Petrol Diesel Price: आंतरराष्ट्रीय बाजारात कच्च्या तेलाच्या किमती कमी झालेल्या असतानाही भारतात पेट्रोल आणि डिझेलचे दर का घटत नाहीत, या सर्वसामान्यांच्या प्रश्नाचे उत्तर अखेर मिळाले आहे. केंद्रीय पेट्रोलियम आणि नैसर्गिक वायू मंत्री हरदीप सिंग पुरी यांनी या परिस्थितीवर महत्त्वाची माहिती दिली. ‘पीटीआय’च्या वृत्तानुसार, जागतिक स्तरावर खनिज तेलाचे भाव घसरले असले, तरी सार्वजनिक क्षेत्रातील तेल विपणन कंपन्या (OMCs) सध्या अशा कच्च्या तेलावर प्रक्रिया करत आहेत, जे पश्चिम आशियातील संकट आणि युद्धाच्या काळात अत्यंत उच्च दराने आयात करण्यात आले होते. यामुळे दरात त्वरित कपात करणे कंपन्यांना शक्य झालेले नाही.
ग्राहकांना महागाईपासून वाचवण्यासाठी कंपन्यांना फटका
केंद्रीय मंत्री हरदीप सिंग पुरी यांनी तेल कंपन्यांच्या आर्थिक ताळेबंदाचा हवाला देत एक मोठी बाब समोर आणली आहे. पश्चिम आशियातील तणावाच्या काळात देशातील जनतेला महागाईची झळ सोसावी लागू नये म्हणून सरकारी तेल कंपन्यांनी इंधनाची विक्री प्रत्यक्ष उत्पादन खर्चापेक्षा कमी किमतीत केली होती. यामुळे पेट्रोल, डिझेल आणि एलपीजी (LPG) सवलतीच्या दरात विकल्यामुळे एप्रिल 2022 ते जून 2024 या कालावधीत कंपन्यांना एकूण 74,781 कोटी रुपयांचा प्रचंड तोटा सहन करावा लागला. या जुन्या तोट्याची भरपाई आणि आधी खरेदी केलेले महागडे कच्चे तेल यामुळेच सध्या किमती स्थिर ठेवण्यात आल्या आहेत.
जागतिक अस्थिरतेतही भारतात इंधनाचा तुटवडा नाही; दरात केवळ किरकोळ वाढ
जागतिक पातळीवर मोठे संकट असूनही भारताने आपली इंधन पुरवठा साखळी मजबूत ठेवली. हरदीप पुरी यांनी सांगितले की, 2022 ते 2026 या काळात भारतात पेट्रोलच्या दरात केवळ 5.58 टक्के आणि डिझेलच्या दरात 6.23 टक्के एवढीच किरकोळ वाढ झाली आहे. देशाच्या भक्कम आर्थिक व्यवस्थेमुळे आंतरराष्ट्रीय बाजारातील दरवाढीचा मोठा धक्का भारतीय ग्राहकांपर्यंत पोहोचू दिला गेला नाही. मार्च, एप्रिल, मे आणि जून या अत्यंत अस्थिर महिन्यांतही देशात कुठेही इंधनाचा तुटवडा जाणवला नाही, पुरवठा सुरळीत राहिला आणि पेट्रोल पंपांवर ग्राहकांच्या लांब रांगा लागल्या नाहीत.
#WATCH | Delhi | On India's energy resilience amid the West Asia crisis, Union Minister for Petroleum and Natural Gas Hardeep Singh Puri says, "From 2022 to 2026, the increase in prices of petrol has been 5.58% and 6.23% for diesel. There has been no increase in the price of fuel… pic.twitter.com/2bOWOExO9N — ANI (@ANI) July 2, 2026
भविष्यात पेट्रोल-डिझेल स्वस्त होणार का? हरदीप पुरी यांनी दिले आशादायक संकेत
आगामी काळात इंधनाचे दर कमी होणार का, या थेट प्रश्नावर केंद्रीय मंत्र्यांनी सकारात्मक आणि आशादायक संकेत दिले आहेत. त्यांनी स्पष्ट केले की, आंतरराष्ट्रीय बाजारात कच्च्या तेलाच्या किमती पुढील काही आठवडे अशाच प्रकारे कमी पातळीवर टिकून राहिल्या, तर किरकोळ बाजारात दर कपातीचा विचार करणे पूर्णपणे रास्त ठरेल. म्हणजेच, जागतिक बाजारपेठेतील घसरणीचा हा कल जर कायम राहिला, तर नजीकच्या भविष्यात सर्वसामान्य भारतीय ग्राहकांना पेट्रोल आणि डिझेलच्या वाढत्या दरांपासून मोठा दिलासा मिळू शकतो.
