Tamil Nadu Elections 2026: तमिळनाडूच्या राजकीय भविष्याचा फैसला करण्यासाठी आज, 23 एप्रिल 2026 (गुरुवार) रोजी राज्यातील सर्व 234 मतदारसंघांमध्ये एकाच टप्प्यात उत्साहात मतदान पार पडले. सकाळपासूनच मतदान केंद्रांवर मतदारांच्या लांबच लांब रांगा पाहायला मिळाल्या. विशेष म्हणजे, दक्षिण भारतीय चित्रपटसृष्टीतील दिग्गज कलाकार, अभिनेते आणि दिग्दर्शकांनी सामान्य नागरिकांप्रमाणेच रांगेत उभे राहून आपला मतदानाचा हक्क बजावला, ज्यामुळे चाहत्यांमध्ये मोठा उत्साह दिसून आला.
रजनीकांत आणि कमल हासन यांचे सहकुटुंब मतदान
सुपरस्टार रजनीकांत यांनी आपली कन्या आणि चित्रपट निर्माती सौंदर्या रजनीकांत यांच्यासह चेन्नईतील 'स्टेला मारिस स्कूल' येथील मतदान केंद्रावर जाऊन मतदान केले. यावेळी प्रसारमाध्यमांशी बोलताना त्यांनी सर्वांना मतदान करण्याचे आवाहन केले. दुसरीकडे, अभिनेते आणि 'मक्कल निधी मय्यम'चे प्रमुख कमल हासन यांनी त्यांची कन्या अभिनेत्री श्रुती हासन हिच्यासह चेन्नईतील अळवारपेट भागात मतदानाचा हक्क बजावला. लोकशाहीच्या या उत्सवात सहभागी होणे हे प्रत्येकाचे कर्तव्य असल्याचे त्यांनी यावेळी नमूद केले.
'थलापती' विजय आणि अजित कुमार यांच्या केंद्रावर चाहत्यांची गर्दी
या निवडणुकीचे सर्वात मोठे आकर्षण ठरलेले अभिनेते विजय (थलापती), जे आपल्या 'तमिझगा वेट्री कझगम' (TVK) या नवीन पक्षाच्या माध्यमातून पहिलीच निवडणूक लढवत आहेत, त्यांनी चेन्नईतील नीलंकराई येथील केंद्रावर मतदान केले. विजय यांना पाहण्यासाठी त्यांच्या समर्थकांनी मोठी गर्दी केली होती. तसेच, अभिनेता अजित कुमार यांनी चेन्नईतील तिरुवान्मियूर येथे मतदान केले. अजित कुमार मतदानासाठी पोहोचताच चाहत्यांनी त्यांना गराडा घातला होता, मात्र कडेकोट सुरक्षा व्यवस्थेमुळे त्यांनी शांततेत मतदान प्रक्रिया पूर्ण केली.
चित्रपटसृष्टीतील इतर अनेक नामवंत व्यक्तींनीही या निवडणुकीत आपला सहभाग नोंदवला. यामध्ये अभिनेते विक्रम, धनुष, त्रिशा, शिवकार्तिकेयन, विजय सेतुपती, प्रभू, विजय सेतुपती, सूर्या आणि ज्योतिका यांचा समावेश होता. तसेच सुधा कोंगारा, ॲटली, पा. रंजीत यांसारखे प्रसिद्ध दिग्दर्शक आणि दिग्गज संगीतकार इलैयाराजा यांनीही मतदान केंद्रावर जाऊन आपले मत नोंदवले. अनेक सेलिब्रिटींनी मतदानानंतर आपले शाई लावलेले बोट दाखवून सोशल मीडियावरून चाहत्यांना लोकशाहीच्या या प्रक्रियेत सहभागी होण्याचे आवाहन केले.
सायंकाळपर्यंत उत्साहात मतदान
तमिळनाडूमध्ये दुपारी 1 वाजेपर्यंत साधारण 56.81 टक्के मतदानाची नोंद झाली होती, तर सायंकाळी 3 वाजेपर्यंत हा आकडा 70 टक्क्यांच्या पुढे गेला होता. कडेकोट पोलीस बंदोबस्तात ही प्रक्रिया पार पडली असून, आता सर्वांचे लक्ष 4 मे 2026 रोजी लागणाऱ्या निकालांकडे लागले आहे. या निवडणुकीत सत्ताधारी DMK, विरोधी पक्ष AIADMK आणि नव्याने मैदानात उतरलेला विजय यांचा TVK पक्ष यांच्यात चुरशीची लढत पाहायला मिळत आहे.
