Vladimir Putin lives in Underground Bunkers : रशियाचे राष्ट्राध्यक्ष व्लादिमीर पुतिन यांच्या सुरक्षेबाबत एक अत्यंत खळबळजनक वृत्त समोर आले आहे. एका वृत्तसंस्थेच्या विशेष अहवालानुसार, पुतिन सध्या आपला जास्तीत जास्त वेळ हा निवासस्थानाऐवजी सुरक्षित भूमिगत बंकर्समध्ये व्यतीत करत आहेत. रशिया आणि युक्रेनमधील संघर्षाला आता सुमारे 4 वर्षे पूर्ण होत आली असून, या दीर्घकाळ चाललेल्या युद्धामुळे निर्माण झालेली अस्थिरता पुतिन यांच्या वैयक्तिक सुरक्षेवर परिणाम करत असल्याचे दिसत आहे. संभाव्य सत्तापालट किंवा हत्येचा प्रयत्न होण्याची भीती त्यांना वाटत असल्याचा दावा युरोपीय गुप्तचर यंत्रणांनी केला आहे.
ड्रोन हल्ल्यांचे सावट आणि कडक सुरक्षा
रशियावर होणारे ड्रोन हल्ले आणि युक्रेनचे 'ऑपरेशन स्पायडरवेब' यामुळे क्रेमलिनमध्ये चिंतेचे वातावरण आहे. गेल्या वर्षी युक्रेनने आर्क्टिक सर्कलच्या पलीकडे असलेल्या रशियन हवाई तळांना लक्ष्य केल्याने ही भीती अधिकच वाढली आहे. या पार्श्वभूमीवर रशियाच्या फेडरल प्रोटेक्टिव्ह सर्व्हिसने (FSO) पुतिन यांच्यासाठीचे सुरक्षा नियम अत्यंत कठोर केले आहेत. जानेवारीमध्ये अमेरिकेने व्हेनेझुएलाच्या अध्यक्षांविरुद्ध केलेल्या कारवाईनंतर, रशियन यंत्रणा अधिकच सावध झाली आहे. या कारणामुळेही पुतिन यांच्या सार्वजनिक हालचालींवर प्रचंड मर्यादा आल्या आहेत, असे सांगितले जात आहे.
कर्मचाऱ्यांवर कडक निर्बंध आणि अलिप्तता
पुतिन आता नागरी प्रशासनापासून अलिप्त झाल्याचे सूत्रांचे म्हणणे आहे. त्यांच्यासोबत काम करणाऱ्या कर्मचाऱ्यांवरही कठोर निर्बंध लादण्यात आले आहेत. पुतिन यांचे आचारी, छायाचित्रकार आणि अंगरक्षक यांना सार्वजनिक वाहतुकीचा वापर करण्यास पूर्णपणे मनाई करण्यात आली आहे. इतकेच नाही तर, हे कर्मचारी पुतिन यांच्या जवळ जाताना मोबाईल फोन किंवा इंटरनेटशी संबंधित कोणतेही उपकरण सोबत नेऊ शकत नाहीत. ही सुरक्षा तपासणी इतकी कडक आहे की पुतिन यांना भेटणाऱ्या प्रत्येक व्यक्तीची सखोल चाचणी केली जात आहे.
प्रसारमाध्यमांतील 'रेकॉर्डेड' फुटेजचे गुपित
पुतिन यांच्या सार्वजनिक उपस्थितीबाबत रशियन सरकारी माध्यमांनी एक वेगळीच रणनीती अवलंबल्याचे समोर आले आहे. पुतिन यांचे दैनंदिन कामकाज सामान्य असल्याचे जगाला दाखवण्यासाठी अनेकदा त्यांचे आधीच रेकॉर्ड केलेले जुने फुटेज वापरले जात आहेत. प्रत्यक्षात पुतिन यांचे सार्वजनिक दौरे मोठ्या प्रमाणात कमी झाले असून, ते बाह्य जगाशी संपर्क टाळून सुरक्षित स्थळांवरूनच कारभार पाहत आहेत. यामुळे रशियामध्ये खरोखर काय सुरू आहे, याबाबत संभ्रम वाढला आहे.
राजकीय विश्लेषकांचे मत आणि लष्करी बंदोबस्त
मॉस्कोमधील राजकीय विश्लेषक आंद्रेई कोलेस्निकोव्ह यांच्या मते, पुतिन आता केवळ सुरक्षा यंत्रणांच्या सल्ल्यानेच वागत आहेत, ज्यांचे आता सर्व क्षेत्रांवर नियंत्रण आहे. मॉस्को नदीच्या काठावर आणि शहरात ठिकठिकाणी श्वान पथके व सैन्य तैनात करण्यात आले आहे. संभाव्य ड्रोन धोक्यांना तोंड देण्यासाठी संपूर्ण लष्करी यंत्रणा सध्या हाय अलर्टवर आहे. पुतिन यांनी स्वतःला अशा एका कवचात बंद करून घेतले आहे जिथे त्यांना सुरक्षा यंत्रणांव्यतिरिक्त इतर कुणाचाही आवाज ऐकायचा नाही.
शांतता प्रयत्नांना आलेले अपयश
या युद्धाच्या काळात जागतिक पातळीवर शांतता प्रस्थापित करण्याचे प्रयत्नही फसले आहेत. काही महिन्यांपूर्वी अमेरिकेचे राष्ट्राध्यक्ष डोनाल्ड ट्रम्प यांनी रशिया-युक्रेन संघर्ष थांबवण्यासाठी पुढाकार घेतला होता. मात्र, त्यांच्या या प्रयत्नांना अद्याप यश आलेले नाही. दोन्ही बाजूंकडून एकमेकांच्या शहरांवर हवाई हल्ले सुरूच असल्याने हा संघर्ष कधी संपणार, याकडे जगाचे लक्ष लागले आहे. दरम्यान, रशियाने मात्र पुतिन यांच्या बंकरमधील वास्तव्याबाबतच्या सर्व चर्चा केवळ अफवा असल्याचे सांगत फेटाळून लावल्या आहेत.
