Indian Railway Special Trains : भारतीय रेल्वेचे जाळे जगभरात पसरलेले असून प्रत्येक रेल्वे स्टेशनची आपली एक खासियत असते. मात्र, पंजाबमधील फिरोजपूर आणि हुसैनीवाला सीमेजवळ असलेले ‘हुसैनीवाला’ रेल्वे स्टेशन हे भारतातील सर्वात अनोखे स्टेशन ठरले आहे. सोशल मीडियावर व्हायरल होत असलेल्या एका व्हिडिओनुसार, या स्टेशनवर वर्षभरातून केवळ 2 वेळाच रेल्वे येते. या मार्गावरील हा शेवटचा टप्पा असून, यापुढे रेल्वे जात नाही. भारत-पाकिस्तान सीमेजवळ असलेल्या या स्थानकाचे ऐतिहासिक महत्त्व अत्यंत मोठे आहे.
23 मार्च आणि शहीद दिनाचे महत्त्व
हुसैनीवाला रेल्वे स्टेशनवर चालणारी ही विशेष रेल्वे सेवा वर्षभरात फक्त दोन महत्त्वाच्या दिवशीच सुरू केली जाते. त्यामागे ऐतिहासिक आणि भावनिक कारण आहे. 23 मार्च हा दिवस भगत सिंह, राजगुरु आणि सुखदेव यांचा ‘शहीद दिन’ म्हणून पाळला जातो. या दिवशी हजारो लोक हुसैनीवाला येथे हुतात्म्यांना श्रद्धांजली अर्पण करण्यासाठी येतात. प्रवाशांची होणारी ही मोठी गर्दी लक्षात घेऊन रेल्वे प्रशासन या दिवशी विशेष गाडी चालवते.
13 एप्रिल आणि वैशाखीचा उत्सव
दुसऱ्यांदा ही रेल्वे 13 एप्रिल रोजी म्हणजेच ‘वैशाखी’ सणानिमित्त चालवली जाते. पंजाबातील हा सर्वात मोठा उत्सव असल्याने भाविकांची आणि पर्यटकांची तिथे मोठी गर्दी असते. लोकांच्या श्रद्धा आणि ऐतिहासिक महत्त्वामुळे या दोन विशिष्ट तारखांनाच ही रेल्वे सेवा सुरू केली जाते. इतर दिवसांमध्ये हे स्टेशन शांत असते आणि इथे कोणतीही प्रवासी रेल्वे सेवा उपलब्ध नसते.
सोशल मीडियावरील व्हायरल व्हिडिओ
इन्स्टाग्रामवरील एका प्रसिद्ध ब्लॉगरने या स्टेशनचा व्हिडिओ शेअर केला असून, त्यात त्याने या अनोख्या स्टेशनची माहिती दिली आहे. या व्हिडिओमध्ये त्याने हुसैनीवाला स्टेशनच्या भौगोलिक स्थितीबद्दल आणि तेथील मर्यादित रेल्वे सेवेबद्दल सविस्तर माहिती दिली आहे. या व्हिडिओला नेटकऱ्यांकडून मोठी पसंती मिळत असून, अनेकांनी या ऐतिहासिक ठिकाणाला भेट देण्याची इच्छा व्यक्त केली आहे. भारत-पाक सीमेवरील हे शेवटचे स्टेशन प्रवाशांसाठी आकर्षणाचे केंद्र ठरले आहे.
