Health Emergency after Fever and Cough : आरोग्याकडे केलेले थोडेसे दुर्लक्ष कधी जीवघेणे ठरू शकते, याचे धक्कादायक उदाहरण नुकतेच समोर आले आहे. एका 15 वर्षांच्या मुलाला सतत येणारा ताप आणि खोकला घरच्यांनी सामान्य समजला, मात्र हीच चूक त्याच्या जिवावर बेतली. गेल्या महिनाभरापासून त्याला ही लक्षणे जाणवत होती आणि त्याचे वजनही वेगाने घटत होते. तरीही योग्य वैद्यकीय उपचार घेण्याऐवजी केवळ घरगुती किंवा प्राथमिक उपचारांवर भर दिल्याने त्याची प्रकृती खालावली आणि शेवटी त्याला थेट व्हेंटिलेटरवर घ्यावे लागले.
रुग्णालयातील गंभीर स्थिती आणि निदान
जेव्हा या मुलाला इमर्जन्सी रूममध्ये दाखल करण्यात आले, तेव्हा त्याची स्थिती अत्यंत चिंताजनक होती. डॉ. रवींद्र कुलकर्णी यांनी दिलेल्या माहितीनुसार, रुग्णालयात पोहोचल्यावर त्या मुलाची हृदयगती (Heart Rate) 180 पर्यंत पोहोचली होती आणि रक्तातील ऑक्सिजनची पातळी केवळ 60% इतकी खाली घसरली होती. तीव्र श्वासोच्छ्वासाच्या त्रासामुळे त्याला तातडीने व्हेंटिलेटर लावावा लागला. एक्स-रे तपासणी केल्यानंतर त्याला ‘पल्मोनरी कोक्स’ म्हणजेच फुफ्फुसाचा क्षयरोग (TB) झाल्याचे आणि त्यामुळे शरीरात गंभीर गुंतागुंत निर्माण झाल्याचे निदान झाले.
पालकांनी केलेली ‘ती’ चूक
या मुलाच्या बाबतीत सर्वात मोठी चूक म्हणजे लक्षणांकडे झालेले दुर्लक्ष. गेल्या 30 दिवसांपासून त्याला ताप आणि खोकला असतानाही पालकांना वाटले की हे काहीतरी साधे असावे. होमिओपॅथी किंवा इतर पर्यायी उपचार सुरू होते, मात्र लक्षणांची तीव्रता कमी होण्याऐवजी वाढतच गेली. जेव्हा दोन दिवसांपासून त्याला श्वास घेण्यास अडचण येऊ लागली, तेव्हा कुठे धोक्याची घंटा वाजली. तरुण वयात काही होणार नाही, हा गैरसमज आणि वेळेवर तज्ज्ञ डॉक्टरांचा सल्ला न घेणे या मुलाच्या मुळावर आले.
तज्ज्ञांचा सतर्कतेचा इशारा
वैद्यकीय तज्ज्ञांच्या मते, तारुण्य हे कोणत्याही आजारापासून सुरक्षिततेचे प्रमाणपत्र नाही. क्षयरोगासारखा आजार कोणत्याही वयोगटातील व्यक्तीला गाठू शकतो. जर 2 ते 3 आठवड्यांपेक्षा जास्त काळ ताप किंवा खोकला टिकून राहत असेल, तर विलंब न करता डॉक्टरांकडे धाव घेणे आवश्यक आहे. विशेषतः मुलांमध्ये वजन कमी होणे हे गंभीर आजाराचे लक्षण असू शकते. उपचारात अपेक्षित सुधारणा दिसत नसेल, तर त्वरित तज्ज्ञांचे दुसरे मत (Second Opinion) घेण्यास संकोच करू नका, कारण वेळेवर घेतलेला निर्णय व्हेंटिलेटरची वेळ टाळू शकतो.
ER मध्ये आलेला एक 15 वर्षांचा मुलगा… गेल्या 1 महिन्यापासून
ताप, खोकला, वजन घटणं सुरू होतं.
गेल्या २ दिवसांत श्वास लागायला लागला. घरात सगळ्यांना वाटलं ,
“काहीतरी साधं असेल.”
एक homeopathic सल्ला सुरू होता
(कोणत्याही pathy बद्दल आक्षेप नाही). पण आजार थांबला नव्हता.
तो वाढत… pic.twitter.com/sbpxV0Z1dE — Dr Ravindra L. Kulkarni MD (@KulkarniRL) January 5, 2026
आजही क्षयरोगाचे प्रमाण आपल्या समाजात मोठे आहे, परंतु वेळीच निदान झाल्यास तो पूर्णपणे बरा होऊ शकतो. या मुलाच्या प्रकरणातून एकच धडा मिळतो की, कोणताही शारीरिक त्रास सहन करत बसू नका. आवश्यक चाचण्या जसे की एक्स-रे किंवा रक्त तपासणी वेळेत केल्यास आजाराचा प्रसार रोखता येतो. सध्या या मुलावर उपचार सुरू असून पुढील काही तास त्याच्यासाठी निर्णायक आहेत.
(Disclaimer : ही बातमी केवळ माहितीच्या आणि जागरूक करण्याच्या उद्देशाने दिली आहे. यातून जय महाराष्ट्र कोणताही दावा करत नाही किंवा हमी देत नाही. आरोग्य समस्यांवर तज्ज्ञांचा सल्ला घ्यावा.)
