले जात होते. पोलिसांकडे असताना फोन अनलॉक कसा झाला? त्यात काही तांत्रिक फेरफार करण्यात आला का? असे गंभीर प्रश्न उपस्थित झाले असून यामुळे खाजगी गोपनीयतेचा भंग झाल्याचा आरोप करण्यात आला आहे.
न्यायालयात धाव; 23 जानेवारीला सुनावणी
या प्रकरणी अमिताभ ठाकूर यांच्या वतीने देवरिया येथील मुख्य न्यायदंडाधिकारी (CJM) न्यायालयात दाद मागण्यात आली आहे. पोलिसांनी दिलेल्या रोख रकमेतही मोठी तफावत असून 42 हजारांपैकी केवळ 7,208 रुपये परत करण्यात आले आहेत. न्यायालयाने या प्रकरणाची गंभीर दखल घेतली असून देवरिया पोलिसांकडून सविस्तर अहवाल मागवला आहे. या प्रकरणाची पुढील सुनावणी 23 जानेवारी रोजी होणार आहे. 1992 च्या बॅचचे आयपीएस अधिकारी राहिलेल्या अमिताभ ठाकूर यांनी देवरियाचे एसपी म्हणून काम केले आहे. औद्योगिक क्षेत्रातील जमीन पत्नीच्या नावे फसवणुकीने केल्याच्या आरोपावरून त्यांच्यावर गुन्हा दाखल आहे. मात्र, सध्या वस्तूंच्या अफरातफरीमुळे हे 'टूथपेस्ट' प्रकरण संपूर्ण राज्यात चर्चेचा विषय बनले आहे.
